Ngũsĩ sya Yeova Nĩsyooaiwe Ũla Ũaaninĩ Mũnene—Mbivilia Ĩmanyĩasya Ata?

Matukũ 27, Mwei wa 1, 2023, andũ aingĩ makalilikana Mũthenya wa Kũlilikana Andũ Ala Mooaiwe Nĩ Silikalĩ ya Nazi. Maũndũ mathũku mũno ala meethĩiwe mbee wa myaka 75 mĩvĩtu no matume wĩkũlya nĩkĩ Ngai weetĩkĩlilye ũndũ wa mũthemba ta ũsu wĩkĩke.

• Nĩ kana ũmanye ũndũ Mbivilia yaĩtye, soma kĩlungu kĩ na kyongo “Nĩkĩ Ayuti Aingĩ Mooaiwe Ĩvinda ya Hitler? Nĩkĩ Ngai Ũtaasiĩĩa Ũaani Ũsu?”

Ayuti nĩmathĩniwʼe mũno vyũ ũaaninĩ ũsu. Ayuti milioni mbingĩ nĩmooaiwe, na ala mamoaa nĩmavangĩte nesa ũndũ mekwĩka ũu. O na andũ ma ikundi ingĩ sya andũ nĩmathĩnawʼa na makoawa ĩvindanĩ ya ũaani ũsu mũnene. Amwe ma ikundi isu nĩ Ngũsĩ sya Yeova, ila syathĩniwʼe mũno nũndũ wa kũatĩĩa kĩla Mbivilia ĩmanyĩasya.

• Nĩ kana wĩmanyĩsye maũndũ maingangĩ, soma kĩlungu kĩ na kyongo “Nĩ Kyaũ Kyakwatie Ngũsĩ sya Yeova Ĩvindanĩ ya Ũla Ũaani Mũnene?”

”Kũmũnenga Wĩkwatyo”

Andũ aingĩ nĩmakĩaa mayona ũndũ mũthũku ta ũla Ũaani Mũnene nũtonya kumĩla ĩngĩ. Ĩndĩ nĩtũtanaa nũndũ Mbivilia yaĩtye kana ĩvinda yũkĩte maũndũ mathũku ta asu maikethĩwa vo ĩngĩ.

• “Nũndũ nĩnĩsĩ mosũanĩo ala nĩsũanĩaa kwondũ wenyu, easya Yeova, mosũanĩo ma mũuo, na ti ma ũthũku, kũmũnenga wĩkwatyo mũminũkĩlyo wenyu.”—Yelemia 29:11.a

Ũu ũkeanĩwa yĩla Yeova Ngai ũkosa ĩtambya ya kũmina ũthũku na aivetanga maũndũ onthe ala maetetwe nĩ ũthũku ũsu. O mĩtũkĩ:

• Akavetanga athũku ala maũmĩasya ala angĩ.—Nthimo 2:22.

• Akavosya ala awau.—Ũvuanyʼo 21:4.

• Akathayũũkya akwʼũ na aimanenga thayũ ĩngĩ ĩũlũ wa nthĩ.—Yoana 5:28, 29.

No ũĩkĩĩe wĩkwatyo wa kũkiakĩsya ũla Mbivilia ĩnenganĩte. Nĩ kana ũmanye nĩkĩ, nĩtũũkũthokya ũtate mũvango witũ wa kwĩmanyĩsya Mbivilia na mwalimũ vate ndĩvi.