Myolooto ya Mbivilia Ĩla Ĩkonetye Ũseo na Ũthũku Nĩ ya Vata Ũmũnthĩ?

Andũ aingĩ, o na amwe ala maasya kana mo nĩ Aklĩsto, monaa myolooto ya Mbivilia ĩla ĩkonetye kũmanyana kĩ-mwĩĩ na mũtwaano yavĩtiwe nĩ ĩvinda. Nĩ kana mekale kwosana na ũndũ maũndũ mailye ũmũnthĩ, makanisa amwe nĩmavĩndũĩte kĩla mamanyĩasya ĩũlũ wa mwĩkalĩle mũseo kana mũthũku. Myolooto ya mbivilia ĩla ĩkonetye ũseo na ũthũku nĩ ya vata ũmũnthĩ? Ĩĩ. Kĩlungu kĩĩ nĩkĩeleetye nĩkĩ tũkwasya ũu.

Andũ nĩmaĩle kũtongoewʼa nĩ myolooto ya Ngai ĩla ĩkonetye ũseo na ũthũku

Andũ moombiwe mamwĩkwatasye Mũmbi woo nĩ kana amatongoesye. Mbivilia yaĩtye atĩĩ: “Kũtongoesya matambya make kũti nthĩnĩ wa mũndũ ũla ũendaa.” (Yelemia 10:23) O na kũtwʼĩka Yeovaa Ngai atũmbie twĩ na ũtonyi wĩana ũna wa kwĩyĩkĩa motwi, ndaatũnenga ũkũmũ kana ũtonyi wa kwĩtwʼĩĩa kĩla kĩseo na kĩla kĩthũku. Nũndũ wa ũu, endaa tũmwĩkwatye.—Nthimo 3:5.

Myolooto ya Ngai ĩla ĩkonetye mwĩkalĩle ĩkwatĩkanaa Mbivilianĩ. Kwasũanĩa itumi ilĩ ila syonanĩtye nĩkĩ myolooto ĩsu nĩ ya vata mũno.

• Ngai nĩwe watũmbie. (Savuli 100:3) Nĩkwĩthĩwa Yeova Ngai nĩwe Mũmbi waitũ, nĩwĩsĩ nesa kĩla kĩtonya kũtuma twĩkala twĩ na ũima wa mwĩĩ, twĩ atanu, na twĩ na kĩlĩko kĩseo. O na ĩngĩ, nĩwĩthĩawa esĩ kĩla kĩtonya kũtũkwata twavũthĩĩsya myolooto yake ya mwĩkalĩle. (Akalatia 6:7) O na ũu wĩ o vo, Yeova endaa twĩkale nesa ũndũ vatonyeka. Kwondũ wa ũu, Mbivilia yaĩtye kana Ngai nĩwe “ũla ũkũmanyĩasya kwaĩla, ũla ũkũtongoeasya nzĩanĩ ĩla waĩle kũthi nayo.”—Isaia 48:17.

• Mawendi maitũ no matwasye. Andũ aingĩ masũanĩaa kana no mamanye kĩla kĩseo kana kĩla kĩthũku kwa kũatĩĩa ngoo syoo, kana mawendi moo. Ĩndĩ, Mbivilia yaĩtye kana “ngoo nĩ ngengani kũvĩtũka syĩndũ syonthe, na nĩ nthũku ki.” (Yelemia 17:9) Ngoo yitũ yalea kũtongoewʼa nĩ ũĩ wa Ngai, ĩkatuma twĩka ũndũ na ĩtina tũyĩsa kwĩlila.—Nthimo 28:26; Mũtavanʼya 10:2.

Mo atongoi ma ndĩni nĩmaĩlĩte kũvũthĩĩsya kĩla Mbivilia yaĩtye nĩ kĩseo kana nĩ kĩthũku?

Aiee! Mbivilia ĩmanyĩasya ũwʼo ĩũlũ wa Ngai na mwĩkalĩle ũla wendaa andũ methĩwe nawʼo. (1 Akolintho 6:9-11; Akalatia 5:19-23) Nĩwendaa andũ mamanye ũwʼo ũsu. (1 Timotheo 2:3, 4) Kwoou, no nginya atavanyʼa mamanyĩsye kĩla kĩ Ndetonĩ ya Ngai.—Tito 1:7-9.

Andũ aingĩ ala matendaa kũatĩĩaa myolooto ya Mbivilia ĩũlũ wa mwĩkalĩle, mamanthaa atongoi ma ndĩni ala “[meũmatavya] kĩla mekwenda kwĩwʼa.” (2 Timotheo 4:3, maelesyo ma kwongeleela) Ĩndĩ, Ndeto ya Ngai ĩnenganĩte ũkanyʼo ũũ: “Woo nĩ wa ala metaa ũthũku ũseo, na ũseo ũthũku.” (Isaia 5:20) Vate nzika, Ngai akasilĩla atongoi ma ndĩni ala matamanyĩasya andũ ũwʼo ĩũlũ wa kĩla waĩtye nĩ kĩseo kana nĩ kĩthũku.

Yo myolooto ya Mbivilia ĩũlũ wa mwĩkalĩle nĩyĩkĩaa andũ vinya masilĩle ala angĩ?

Aiee. Ala mendaa kũmwendeesya Ngai nĩmaatĩĩaa ngelekanyʼo ya Yesũ Klĩsto na momanyĩsyo make. Amanyĩisye aatĩĩi make kana mayaĩle kũsilĩla ala angĩ, ĩndĩ vandũ va ũu maĩle kwonyʼa onthe wendo na ndaĩa.—Mathayo 5:43, 44; 7:1.

Ala mamũatĩĩaa Yesũ nĩmaĩle kũlũmanyʼa na myolooto ya Ngai ya mwĩkalĩle thayũnĩ woo. O na vailye ũu, nĩmaĩle kũmanya kana andũ ala angĩ no manyuve kũatĩĩa myolooto yĩ kĩvathũkanyʼo. (Mathayo 10:14) Yesũ ndaanenga amanyĩwʼa make ũkũmũ wa kũtũmĩa siasa kana nzĩa ingĩ kũlasimĩthya ala angĩ maatĩĩe myolooto ya Ngai.—Yoana 17:14, 16; 18:36.

Nĩ moathimo amwe meva tũkwataa twaatĩĩa myolooto ya Mbivilia ya mwĩkalĩle?

Ala mekĩaa kĩthito maatĩĩe myolooto ya Ngai ĩla ĩkonetye ũseo na ũthũku makatanĩa moathimo ĩvindanĩ yĩĩ na ĩvindanĩ yũkĩte. (Savuli 19:8, 11) Moathimo asu nĩ:

• Kwĩthĩwa na ũtanu mwingĩ.—Nthimo 29:6.

• Kwĩthĩwa na ngwatanĩo nzeo na Ngai.—Nthimo 3:32.

• Kũtetheewʼa nĩ Ngai yĩla twakwatwa nĩ mathĩna.—Nthimo 11:8.

• Kwĩthĩwa na wĩkwatyo wa kwĩkala tene na tene ĩũlũ wa nthĩ.—Savuli 37:29.