Andũ mayĩsa kũmina kaũ
Ũndũ Kaũ na Ithokoo Ikathela
Mbivilia yaĩtye kana Ngai nĩwe ũkatuma “makaũ mathela kũvika kĩtulu kya nthĩ,” ĩndĩ ti andũ.—Savuli 46:9.
NGAI AKAMINA SILIKALĨ SYA ANDŨ
Ngai akavetanga silikalĩ sya andũ kaũnĩ wĩtĩtwe Mbivilianĩ, Alimaketoni.a (Ũvuanyʼo 16:16) Ĩvindanĩ yĩu, “asumbĩ ma nthĩ yonthe” makoombanwʼa vamwe kwondũ wa “kaũ wa ũla mũthenya mũnene wa Ngai Mwene Vinya Wʼonthe.” (Ũvuanyʼo 16:14) Kaũ wa Alimaketoni nĩ kaũ wa Ngai wa kũmina makaũ ala angĩ onthe.
Ngai akaũngamya Ũsumbĩ wake, kana silikalĩ yake, vandũ va silikalĩ sya andũ, na Ũsumbĩ ũsu ũkasumbĩka kuma ĩtunĩ na ndũkanangwa nongi. (Ndanieli 2:44) Eka ũu, nũnyuvĩte Mwana wake, Yesũ Klĩsto, ethĩwe Mũsumbĩ wa Ũsumbĩ ũsu. (Isaia 9:6, 7; Mathayo 28:18) Silikalĩ ĩsu nĩyo ũla Ũsumbĩb Yesũ wamanyĩisye aatĩĩi make mavoyae ĩũlũ wawʼo. (Mathayo 6:9, 10) Andũ onthe makeethĩwa me ngwatanĩo masumbĩkĩtwe nĩ silikalĩ ĩmwe ĩũlũ wa nthĩ yonthe, na Yesũ nĩwe ũkethĩwa e Mũtongoi woo.
Kĩvathũkanyʼo na asumbĩ ma andũ, Yesũ ndakatũmĩa ũkũmũ wake kwĩyĩuna we mwene. Na nũndũ we asilaa katĩ na nde kyende, vai mũndũ ũkethĩwa atonya kwona ta ũkũvathũlwa nũndũ wa ũko wake kana mbaĩ yake. (Isaia 11:3, 4) O na ĩngĩ, andũ maikethĩawa na vata wa kũkita maitetea mavata moo. Nĩkĩ tũkwasya ũu? Nũndũ Yesũ akendeeawʼa nĩ kũmanya ũndũ kĩla ũmwe witũ ũendeee. “Akavonokasya mũthĩni yĩla wĩkayaa, na ngya, ĩla ĩte mũtethya. . . . Akoovosya mathayũ moo kuma thĩnanĩ na ũngʼendunĩ.”—Savuli 72:12-14.
Ũsumbĩ wa Ngai ũkavetanga vyũ ĩũlũ wa nthĩ mĩio yonthe myai ya kaũ. (Mika 4:3) O na ĩngĩ, ũkaananga andũ athũku, ala matumaa kwĩthĩwa na kaũ na maũmĩasya ala angĩ. (Savuli 37:9, 10) Kĩla mũndũ, ethĩwe nĩ mũndũũme, mũndũ mũka, kana nĩ kana, akeewʼaa e mũsũvĩĩku o na athi va ĩũlũ wa nthĩ.—Esekieli 34:28.
Andũ makatanĩaa thayũ mũno vyũ me ungu wa silikalĩ ya Ngai. Silikalĩ ĩsu ĩkamina mathĩna ala matumaa andũ mokita, ta ũkya, nzaa, na kwaĩwa nĩ vandũ va kwĩkala. Kĩla ũmwe akeethĩawa atonya kũkwata lĩu mwingĩ na mũseo na akatanĩaa kwĩthĩwa na vandũ vaseo va kwĩkala.—Savuli 72:16; Isaia 65:21-23.
Ũsumbĩnĩ wa Ngai, maũndũ mathũku ala maetawe nĩ kaũ makavetangwa. Maũndũ asu ti o mawũũmĩsye ala mũndũ wakwatie tu, ĩndĩ nĩ vamwe na mathĩna ma kĩlĩko na ma ngoonĩ ala makwataa andũ nũndũ wa kaũ. O na ala makwie makathayũũkwʼa mekale ĩũlũ wa nthĩ. (Isaia 25:8; 26:19; 35:5, 6) Andũ makoonana ĩngĩ na endwa moo ala makwie na mosũanĩo ma maũndũ mathũku ala meekĩkie kaũnĩ maikalilikanwa ĩngĩ nũndũ “maũndũ ma mbee [makeethĩwa me] mavĩtu.”—Ũvuanyʼo 21:4.
NGAI AKAMINA NAĨ VYŨ
Ũsumbĩ wa Ngai ũkatuma andũ methĩwa na ngwatanĩo maithaitha Ngai ũla wa wʼo weka, Yeovac, ũla nĩ “Ngai wa wendo na mũuo.” (2 Akolintho 13:11) Andũ makeemanyĩsya ũndũ matonya kwĩkalanyʼa na mũuo. (Isaia 2:3, 4; 11:9) Na onthe ala maatĩĩaa maũndũ ala memanyĩasya makavetangĩwa naĩ na maũndũ ala ĩetae.—Alomi 8:20, 21.
NGAI AKAMINA SATANI NA NDAIMONI SYAKE
Ũsumbĩ wa Ngai ũkaananga ala maetae kaũ, namo nĩ Satani na ndaimoni syake. (Ũvuanyʼo 20:1-3, 10) Na nũndũ makeethĩwa manavetangwa, “kũkeethĩwa mũuo mwingĩ.”—Savuli 72:7.
No wĩthĩwe ũte na nzika kana watho wa Ngai wa kũmina kaũ na ithokoo ũkeanĩa. E na ũtonyi na wendi wa kũmina kaũ vyũ.
Ngai e na ũĩ na vinya wa kũmina kaũ na ũngʼendu. (Yovu 9:4) Vai kĩndũ ũtatonya kwĩanĩsya.—Yovu 42:2.
Ngai ndendete kwona andũ maithĩna. (Isaia 63:9) O na ĩngĩ, “[nũmenete] ũla wendete ũngʼendu.”—Savuli 11:5.
Mavinda onthe Ngai nĩwĩanĩasya kĩla wathana na ndesa kũneena ũvũngũ.—Isaia 55:10, 11; Tito 1:2.
Ĩvinda yũkite, Ngai akaete mũuo wa wʼo na wa tene na tene.
Ngai akamina kaũ vyũ
a Soma kĩlungu “Kaũ wa Alimaketoni Nĩ Kyaũ?” nthĩnĩ wa jw.org/kam.
b Ĩloele vitio Ũsumbĩ wa Ngai Nĩ Kyaũ? nthĩnĩ wa jw.org/kam.
c Yeova nĩyo ĩsyĩtwa ya Ngai.—Savuli 83:18.