ENDEEAI KŨSYAĨĨSYA!

Mbivilia Yaĩtye Ata Ĩũlũ wa Ũaani wa Mavuti Ũla Ũendeee Ĩũlũ wa Nthĩ Yonthe?

WEEKIWE MOALYŨKU: Matukũ 27, Mwei wa 4, 2023

Ũaani wa mavuti ũendeee kũtuma andũ aingĩ ĩũlũ wa nthĩ makwata wasyo. Kwasũanĩa ngelekanyʼo imwe sya mĩtũkĩ.

“Amelika nĩyo yĩthĩawa na andũ ala aingĩ moaawa kĩla mwaka. Vakuvĩ kĩla kyumwa mũndũ ũmwe nĩwũaawa.”—Matukũ 21, Mwei wa 4, 2023, The Guardian.
“Andũ ĩkũmi ma mũsyĩ ũmwe, aka mũonza na kamwana ka myaka 13, nĩmanooaiwe yĩla kũnaĩ ũathangani wa isasi nyũmbanĩ ĩmwe South Africa.”—Matukũ 21, Mwei wa 4, 2023, AP News.
“Mũndũũme ũmwe ũnaĩ na ĩvuti nthĩ ya Germany nũnooaie andũ thanthatũ nyũmbanĩ ĩmwe ya ũthaithi ya Ngũsĩ sya Yeova ĩla yĩ Hamburg, na ĩtina eeyũaa.”—Matukũ 10, Mwei wa 3, 2023, Reuters.

Mbivilia nĩnenganae ũkiakisyo kwa ala maendeee kũthĩna nũndũ wa maũndũ mathũku ta asu. Wenda kwona ngelekanyʼo, ĩloele vitio DeJanerio Brown: Nĩwatũlĩkĩte Ngoo Ĩndĩ Oosa Vinya.

O na ĩngĩ Mbivilia nĩtũtetheeasya kũmanya nĩkĩ maũndũ ta asu mathũku mekĩkaa. Ambĩĩa kwĩmanyĩsya ĩũlũ wa ũndũ ũsu kwa kwĩloela vitio Nĩkĩ Ngai Ũekete Mathĩna Methĩwe Kwʼo?

Mweinĩ wa 7, 2022, syĩko nthũku sya ũaani wa mavuti nineekĩkie nthĩ yonthe:

“Kũawa kwa mũndũũme ũmwe wĩtawa Shinzo Abe, ũla ũnaĩ nguma maũndũnĩ ma siasa na waĩ mũnene silikalĩnĩ nthĩ ya Japan, nĩkũnatelemilye nthĩ yonthe, na kĩtumi nũndũ nthĩ ĩsu ndĩ ũngʼendu mwingĩ na yĩthĩawa na mĩao mĩlũmu ĩũlũ wa kũtũmĩa mavuti.”—Matukũ 10, Mwei wa 7, 2022, ĩkaseti ya maũvoo ya The Japan Times.
“Nthĩ ya Denmark nĩtelemete mũno ĩtina wa mũndũũme ũmwe ũnaĩ na ĩvuti, kũaa andũ atatũ ndukanĩ nene ya kũthooa syĩndũ taoninĩ nene ya Copenhagen.”—Matukũ 4, Mwei wa 7, 2022, Reuters.
“Nthĩ ya South Africa: Andũ 15 nĩmooaiwe ĩtina wa aũme amwe kwambĩĩa kũathanga andũ na isasi kĩlavunĩ kĩmwe taoninĩ ya Soweto.”—Matukũ 10, Mwei wa 7, 2022, ĩkaseti ya maũvoo ya The Guardian.
“Andũ mbee wa 220 nĩmanooaiwe kwa kũathangwa na isasi nũndũ wa ũngʼendu ũla ũneekĩkie wikendi ya sikũkũ ya Matukũ 4, Mwei wa 7, nthĩ ya Amelika.”—Matukũ 5, Mwei wa 7, 2022, CBS News.

Wʼo ũngʼendu ta ũsu ũkathela? Mbivilia yaĩtye ata?

Ũngʼendu Ũkathela

Mbivilia yaĩtye kana tũtwĩe “mĩthenyanĩ ya mũminũkĩlyo,” ĩvindanĩ yĩla andũ maĩ methĩwe me ai, me ngũlũ, na me angʼendu mũno. (2 Timotheo 3:1, 3) Syĩko sya ũngʼendu ta isu itumaa andũ mekala na wia. (Luka 21:11) Ĩndĩ o na vailye ũu, Mbivilia yathanĩte kana ve ĩvinda ũngʼendu ũkathela na andũ “makatũaa ũtũonĩ wĩ mũuo, na mawĩkalonĩ mate na mũisyo, na kũndũnĩ kũuu kwa kũthũmũa.” (Isaia 32:18) Ũngʼendu ũkathela ata?

Ngai akavetanga andũ athũku na ayananga mĩio yonthe ya kaũ.

“Ĩndĩ ala athũku makavetwa kuma ĩ nthĩ.”—Nthimo 2:22.
“[Ngai] nũtumaa makaũ mathela kũvika kĩtulu kya nthĩ; nũtũlaa ũta, na ĩtumo aitilanga ilungu; makasya ma kaũ nũvĩvasya na mwaki.”—Savuli 46:9.

Ngai akamina vyũ kĩla kĩtumaa kwĩthĩwa na syĩko sya ũngʼendu kwa kũmanyĩsya andũ kwĩkalaa na mũuo.

“Kũtikewʼanĩthwʼa woo kana kwanangana kĩĩmanĩ kyakwa kyonthe kĩtheu; nũndũ nthĩ ĩkausũwʼa nĩ kũmũmanya Yeova, o tondũ manzĩ mekunĩkĩlye ũkanga.”—Isaia 11:9.
O na ũmũnthĩ, Ngai nũmanyĩasya andũ ĩũlũ wa nthĩ maleane na ũngʼendu na kũtũmĩa mĩio ya kaũ, na “[maitusya] mbyũ syoo itwʼĩke mĩthya ya maembe ma ngʼombe, na matumo moo tũvyũ twĩ ngoto twa ũsea.”—Mika 4:3.

Nĩ kana wĩmanyĩsye maũndũ maingangĩ ĩũlũ wa mawatho ala me Mbivilianĩ ma ĩvinda yĩla andũ makekala ĩũlũ wa nthĩ mate na wia, soma kĩlungu kyaĩtye “Je, Inawezekana Kuishi Bila Woga?”

Nĩ kana wĩmanyĩsye mũnango ĩũlũ wa kĩla kĩkamina ũngʼendu vyũ, soma kĩlungu kyaĩtye “Hatimaye Amani Duniani!”