Nĩkĩ Andũ Matesa Kũete Mũuo Ĩũlũ wa Nthĩ?—Mbivilia Yaĩtye Ata?

Atongoi ma nthĩ na ngwatanĩo syĩ kĩvathũkanyʼo nĩsiemetwe nĩ kũete mũuo ĩũlũ wa nthĩ. Ũmũnthĩ kwĩ ithokoo mbingĩ kwĩ ĩvinda yĩngĩ o na yĩva kuma yĩla kwaĩ Kaũ wa Kelĩ wa Nthĩ Yonthe. Andũ ta mbilioni ilĩ, ala nĩ kĩlungu kya 25 ĩũlũ wa 100 kya andũ onthe ĩũlũ wa nthĩ, mekalaa isioni syĩ na ithokoo ta isu.

Nĩkĩ andũ matesa kũete mũuo? Mbivilia yaĩtye ata?

Itumi itatũ syonanĩtye nĩkĩ andũ matesa kũete mũuo ĩũlũ wa nthĩ

1. 1. Andũ methĩawa na mĩtuo ĩtumaa o na matatata kũmantha mũuo. Mbivilia yathanie kana ĩvindanĩ yĩĩ yitũ andũ “makeethĩwa makĩyenda ene, makyenda mbesa, me na mĩyono, me na mĩngʼathĩlĩĩlyo,  . . . mate aĩkĩĩku, . . . mate na wĩwʼano, . . . matesiĩĩaa, ai, . . . me na ngũlũ, me na mĩtũlyo.”—2 Timotheo 3:2-4.

2. 2. Andũ me kĩkundi, kana mũndũ ũmwe ũmwe, mai na ũtonyi wa kwĩminĩa mathĩna matatetheewʼe nĩ Mũmbi woo, Yeovaa Ngai. Mbivilia yonanĩtye kana “kũtongoesya matambya make kũti nthĩnĩ wa mũndũ ũla ũendaa.”—Yelemia 10:23.

3. 3. Nthĩ ĩtongoewʼe nĩ mũtongoi mũthũku na wĩ vinya, Satani ũla Ndevili, ũla “ũkengaa nthĩ yonthe.” (Ũvuanyʼo 12:9) Nũndũ yu tũĩ “nthĩ yonthe yĩ ungu wa vinya wa ũla mũthũku,” kwĩendeea kwĩthĩwa na kaũ na ithokoo.—1 Yoana 5:19.

Nũũ ũtonya kũete mũuo?

Mbivilia ĩtũĩkĩĩthĩtye kana Ngai nowe ũkaete mũuo, ĩndĩ ti kĩthito kya andũ.

• “Nũndũ nĩnĩsĩ mosũanĩo ala nĩsũanĩaa kwondũ wenyu, easya Yeova, mosũanĩo ma mũuo, na ti ma ũthũku, kũmũnenga wĩkwatyo mũminũkĩlyo wenyu”—Yelemia 29:11.

Ngai akeanĩsya watho ũsu ata? ‘Ngai, ũla ũnenganae mũuo akamũtumbanga Satani.ʼ (Alomi 16:20) Ngai akatũmĩa silikalĩ yake ya ĩtunĩ, ĩla yĩtĩtwe Mbivilianĩ “Ũsumbĩ wa Ngai,” kũete mũuo ĩũlũ wa nthĩ. (Luka 4:43) Yĩla Yesũ Klĩsto, ũla nĩwe Mũsumbĩ wa Ũsumbĩ ũsu ũkasumbĩka, andũ makamanyĩwʼa kwĩkalaa na mũuo.—Isaia 9:6, 7.

• Nĩ kana ũmanye maũndũ maingangĩ, soma kĩlungu kĩna kyongo, “Ũsumbĩ wa Ngai Ũkeanĩsya Kyaũ?”