Ũmbanyʼa Ngoo Yaku

Yĩla tũkwĩmanyĩsya Mbivilia, twĩenda maũndũ ala tũkwĩmanyĩsya ĩũlũ wa Yeova makiite ngoo sitũ. Esala nĩ ngelekanyʼo nzeo ũndũnĩ ũsu, nũndũ “[nĩweelekeilye] ngoo yake amanthe mĩao ya Yeova.” (Esa. 7:10) Tũtonya kũatĩĩa ngelekanyʼo yake ata?

Voya. Ũtanambĩĩa kwĩmanyĩsya, voya. Mũkũlye Yeova aũtetheesye ũelewe kĩla ũkwĩmanyĩsya na ũikĩatĩĩa.—Sav. 119:​18, 34.

Ĩthĩwa na wĩnyivyo. Ngai ndavuanĩasya ala me mĩtũlyo na mekwatasya ũĩ woo ene, ũwʼo wake. (Luka 10:21) O na ĩngĩ, ndũkeke ũkunĩkĩli aĩ no kana wendeesye ala angĩ. Na ethĩwa mosũanĩo maku mayosanĩte na ma Ngai, ĩthĩwa na wĩnyivyo na ũimavĩndũa.

Ĩthukĩĩsye mbathi sitũ sya Ũsumbĩ. Mbathi syĩthĩawa na ũtonyi wa kũmbanyʼa ngoo sitũ kwondũ wa ũthaithi. Kwoou wethukĩĩsya wathi wa Ũsumbĩ ũtanambĩĩa kwĩmanyĩsya, kĩu no kĩũtetheesye ũmũsuanĩe Yeova nĩ kana maũndũ ala ũkwĩmanyĩsya makiite ngoo yaku.