No Wĩthĩwe na Wĩkwatyo Mwakanĩ wa 2024—Mbivilia Yaĩtye Ata?

Andũ aingĩ meona kana vaiĩ ũndũ ũtonya kwĩkwa ũkasiĩĩa mathĩna ala matonya kũkwata andũ mwakanĩ ũũ wa 2024. Ĩndĩ o na vailye ũũ, no twĩthĩwe na wĩkwatyo wa ĩvinda yũkĩte. Tũtonya kũkwata wĩkwatyo ũsu va?

Mbivilia nĩnenganae wĩkwatyo

Mbivilia yathanĩte kana Ngai akamina mathĩna ala ũmũnthĩ matumaa twona ta tũte na wĩkwatyo o na ũmwe. O mĩtũkĩ, Ngai “akavangũla methoi onthe methonĩ [maitũ], na kĩkwʼũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo.”—Ũvuanyʼo 21:4.

• Nĩ kana wĩmanyĩsye mũnango ĩũlũ wa mawatho ma Mbivilia ma ĩvinda yũkĩte, soma kĩlungu, “Tumaini Bora la Wakati Ujao.”

Ũndũ Mbivilia ĩtonya kũũtethya ũmũnthĩ

Mbivilia nĩnenganĩte wĩkwatyo wa ĩvinda yũkĩte ũla ũtonya kũũtetheesya kũũkitana na mesilya mataĩle na ũyĩthĩwa na woni waĩle. (Alomi 15:13) O na ĩngĩ, ũtao ũla Mbivilia ĩnenganae nũtonya kũũtetheesya kũmĩanĩsya na mathĩna ala ũtonya kũkomana namo ta ũkya, ũsili ũte wa katĩ, na kũwaa.

• Sisya wone ũndũ wĩkwatyo ũla Mbivilia ĩnenganĩte watetheeisye mũndũũme ũmwe akwata mũuo na ũtanu, o na kau eanĩie mũsyĩnĩ wĩ ũkya mwingĩ. Ĩloele vitio, Juan Pablo Zermeño: Yeova Nũtumĩte Nĩthĩwa Nĩ Mwĩanĩe.

• Sisya wone ũndũ Mbivilia ĩtonya kũũtetheesya yĩla ũkwĩyĩandũa, wĩ na ũthatu ngoonĩ, wĩmakĩe, na yĩla wakwʼĩĩwa nĩ mũndũ wendete. Soma kĩlungu, “No Nĩkwate Mbivilianĩ Mĩsoa Ĩtonya Kũngiakisya?”

• Sisya wone ũndũ mũndũ mũka ũmwe waĩ itanĩ sya kaũ, ũla weeyonaa ta “mũndũ mũthũku na ũtathĩnĩkĩaa ala angĩ,” watetheeiwʼe nĩ Mbivilia eethĩwa na wĩkwatyo. Ĩloele vitio, Niliweka Bunduki Yangu Chini.

Mwaka wa 2024 no wĩthĩwe wĩ mũseo kwaku na andũ maku ma mũsyĩ. Ĩmanyĩsye mũnango ũmanye ũndũ Mbivilia ĩtonya kũũtetheesya. Tata mũvango witũ wa kwĩmanyĩsya Mbivilia na mwalimũ vate ndĩvi. Ĩmanyĩsye ũndũ Ngai ũtonya kũũnenga “mosũanĩo ma mũuo” ĩvindanĩ yĩĩ, o na “wĩkwatyo” wa ĩvinda yũkĩte.—Yelemia 29:11.