ANDŨ MA MŨIKA MAKŨLASYA

Ndonya Kũmanyĩsya Wasya Wakwa wa Ngoo Ata?

Ũtonya kũelekanyʼa wasya wa ngoo na kyaũ katĩ wa syĩndũ ii syĩ vaa ĩtheo?

compass
kĩoo
mũnyanya
mũsili

Kwa wʼo, no tũelekanyʼe wasya wa ngoo na maũndũ asu onthe ana. Kĩlungu kĩĩ nĩkĩkwonanyʼa nĩkĩ.

Wasya wa ngoo nĩ kyaũ?

Wasya wa ngoo nĩ ũtonyi wĩthĩawa nthĩnĩ witũ wa kũtũtetheesya kũmanya kĩla kyaĩle na kĩla kĩtaĩle. Mbivilia ĩmwe yaĩtye wĩthĩawa “ũilye ta mwĩao ũandĩkĩtwe ngoonĩ sya andũ.” (Alomi 2:15, Contemporary English Version) Wasya mũseo wa ngoo nũtumaa tũmanya ethĩwa ũndũ ũla tũkwenda kwĩka kana ũndũ twĩĩ tũnamina kwĩka nĩ mũseo kana nĩ mũthũku.

Wasya waku wa ngoo no ta compass. Nũkũtongoeasya nesa nĩ kana ndũkese kũlika mũisyonĩ.
Wasya waku wa ngoo no ta kĩoo. Ũtumaa ũmanya ũndũ mwĩkalĩle waku ũilye nĩkwĩthĩwa ũkwonasya ũndũ ũilye nthĩnĩ.
Wasya waku wa ngoo no ta mũnyanya. Nũtonya kũũnenga ũtao mũseo, na wawĩthukĩĩsya, ũitetheka mũno.
Wasya waku wa ngoo no ta mũsili. Nũkũtavasya yĩla weeka ũndũ ũtaĩle.

Kamwana ke ndukanĩ ya kũthooa vitio keũsũanĩa nĩ vitio yĩva keũthooa. — Wasya mũseo wa ngoo no ũũtetheesye kwĩka motwi maseo

Ũndũ ũla wa vata: Wasya waku wa ngoo nĩ kĩndũ kya vata mũno nũndũ (1) nũkũtetheeasya kwĩka motwi kwa ũĩ na (2) yĩla weeka mavĩtyo, nũtumaa wĩlila na ũyosa ĩtambya yĩla yaĩle.

Nĩkĩ waĩle kũmanyĩsya wasya waku wa ngoo?

Mbivilia ĩtwĩkĩaa vinya ‘twĩthĩwe na wasya mũseo wa ngoo.’ (1 Vetelo 3:16) Ĩndĩ tũyĩsa kwĩka ũu wasya witũ wa ngoo ũte mũmanyĩsye.

“Ve mavinda nakengaa asyai makwa vala nĩĩ na ndivitha vyũ. Mbeenĩ, wasya wakwa wa ngoo nĩwanthĩnasya, ĩndĩ ĩtina wa ĩvinda, nĩnaekie kwona ũu ta ũndũ.”—Jennifer.

Ĩtina wa ĩvinda, wasya wa ngoo wa Jennifer nĩwamũthĩnisye nginya atavya asyai make kĩla weekaa na watuma aeka vyũ kũmakenga.

Sũanĩa ũndũ ũũ: Nĩ ĩvinda yĩva wasya wa ngoo wa Jennifer waaĩle kũmũlũnga?

“Mũndũ ũla wĩkaa naĩ evithĩte ndesa kwĩthĩwa na mũuo wa kĩlĩko o na vanini. Yĩla wasya waku wa ngoo wakwĩtĩkĩlya kwĩka ũtwi ũmwe mũthũku, wĩthĩawa wĩ ũndũ wĩ laisi kwĩka ũtwi ũngĩ mũthũku.”—Matthew.

Andũ amwe nĩmavũthĩĩasya wasya woo wa ngoo vyũ. Mbivilia yaĩtye kana methĩawa “mate na nthoni o na vanini.” (Aeveso 4:19) O nayo Mbivilia yĩtawa Good News Translation yaĩtye: “Nĩmaekie kwĩwʼa nthoni vyũ.”

Sũanĩa ũndũ ũũ: Kwa wʼo, andũ ala matewʼaa nthoni meeka ũndũ ũtaĩle nĩmaendeeaa nesa? Kĩu kĩmaeteae mathĩna meva?

Ũndũ ũla wa vata: Nĩ kana wĩthĩwe na wasya mũseo wa ngoo, no nginya ‘ũmanyĩsye kĩlĩko kyaku nĩ kana wĩthĩwe ũtonya kũvathũkanyʼa ũseo na ũthũku.’—Aevelania 5:14.

Ũtonya kũmanyĩsya wasya waku wa ngoo ata?

Nĩ kana ũmanyĩsye wasya waku wa ngoo, no nginya wĩthĩwe na myolooto kana kĩndũ kĩngĩ kĩtonya kũũtongoesya. Andũ amwe matongoeawʼa nĩ:

andũ moo ma mũsyĩ na syĩthĩo
anyanya ala mavwʼanene namo
athaũki me nguma

Ĩndĩ Mbivilia nĩyo ĩtonya kũũtongoeasya nesa vyũ kwĩ kĩndũ kĩngĩ o na kĩva. Na ũu ndwaĩle kũtũsengyʼa nũndũ Mbivilia ‘yaveveeiwe nĩ Ngai,’ ũla nĩwe Mũmbi witũ na nĩwĩsĩ nesa kĩla kĩtwaĩle.—2 Timotheo 3:16.

Kwasũanĩa ngelekanyʼo ii:

MWOLOOTO: “Twĩenda kwĩthĩwa twĩ aĩkĩĩku maũndũnĩ onthe.”—Aevelania 13:18.

Mwolooto ũsu ũtonya kũũtetheesya ata yĩla watatĩka ũkengane mũtianinĩ, ũkenge asyai maku, kana ũye?
Ethĩwa wasya waku wa ngoo nũkwĩkĩaa vinya wĩthĩwe wĩ mũĩkĩĩku maũndũnĩ onthe, wĩsũanĩa ũndũ ũsu ũtonya kũũtethya ata ũmũnthĩ na ĩvinda yĩla yũkĩte?

MWOLOOTO: “Kĩai ũlaalai!”—1 Akolintho 6:18.

Mwolooto ũsu ũtonya kũũtetheesya ata yĩla watatĩka wĩke ũlaalai kana wĩloele mavisa mathũku ma ũlaalai?
Ethĩwa wasya waku wa ngoo nũkwĩaa ũkĩe ũlaalai, wĩsũanĩa ũndũ ũsu ũtonya kũũtethya ata ũmũnthĩ na ĩvinda yĩla yũkĩte?

MWOLOOTO: “Ĩwʼanĩai tei na ĩnee, na mũiekeanĩa . . . na ngenda.”—Aeveso 4:32.

Mwolooto ũsu ũtonya kũũtetheesya ata yĩla waemanwa na kamwana kana kelĩtu mũsyaanĩwʼe kana mũnyanyau?
Ethĩwa wasya waku wa ngoo nũkwĩaa wĩwʼĩe angĩ tei na ũimaekea, wĩsũanĩa ũndũ ũsu ũtonya kũũtethya ata ũmũnthĩ na ĩvinda yĩla yũkĩte?

MWOLOOTO: ‘Yeova nũmenete ũla wendete ũngʼendu.’—Savuli 11:5.

Mwolooto ũsu ũtonya kũũtethya ala yĩla ũũnyuva sinema na ivĩndĩ sya televiseni ila ũkwĩloela, kana mathaũ ma vitio ala ũũthaũka?
Ethĩwa wasya waku wa ngoo nũkũvataa kwĩtanĩthya na maũndũ ma ũngʼendu, wĩsũanĩa ũndũ ũsu ũtonya kũũtethya ata ũmũnthĩ na ĩvinda yĩla yũkĩte?

NGEWA YA WʼO: “Ve ĩvinda anyanyawa mathaũkaa mathaũ ma vitio me na ũngʼendu, na ũu watumie o nakwa nambĩĩa kũmathaũka. Ĩndĩ yĩla Tata wamanyie, ambĩie ndikaamathaũke ĩngĩ. Kwoou, namathaũkaa o yĩla nathi kũkethya anyanyawa. Ĩndĩ nasyoka, ndyatavasya asyai makwa kĩla nĩkie. Tata nĩwamanyaa kana ve vandũ ve thĩna, ĩndĩ angũlya, namwĩaa nĩ o sawa. O tũendeangĩe, nĩnasomie ĩandĩko ya Savuli 11:5, na ũu watuma nambĩĩa kũthĩnĩka nũndũ wa maũndũ ala neekaa. Nĩnamanyie kana nĩnaĩle kũeka kũthaũka mathaũ asu vyũ. Na kwa wʼo, ĩvindanĩ yĩĩ, nĩneekie ũu. Na yĩla mũnyanyawa ũmwe woonie ũu, o nake nĩwaekie kũthaũka mathaũ asu.”—Jeremy.

Sũanĩa ũndũ ũũ: Nĩ ĩndĩĩ wasya wa ngoo wa Jeremy wambĩĩie kũthũkũma, na nĩ ĩndĩĩ we wambĩĩie kũwĩthukĩĩsya? Nĩ kyaũ ũkwĩmanyĩsya ngewanĩ ya Jeremy?

Ũndũ ũla wa vata: Wasya waku wa ngoo nĩwonanasya we wĩ mũndũ ũilye ata na ũatĩĩaa myolooto yĩva. Wʼo wasya waku wa ngoo wonanasya kyaũ ĩũlũ waku?

Kĩla andũ angĩ ma mũika maasya

“O na ethĩwa wasya waku wa ngoo nũvathũkanasya ũseo na ũthũku, ũu ti kwasya kana kĩla ĩvinda ũkeekaa kĩla kyaĩle. O na ethĩwa compass nĩkũthũkũma nesa na nĩkũkwonyʼa nesa vala waĩle kwĩsĩla, no nginya we mwene ũtwʼe nũũmĩatĩĩa kana ndwĩmĩatĩĩa.”—Alexis.

“Wasya wa ngoo ti wiio ũkũsiĩĩe. Ĩndĩ nĩ nzĩa ĩkũtwaaa vala ũkwenda kũthi. Wasya wa ngoo wĩthĩawa ũtonya ũkũsũvĩa ndũkalike mĩisyonĩ.”—Lionel.

“Nĩnĩmanyĩĩtye kũlea kwĩka motwi nĩtongoewʼe nĩ wasya wa ngoo wa andũ angĩ. Nĩnĩmanyĩĩtye wasya wakwa wa ngoo, kwoou yĩla neewʼa wandavya kaũndũ ndikavũthĩĩasya. Ndilekeleelasya kĩla nĩsĩ nĩ kĩseo nĩ kana nĩtĩkĩlwe nĩ mũndũ ũngĩ.”—Isabella.