No Wĩkĩe Vinya Mũklĩsto Wavoie

Aklĩsto aingĩ mavoie nĩmokaa ũmbanonĩ wa kũlilikana kĩkwʼũ kya Yesũ. O na kau nĩmalikile masindanonĩ aa ma thayũ, nĩmaolile kĩthito kyoo nũndũ wa itumi syĩ kĩvathũkanyʼo. Itumi imwe niwetetwe mbulosuanĩ Mũsyokee Yeova. (Aevl 12:1) Ĩndĩ o na asu mavoie nĩ ma vata methonĩ ma Yeova nĩkwĩthĩwa amathooie na nthakame ya Mwana wake. (Alo 8:32; 1Vet 1:18, 19) Tũtonya kũmatetheesya ata masyoke kĩkundinĩ?

O tondũ mũĩthi ũmanthaa na kĩthingʼĩĩsyo malondu ala mau, atumĩa ma kĩkundi nĩmekĩaa kĩthito mamanthe na maitetheesya Aklĩsto ala mavoie. (Lk 15:4-7) Kĩthito kyoo kyonanasya ũndũ Yeova wendete Aklĩsto asu. (Yel 23:3, 4) Ĩndĩ ti atumĩa me oka matonya kũmekĩa vinya, o naitũ no twĩke ũu. Yeova nũtanaa mũno oona tũimantha kũmeka ũseo na kũmewʼĩa ĩnee, na ithyĩ ene nĩtũtanaa mũno tweeka ũu. (Nth 19:17; Meko 20:35) Kwoou tata mũno ũsũanĩe nũũ ũtonya kwĩkĩa vinya na ũyĩka ũu ũteũtindĩa!

SISYA VITIO YĨ NA KYONGO, MEKĨE VINYA ALA MAVOIE, NA ĨNDĨ ŨISŨNGĨA MAKŨLYO AA MAATĨĨE:

• Nĩ ĩtambya yĩva ya mbee Abbey woosie ĩla wakomanie na mwĩĩtu-a-asa ũtamwĩsĩ?

• Nĩkĩ nũseo tũkamba kwona atumĩa ethĩwa nĩtũkwenda kũtetheesya mũndũ wavoie?

• Abbey eekie ata atanamba kũthokea Laura ya kelĩ?

• Ĩla Abbey watataa kwĩkĩa Laura vinya, oonanisye ata nĩwamwendete, na kana aĩ na kĩthetheesyo na wũmĩĩsyo?

• Ngelekanyʼo ya Yesũ ĩla yĩ ĩandĩkonĩ ya Luka 15:8-10 yĩtũmanyĩsya kyaũ?

• Vaĩ na moathimo meva nũndũ wa kĩthito kĩla ana-a-asa na eĩtu-a-asa meekĩie nĩ kana matetheesye Laura?