Kwata Mbau Mũsyaĩĩsya Witũ Yesũ

1. Ũmũnthĩ Yeova endaa twĩke ata?

ŨMŨNTHĨ, Ngai endaa ũvoo mũseo wa Ũsumbĩ ũtavanwʼe nthĩ yonthe. (Mko. 13:10; 1 Tim. 2:3, 4) Wĩa ũsu nĩ wa Yeova, na nĩ ũndũ wa vata mũno kwona anyuvĩte Mwana wake mwendwa awũũngamĩe. Na nũndũ Yesũ nĩ mũsyaĩĩsya mũseo, no twĩkale tũte na nzika kana wĩa ũsu ũkeanĩwʼa nesa vyũ o ũndũ Yeova wendaa, mũthya ũtanavika.—Mt. 24:14.

2. Twĩneenea kyaũ ĩsomonĩ yĩĩ?

² Ĩsomonĩ yĩĩ nĩtũkwona ũndũ Yesũ ũtũmĩaa “ngombo ndĩkĩĩku na mbũĩ” kũnenga aatĩĩi make lĩu wa kĩ-veva na kũmavanga nesa matethye wĩa wa kũtavanyʼa kwa nzĩa nene vyũ kwĩ ũndũ waatethwʼa. (Mt. 24:45) O na nĩtũkwona maũndũ ala kĩla ũmwe witũ ũtonya kwĩka akwate mbau Yesũ na ngombo ĩsu ndĩkĩĩku.

YESŨ NĨWE ŨŨNGAMĨE WĨA WA KŨTAVANYʼA

3. Nĩ ũkũmũ wĩva Yesũ ũnengetwe?

³ Yesũ nĩwe ũũngamĩe wĩa wa kũtavanyʼa. Twĩsĩ ũu ata? Ĩvinda ĩkuvĩ atanamba kũsyoka ĩtunĩ, nĩwakomanĩie na aatĩĩi amwe make kĩĩmanĩ kĩmwe Kalilii. Ameie: “Nĩnĩnengetwe ũkũmũ wʼonthe ĩtunĩ na kũũ nthĩ.” Ĩtina wa ũu ameie: “Endai ĩndĩ mũkatwʼĩkĩthye andũ ma mbaĩ syonthe amanyĩwʼa.” (Mt. 28:18, 19) Kwoou ũkũmũ ũmwe Yesũ ũnengetwe nĩ wa kũtongoesya wĩa wa kũtavanyʼa.

4. Nĩkĩ tũte na nzika kana Yesũ nũendeee kũtongoesya wĩa wa kũtavanyʼa o na kũvika ũmũnthĩ?

⁴ Yesũ aisye kana wĩa wa kũtavanyʼa na kũtwʼĩkĩthya andũ amanyĩwʼa ũkatethwʼa ‘mbaĩnĩ syonthe,’ na kana akeethĩawa vamwe na aatĩĩi make “mĩthenya yonthe nginya mũminũkĩlyo wa ĩvinda yĩĩ.” (Mt. 28:20) Ndeto isu sionanyʼa nesa kana o na kũvika ũmũnthĩ, no ũendeee kũtongoesya wĩa ũsu.

5. Tũtetheeasya ata kwĩanĩsya wathani ũla wĩ Savuli 110:3?

⁵ Yesũ ndaĩ na nzika kana mũminũkĩlyonĩ wa ĩvinda yĩĩ kũkeethĩwa na athũkũmi meanĩtye ma kũtethya wĩa ũsu. Nĩweesĩ kana ndeto ii syathaniwe nĩ mũandĩki wa Savuli ikeanĩa: “Andũ maku nĩmeĩthembaa na ngoo ya kwenda mũthenya wa vinya waku.” (Sav. 110:3) Ethĩwa nũtethasya wĩa wa kũtavanyʼa, wĩthĩawa ũikwata mbau Yesũ na ngombo ndĩkĩĩku na wĩthĩawa ũitetheesya kwĩanĩsya wathani ũsu. Wĩa ũsu no ũsongete na mbee, ĩndĩ wĩ o mawetu mawʼo.

6. Thĩna ũmwe atavanyʼa ma Ũsumbĩ makomanaa nawʼo nĩ wĩva?

⁶ Thĩna ũmwe tũkomanaa nawʼo twĩ atavanyʼa ma Ũsumbĩ nĩ kũvĩngwa. Akaĩi ma mũĩkĩĩo na atongoi ma ndĩni na ma siasa nĩmatavĩtye aingĩ maũndũ ma ũvũngũ ĩũlũ wa wĩa witũ. Yĩla andũ maitũ ma mũsyĩ, anyanya maitũ, na ala tũthũkũmaa namo maĩkĩĩa ũvũngũ ũsu, no mambĩĩe kũtũthingʼĩĩsya tũeke kũmũthũkũma Yeova na kũtavanyʼa. Nthĩnĩ wa nthĩ imwe, ala matũvĩngaa nĩmatĩsasya ana-a-asa maitũ, makamavithũkĩa, makamakwata, o na makamekya yela. Maũndũ asu maitũsengʼasya. Nĩkĩ? Nũndũ Yesũ athanie ũũ: “Mũkamenwa nĩ mbaĩ syonthe nũndũ wa ĩsyĩtwa yakwa.” (Mt. 24:9) O na ĩngĩ, kwona tũimenwa mũno wĩana ũu kwonanasya Yeova nĩwendeeawʼa nithyĩ. (Mt. 5:11, 12) Ndevili nĩwe ũtumaa tũvĩngwa. Ĩndĩ ndesa kũsindana na Yesũ! Nũndũ Yesũ e ngalĩ ĩ yitũ, ũvoo mũseo nũtavanĩtwʼe kwa andũ ma mbaĩ syonthe.

7. Nĩ maũndũ meva meũkũĩkĩĩthya kana wathani ũla wĩ Ũvuanyʼo 14:6, 7 nũendeee kwĩanĩwʼa?

⁷ Thĩna ũngĩ tũkomanaa nawʼo yĩla tũũtavanyʼa nĩ kana andũ maneenaa ithyomo mbingĩ syĩ kĩvathũkanyʼo. Nthĩnĩ wa ũvuanyʼo ũla Yesũ wanengie mũtũmwa Yoana, oonanisye kana ĩvindanĩ yĩĩ yitũ ũvoo mũseo ndũkasiĩĩwa nĩ ivathũkanyʼo sya ithyomo. (Soma Ũvuanyʼo 14:6, 7.) Ũu ũtonyeka ata? Tũnengae andũ aingĩ ũndũ vatonyeka mwanya wa kwĩthukĩĩsya ũvoo wa Ũsumbĩ. Ũmũnthĩ, andũ ĩũlũ wa nthĩ no masome ũvoo ũneeneete Mbivilia nthĩnĩ wa jw.org, nũndũ vethĩawa na syĩndũ sya ithyomo mbee wa 1,000! Eka ũu, Nzama Ĩla Ĩtongoesye nĩnanenganie mwanya ĩvuku yĩla tũtũmĩaa mũno kũtwʼĩkĩthya andũ amanyĩwʼa yĩtawa Tanĩa Thayũ Tene na Tene! yĩalyũlwe kwa ithyomo mbee wa 700! Ũndũ ũngĩ nĩ kana lĩu wa kĩ-veva no ũkwatĩkane kwĩsĩla vitio kwondũ wa ala matewʼaa, na kwĩsĩla mavuku ma mũandĩko wa ala matonaa. Vate nzika, nĩtwĩyoneete mawathani ma Mbivilia maianĩwʼa. Andũ “kuma ithyomonĩ syonthe sya i mbaĩ” nĩmemanyĩĩtye kũneena “kĩthyomo kĩtheu” kya ũwʼo ũla wĩ Mbivilianĩ. (Nzek. 8:23; Nzev. 3:9) Maũndũ asu onthe meanĩĩtwʼe ungu wa ũtongoi mũseo wa Yesũ Klĩsto.

8. Wĩa wa kũtavanyʼa ũtumĩte twĩanĩsya maũndũ meva?

⁸ Ũmũnthĩ, ũseũvyo wa Yeova wĩ na andũ mbee wa 8,000,000 nthĩnĩ wa nthĩ 240, na kĩla mwaka andũ ngili mbingĩ nĩmavatisawa! Ĩndĩ ũndũ ũla wa vata vyũ kwĩ ũtalo ũsu nĩ kana onthe ala mavatiswa nĩmethĩawa mekĩĩte kĩthito methĩwe na nguma sya Kĩklĩsto, kana kwa ndeto ingĩ, mevwʼĩke “mwĩkalĩle mweũ.” (Ako. 3:8-10) Kwa ngelekanyʼo, aingĩ nĩmaekie kwĩthĩwa na mwĩkalĩle mũvuku, maekana na ũngʼendu, kĩmena, na kũkumya nthĩ yoo. O na ĩngĩ, wathani ũla wĩ Isaia 2:4 nĩwĩanĩĩte nũndũ ‘mayĩmanyĩasya kaũ ĩngĩ.’ Na nũndũ nĩtwĩkĩĩte kĩthito twĩvwʼĩke mwĩkalĩle mweũ, nĩtũtetheesye aingĩ makoka ũseũvyonĩ wa Ngai na tũkonanyʼa kana nĩtũmũatĩĩe mũsyaĩĩsya witũ Klĩsto Yesũ. (Yoa. 13:35; 1 Vet. 2:12) Maũndũ asu mayĩkaa o kwĩyĩete. Yesũ nĩwe ũtũtetheeasya.

YESŨ NĨWANYUVIE NGOMBO NDĨKĨĨKU

9. Kwosana na Mathayo 24:45-47, nĩ kyaũ kyathaniwe kĩkekĩka ĩvindanĩ ya mũminũkĩlyo?

⁹ Soma Mathayo 24:45-47. Yesũ athanie kana mĩthenyanĩ ya mũminũkĩlyo akanyuva “ngombo ndĩkĩĩku na mbũĩ” nĩ kana ĩnengae aatĩĩi make lĩu wa kĩ-veva. Kwoou ngombo ĩsu yaaĩlĩte kwĩthĩwa ĩithũkũma na kĩthito ĩvindanĩ yĩĩ yitũ. Na ũu nowʼo yĩthĩĩtwe ĩyĩka. Mũsyaĩĩsya witũ atũmĩaa kakundi kanini ka ana-a-asa etĩkĩwʼa mauta kũnenga andũ ma Ngai na ala mekwendeewʼa “lĩu [wa kĩ-veva] ĩvinda yĩla yaĩle.” Ĩndĩ ti atĩ aũme asu nĩmasumbĩkĩte mũĩkĩĩo wa Aklĩsto ala angĩ. (2 Ako. 1:24) Nĩmethĩawa mesĩ kana Yesũ Klĩsto nĩwe “mũtongoi na mwĩaĩi” wa andũ make.—Isa. 55:4.

10. Nĩ ĩvuku yĩva katĩ wa ala monanĩtwʼe visanĩ yaũtetheeisye wambĩĩa kũmũthũkũma Yeova?

¹⁰ Kuma mwaka wa 1919, ngombo ndĩkĩĩku nĩyĩthĩĩtwe ĩiseũvya mavuku matetheesye ala mekwendeewʼa kwĩsamĩa ya mbee ũwʼo ũla wĩ Ndetonĩ ya Ngai. Mwakanĩ wa 1921, ngombo ĩsu nĩyaumĩthisye ĩvuku The Harp of God, nĩ kana yĩtetheesye ala mekwendeewʼa kwĩmanyĩsya maũndũ ma mũsingi ala me Mbivilianĩ. Na o ũndũ maũndũ maendie maalyũkĩte, nowʼo mavuku angĩ maumĩthiwʼe. Nĩ ĩvuku yĩva yaũtetheeisye kũmũmanya Ĩthe witũ wa ĩtunĩ na kũmwenda? Watetheeiwʼe nĩ “Let God Be True,” Wʼo Ũla Ũtongoasya kwa Thayũ Ũtathela, Unaweza Kuishi Milele Katika Paradiso Duniani, Ujuzi Uongozao Kwenye Uhai Udumuo Milele, Mbivilia Yo Ĩmanyĩasya Ata?, Mbivilia Ĩtũmanyĩasya Kyaũ?, kana nĩ ĩvuku Tanĩa Thayũ Tene na Tene!, yĩla yĩnaumie mĩtũkĩ? Mavuku asu onthe maseũviwʼe nĩ kana matũtetheesye kũtwʼĩkĩthya andũ amanyĩwʼa na maumĩthiwʼe ĩvindanĩ yĩla yaĩle vyũ.

11. Nĩkĩ nĩ ũndũ wa vata ithyonthe tũkwate lĩu wa kĩ-veva?

¹¹ Ala mekwendeewʼa ti mo me oka methĩawa na vata wa lĩu mũmũ wa kĩ-veva. Ithyonthe nĩtwaĩlĩte kũya lĩu ũsu. Mũtũmwa Vaulo aandĩkie: “Lĩu mũmũ nĩ wa andũ aima.” Ongelile kwasya kana yĩla twatũmĩa kĩla tũkwĩmanyĩsya Mbivilianĩ, twĩthĩawa tũtonya “kũvathũkanyʼa ũseo na ũthũku.” (Aevl. 5:14) Ti laisi kũlũmanyʼa na myolooto ya Yeova ĩvindanĩ yĩĩ yitũ nũndũ andũ aingĩ methĩawa na mĩkalĩle mĩthũku vyũ. Ĩndĩ Yesũ nũĩkĩĩthasya nĩtwakwata lĩu wĩ mũyo wa kĩ-veva nĩ kana mũĩkĩĩo witũ ũendeee kwĩthĩwa wĩ mũlũmu. Lĩu ũsu wĩthĩawa wumĩte Ndetonĩ ya Ngai mbeveee, Mbivilia. Na Yesũ atũmĩaa ngombo ndĩkĩĩku kũũseũvya na kũũnengane.

12. O ta Yesũ, twonanĩtye ata kana nĩtũnengete ĩsyĩtwa ya Ngai ndaĩa?

¹² O ta Yesũ, nĩtũnengete ĩsyĩtwa ya Ngai ndaĩa ĩla yaĩlĩte. (Yoa. 17:6, 26) Kwa ngelekanyʼo, mwakanĩ wa 1931 nĩtwambĩĩie kwĩtwa ĩsyĩtwa yĩ Maandĩkonĩ, nayo nĩ Ngũsĩ sya Yeova. Na nũndũ nĩtwatwie kwĩtanĩwʼa na Ĩthe witũ wa ĩtunĩ, kĩu kĩonanyʼa kana nĩtwonaa ĩsyĩtwa yake yĩ ya vata. (Isa. 43:10-12) O na ĩngĩ, kuma Mwei wa 10 mwaka o ũsu, ĩsyĩtwa yĩu yĩthĩĩtwe yĩyumĩla ĩthangũnĩ ya mbee ya ĩkaseti yĩĩ. Eka ũu, Mbivilia ya New World Translation of the Holy Scriptures nĩtũngĩĩte ĩsyĩtwa ya Ngai kũla yaĩlĩte kwĩthĩwa yĩĩ Ndetonĩ yake. Kĩu kĩ kĩvathũkanyʼo vyũ na kĩla ndĩni ila syĩyĩtaa sya Kĩklĩsto syĩkaa, nũndũ nivetete ĩsyĩtwa ya Yeova Mbivilianĩ mbingĩ!

YESŨ NŨVANGĨTE AATĨĨI MAKE NESA

13. Nĩ kyaũ kĩkũĩkĩĩthasya kana Yesũ nũtũmĩaa ĩla “ngombo ndĩkĩĩku na mbũĩ” ũmũnthĩ? (Yoana 6:68)

¹³ Yesũ nũtũmĩĩte “ngombo ndĩkĩĩku na mbũĩ” ĩvindanĩ yĩĩ yitũ kũvanga ũseũvyo wa mwanya ĩũlũ wa nthĩ nĩ kana ũtwaĩĩsye ũthaithi wa wʼo. We wonaa ata ũseũvyo ũsu? Nũtonya kwĩthĩwa wĩwʼaa ta mũtũmwa Vetelo, ũla wamũtavisye Yesũ ũũ: “Mwĩaĩi, twĩthi kũla kwĩ ũũ? We wĩ na ndeto sya thayũ wa tene na tene.” (Yoa. 6:68) Ithyĩ twĩthĩwa va ũmũnthĩ ta keka tũyaamanya ũseũvyo wa Yeova? Klĩsto atũmĩaa ũseũvyo ũsu kũĩkĩĩthya kana nĩtwaĩthwʼa nesa kĩ-veva. O na nĩtũmanyĩawʼa ũndũ tũtonya kwĩanĩsya ũtavanyʼa witũ nesa vyũ. Eka ũu, nĩtũtetheeawʼa kwĩvwʼĩka “mwĩkalĩle mweũ” nĩ kana tũmwendeesye Yeova.—Aev. 4:24.

14. Kwĩthĩwa ũseũvyonĩ wa Yeova ĩvindanĩ ya ũwau wa COVID-19 kũũtethetye ata?

¹⁴ Yesũ nũtũnengae myolooto yaĩlĩte ĩvindanĩ ya mathĩna. Nĩtwoonie myolooto ĩsu ĩitũtethya yĩla ũwau wa COVID-19 wambĩĩie. O na kau andũ aingĩ ĩũlũ wa nthĩ mayeesĩ nesa kĩla matonya kwĩka, Yesũ nĩwaĩkĩĩthisye kana nĩtwakwata myolooto yĩ ũtheinĩ ya kũtũsũvĩa. Nĩtweekĩiwe vinya twĩkĩae masiki yĩla twĩ andũnĩ na tũyĩsũvĩa tũikathengeanĩe na angĩ. Namo atumĩa nĩmalilikanilwʼe vata wa kũeaa ngewa na ala me kĩkundinĩ mavinda kwa mavinda, nĩ kana maĩkĩĩthye me na kyonthe kĩla kĩtonya kũmatetheesya mekale me aima kĩ-mwĩĩ na kĩ-veva. (Isa. 32:1, 2) O na ĩngĩ, nĩtwĩthĩĩtwe tũikwata myolooto myeũ na tũkekĩwa vinya nĩ livoti sya Nzama Ĩla Ĩtongoesye.

15. Twanengiwe myolooto yĩva ĩvindanĩ ya COVID-19 ĩkonetye kwĩka maũmbano na kũtavanyʼa, na ĩtũtethetye ata?

¹⁵ O na ĩngĩ, ĩvindanĩ ya ũwau ũsu nĩtwakwatie myolooto yĩ ũtheinĩ ĩtũtavĩtye ũndũ tũtonya kũtavanyʼa na kwĩka maũmbano ma kĩkundi. Na tũte kwananga saa, nĩtwambĩĩie kũtũmĩa Indaneti kwĩka maũmbano ma kĩkundi na kwĩthukĩĩsya maũmbano manene. Eka ũu, yu ũtavanyʼa no ta weethĩiwe wa kũandĩka valũa na kũkũna simũ. Ĩndĩ Yeova nũathimĩte kĩthito kitũ. Kwa ngelekanyʼo, ovisi mbingĩ sya ũvonge niwetete kana ũtalo wa atavanyʼa nĩwongelekete mũno. Kwongela ũu, aingĩ nĩmeyoneete maũndũ ma kwĩkĩa vinya ĩvindanĩ yĩĩ.—Sisya ĩsandũkũ “Yeova Nũathimaa Ũtavanyʼa Witũ.”

16. Nĩ ũndũ wĩva tũte na nzika nawʼo?

¹⁶ Ĩvindanĩ ya ũwau ũsu, amwe nĩmatonya kwĩthĩwa meewʼaa ũseũvyo ta ũkumya tũmĩao twingĩ tũte na vata. Ĩndĩ kĩla ĩvinda nĩtweeyoneaa kana myolooto ĩla twanengwa nĩyo yaĩlĩte vyũ. (Mt. 11:19) Kũvindĩĩsya ũndũ Yesũ wĩthĩĩtwe aitongoesya andũ make nesa kũkatumaa twĩkala tũte na nzika kana o na kwathi ata ĩvinda yũkĩte, we na Ĩthe wake meendea kwĩthĩwa vamwe naitũ.—Soma Aevelania 13:5, 6.

17. Kũthũkũma ungu wa mũsyaĩĩsya witũ Yesũ kũtumaa wĩwʼa ata?

¹⁷ Nĩtũtanaa mũno kũthũkũma twĩ ungu wa mũsyaĩĩsya witũ Yesũ! Twĩ ma ũseũvyo ũtaaanĩtwʼe nĩ ivathũkanyʼo sya mbaĩ, nthĩ, kana ithyomo. Nĩtũĩthawʼa nesa kĩ-veva na nĩtũmanyĩĩtwʼe nesa ũndũ tũtonya kũtavanyʼa. O na ĩngĩ, kĩla ũmwe witũ nũendeee kũtetheewʼa kwĩvwʼĩka mwĩkalĩle mweũ. Na eka ũu, nĩtũendeee kwĩmanyĩsya kwenda ala angĩ. Vate nzika, twĩ na itumi mbingĩ sya kwĩkathĩĩa nthĩnĩ wa mũsyaĩĩsya witũ Yesũ!