‘Vaulo Nĩwamũtũngĩie Ngai Mũvea, na Eethĩwa na Ũkũmbaũ’

Yĩla kĩkundi kya Lomi kyeewie kana Vaulo nĩwũkĩte, ana-a-asa kauta nĩmeeyumisye matembea kĩlomita ta 64 mamũthaũe. Kĩko kyu meekie kyatumie Vaulo ewʼa ata? Yĩla Vaulo wamonie, ‘Nĩwamũtũngĩie Ngai mũvea na eethĩwa na ũkũmbaũ.’ (Mek 28:15) O na kau Vaulo nĩweekĩaa ana-a-asa vinya yĩla wathi ikundinĩ, ĩvindanĩ yĩĩ woovetwe, nĩwe weekĩawa vinya.—2Ko 13:10.

Ũmũnthĩ, asyaĩĩsya ma mũthyũlũlũko nĩmathokeaa ikundi nĩ kana mekĩe ana-a-asa na eĩtu-a-asa vinya. Na nĩkwĩthĩwa o namo no andũ, mavinda amwe nĩmanoaa, makakwatwa nĩ mathĩna, na makakwʼa ngoo. Ĩvinda yĩla yĩngĩ mũsyaĩĩsya wa mũthyũlũlũko na kĩveti kyake makathokea kĩkundi kyenyu, we ũtonya kwĩka ata nĩ kana ‘mwĩkĩane vinya’?—Alo 1:11, 12.

• 

  Enda maũmbanonĩ ma kũthi ũtavanyʼa. Mũsyaĩĩsya wa mũthyũlũlũko nĩwĩkĩawa vinya mũno yĩla woona atavanyʼa meeyumya kũtavanyʼa kyumwanĩ kĩla ũthokeete kĩkundi kyoo. (1Th 1:2, 3; 2:20) Wĩka nesa mũno ũkausũsya ũvainia mũtetheesya kyumwanĩ kĩu. Nũtonya kwĩyumya kũtavanyʼa nake kana na kĩveti kyake, kana ũkamathokya mũkemanyĩsye na mũmanyĩwʼa waku wa Mbivilia? Nĩmatanaa mũno kũtavanyʼa na atavanyʼa me kĩvathũkanyʼo, o na ala eũ kana ala mate na ũmanyi mwingĩ wa kũtavanyʼa.

• 

  Mathokye: No ũmathokye makome kwaku kana ũkamathokya mũye vamwe namo? Yĩla weeka ũu, nĩmamanyaa nũmendete. Mo o na mayĩthĩawa mayenda syĩndũ mbingĩ wamathokya.—Luk 10:38-42.

• 

  Ĩthukĩĩsye na Ũiatĩĩa Motao Make. Wendo nĩwʼo ũtumaa mũsyaĩĩsya wa mũthyũlũlũko enda kũtũtetheesya twaĩlye ũthũkũmi witũ. Mavinda amwe nũtonya kwona aĩle kumya ũtao mũito. (1Ko 5:1-5) Yĩla tweenyivya na twaatĩĩa ũtao ũla waumya, nũtanaa mũno.—Avl 13:17.

• 

  Tũnga Mũvea. Tavya mũsyaĩĩsya wa mũthyũlũlũko na mũka ũndũ watetheka nĩ ndambũka yoo. No ũmatavye mwenene kana ũkamaandĩkĩa kavalũa.—Ako 3:15.