Kĩla Ũtonya Kwĩka Wĩĩkala Nthĩ Nzaũ

Ilungu ila syavĩta nĩsyoonanyʼa kana Ngai akilyĩ kũete mũminũkĩlyo wa ĩvinda yĩĩ ĩthũku na mathĩna mayo onthe. Tũi na nzika akeeka ũu. Nĩkĩ? Nũndũ Ndeto yake, Mbivilia, yathanĩte atĩĩ:

“Nthĩ nĩkũvĩta.”—1 YOANA 2:17.

O na nĩtwĩsĩ kana ve andũ makavonoka nũndũ mũsoa ũsu wongelete kwathana atĩĩ:

“Ũla wĩkaa kwenda kwa Ngai ekalaa tene na tene.”

Kwoou ethĩwa nĩtũkwenda kũvonoka, no nginya twĩke kwenda kwa Ngai. Ĩndĩ nĩ kana tũmanye kwenda kwa Ngai, no nginya twambe kũkwata ũmanyi ĩũlũ wake.

‘ENDEEA KŨKWATA ŨMANYI’ ĨŨLŨ WA NGAI NĨ KANA WĨVONOKA

Visa wa 1. Nasi ũilye vandũ nthĩ sivitalĩ anoete mũno na ayĩwʼa e mũitavĩe. Visa wa 2. Nĩwathi mũkaawanĩ saa sya kũthũmũa na oona mũndũ mũka mathũkũmaa ĩmwe aisoma ĩkaseti e mũtanu.Visa wa 3. Mũndũ mũka ũsu nĩwamũsomea mũsoa wĩ Mbivilianĩ na amũnenga kaati ya kũmwelekelya nthĩnĩ wa jw.org.

Yesũ aisye: “Thayũ wa tene na tene nĩwʼo ũũ, maendeee kũkwata ũmanyi ĩũlũ waku, Ngai ũla wa wʼo weka.” (Yoana 17:3) Nĩ kana twĩvonoka mũminũkĩlyo na tũyĩkala tene na tene, nĩtwaĩle ‘kũendeea kũkwata ũmanyi’ ĩũlũ wa Ngai. Kĩu kĩonanyʼa kana kwĩtĩkĩla kana Ngai e kwʼo kana kũmanya tũmaũndũ tũnini ĩũlũ wake kũitoetye. Nĩtwaĩle kũtuma ndũũ nake. Na nĩ kana andũ maendeee kwĩkala me ndũũ, nĩmatũmĩaa ĩvinda yoo vamwe. Ũu nowʼo twaĩle kwĩkana na ndũũ yitũ na Ngai. Kwasũanĩa maũndũ amwe ma vata twĩmanyĩasya Mbivilianĩ matonya kũtũtetheesya tũtume ndũũ na Ngai na tũiendeea kwĩkala twĩ ndũũ nake.

Ũwʼo Ũla Twĩmanyĩasya Mbivilianĩ

Twĩmanyĩasya kana Ngai endaa twĩkale nthĩ nzeo.

Ngai oomba asyai maitũ ma mbee, Atamu na Eva, amaiie mũũndanĩ mũseo mũno weetawa Eteni. Mayaĩ na naĩ, na Ngai nĩwamanengete kyonthe kĩla mendaa nĩ kana mekale me atanu. Maĩ matonya kwĩkala tene na tene. Ta keka nĩmaendeeie kũsũvĩa ndũũ yoo na Ngai, mayĩthĩwa maakwʼa. Ĩndĩ nĩmatwie kũtũla mwĩao ũtaĩ mũito Ngai wamanengete.

Nĩtwĩmanyĩasya nĩkĩ tũthĩnaa.

Yĩla mũndũ wa mbee, Atamu, waleile kũmwĩwʼa Ngai, we na nzyawa syake nĩmaaisye mwanya wa kwĩkala thayũ tene na tene. Mbivilia ĩeleetye kĩu atĩĩ: “Kwĩsĩla mũndũ ũmwe naĩ yalikile ĩũlũ wa nthĩ na kĩkwʼũ kwĩsĩla naĩ, na kwondũ wa ũu, kĩkwʼũ kyavikĩa andũ onthe.” (Alomi 5:12) O ũndũ mũsyai ũtonya kũtiĩa mwana wake ũwau mũthũku, nowʼo Atamu watiĩe syana syake syonthe naĩ. Kĩu nĩkyo kĩtumaa tũkũa na tũikwʼa.

Nĩtwĩmanyĩasya maũndũ ala Ngai wĩkĩte kwondũ witũ.

Mbivilia yaĩtye: “Nũndũ Ngai nĩwendete nthĩ mũno, nĩwanenganie Mwana wake e ũmwe, nĩ kana kĩla mũndũ ũmũĩkĩĩaa ndakanangwe, ĩndĩ akwate thayũ wa tene na tene.” (Yoana 3:16) Ngai atũmie Yesũ kũũ nthĩ nĩ kana anengane thayũ wake kwondũ witũ. Mũndũũme ũmwe wa India wa myaka 86 wĩtawa Prabhakar aĩtye atĩĩ ĩũlũ wa kĩu: “Kĩu kĩmbonasya ũndũ Yeovaa ũmbendete mũno wĩana. Wendo wake nũtumĩte nĩthĩwa na wĩkwatyo wa kwĩkala thayũ tene na tene.”

Nĩtwĩmanyĩasya ũndũ tũtonya kũtũngĩa Ngai mũvea nũndũ wa maũndũ ala ũtwĩkĩte.

Mbivilia yaĩtye kana no twonanyʼe nĩtũũmũtũngĩa Ngai mũvea kwondũ wa maũndũ ala ũtwĩkĩte kwa “kũkwata mĩao yake.” (1 Yoana 2:3) Nũndũ Yeova Ngai nũtwendete, nũtwonasya kĩla twaĩle kwĩka nĩ kana twĩkale twĩ atanu. (Isaia 48:17, 18) Ndendaa kwona tũithĩna. Atwathĩte kana twaatĩĩa motao make, tũkekalaa twĩ atanu, na tũyĩthĩwa na wĩkwatyo wa kwĩkala thayũ tene na tene.

SOMAA NDETO YA NGAI, MBIVILIA, KĨLA MŨTHENYA

Nasi ũsu ailye nza saa sya kũthũmũa na asyaĩtye ĩtunĩ ĩtina wa kũsoma Mbivilia. — No ũvonoke mũminũkĩlyo wa nthĩ ĩno wamũvoya Ngai aũtetheesye na weeka kwenda kwake

Tũĩsaa lĩu nĩ kana twĩkale thayũ. Ĩndĩ Yesũ aisye: “Mũndũ ndekalaa thayũ nũndũ wa mũkate wʼoka, ĩndĩ nũndũ wa kĩla ndeto yumaa kanywʼanĩ wa Yeova.”—Mathayo 4:4.

Ũmũnthĩ, ndeto sya Yeova ikwatĩkanaa Mbivilianĩ. Wasoma ĩvuku yĩu ĩtheu, ũkeemanyĩsya ũwʼo wa vata ĩũlũ wa maũndũ ala Ngai weekie tene kwondũ wa andũ, ala ũendeee kwĩka ũmũnthĩ, na ala ũkeka ĩvinda yũkĩte.

MŨVOYE NGAI AŨTETHEESYE

Nĩ kyaũ waĩle kwĩka ethĩwa nũkwenda kũatĩĩa mĩao ya Ngai, ĩndĩ ũyĩthĩa wĩĩwʼa ve vinya kũekana na maũndũ ala ũmenete? Kũmũmanya Ngai nesa no kũũtethye mũno.

Kwasũanĩa ngelekanyʼo ya mũndũ mũka tũũmwĩta Sakura, ũla waĩ na mwĩkalĩle mũthũku. Yĩla wambĩĩie kwĩmanyĩsya Mbivilia, nĩwamanyie kana Ngai aĩtye ‘tũkĩe ũlaalai.’ (1 Akolintho 6:18) Kwoou nĩwavoyie Ngai amũnenge vinya, na kĩu kyatuma aekana na mwĩkalĩle ũsu. Ĩndĩ o na ũmũnthĩ, no ũtatĩkaa aũsyokee. Aĩtye atĩĩ: “Yĩla mesilya mathũku mooka kĩlĩkonĩ kyakwa, nĩmũvoyaa Yeova kuma ngoonĩ andetheesye nũndũ nĩnĩsĩ ndyĩsa kũmasinda na vinya wakwa mwene. Mboya nĩtumĩte nĩmũthengeea Yeova.” O ta Sakura, andũ milioni mbingĩ nĩmaendeee kũmũmanya Ngai nesa. Nake nũmanengae vinya wa kwĩka moalyũku nĩ kana mekale ũndũ wendete.—Avilivi 4:13.

O ũndũ waendeea kũmũmanya Ngai nesa, nowʼo wĩthĩaa o nake ‘Ngai nũkwĩsĩ’ ta wĩ mũnyanya wake mũseo. (Akalatia 4:9; Savuli 25:14) Kĩu kĩkatuma ũvonoka na ũilika nthĩ nzaũ ya Ngai. Ĩndĩ yo nthĩ ĩsu ĩkeethĩwa ĩilye ata? Kĩlungu kĩla kĩatĩĩe nĩkĩkũelesya ũndũ ũsu.

a Mbivilia yonanĩtye kana ĩsyĩtwa ya Ngai nĩ Yeova.