Syo Ngũsĩ sya Yeova Itũmĩaa Mĩvothi Ata?
Tũtũmĩaa mĩvothi kũtwaĩĩsya ũthaithi witũ na kumya ũtethyo. Ũthaithi witũ vamwe na kumya ũtethyo nĩ kĩlungu kĩmwe kya wĩa witũ ũla mũnene, nawʼo nĩ kũtetheesya andũ matwʼĩke amanyĩwʼa ma Klĩsto Yesũ.—Mathayo 28:19, 20.
Tũitũmĩaa mĩvothi kwĩthusya. Ala matongoeasya ũthaithinĩ witũ mayĩĩvawa, na vai Ngũsĩ ya Yeova o na ĩmwe ĩĩvawa yathi kũtavanyʼa nyũmba kwa nyũmba. Ala mathũkũmaa movisinĩ maitũ ma ũvonge na ovisinĩ ũla mũnene, vamwe na ala me Nzamanĩ Ĩla Ĩtongoesye, nĩ andũ mekĩte kwĩyumya na mayĩĩvawa.
Maũndũ Amwe Twĩkaa
Kũtumbĩthya: Kĩla mwaka, ve syĩndũ milioni mbingĩ tũalyũlaa, tũkatumbĩthya, na tũkaitwaa vala ikwendeka, vate ndĩvi. Syĩndũ isu nĩ Mbivilia na mavuku angĩ maeleetye Mbivilia. O ta ũu, andũ no makwate mavuku ala twĩkĩaa kĩsesenĩ kya jw.org na JW Library app mate kũĩva kĩndũ. O na tũitũmĩaa kĩsese kĩu na app ĩsu kũtangaasĩthya mavuku maitũ tũkwate mbesa.
Kwaka na Kũtũngĩĩa Nyũmba sya Ũthaithi: Kũndũ kwingĩ ĩũlũ wa nthĩ nĩtwakĩte nyũmba sya ũthaithi, na nĩtũisũvĩaa nĩ kana ikundi sitũ syĩthĩwe na vandũ vaseo va kũmbanĩaa na kũmũtaĩa Ngai. Na ũu nowʼo twĩkanaa na movisi maitũ ma ũvonge na movisi ma ũalyũli. Wĩa ũla mwingĩ ũtethawʼa nĩ athũkũmi ma kwĩyumya, na ũu ũtumaa ngalama ĩoleka mũno.
Kũũngamĩa Wĩa Witũ: Mĩvothi ĩla yumawʼa kwondũ wa wĩa wa nthĩ yonthe nĩyo ĩtũmĩawa kũtethya wĩa ovisinĩ ũla mũnene, movisinĩ maitũ ma ũvonge, na movisinĩ ma ũalyũli, o vamwe na wĩa ũla ũtethawʼa nĩ asyaĩĩsya ma kũthyũlũlũka.
Kũtavanyʼa: Ngũsĩ iyĩĩvawa nĩ kana itavanyʼe ũvoo mũseo kana imanyĩsye andũ “ndeto ya Ngai.” (2 Akolintho 2:17) Ĩndĩ o tondũ kwailye ĩvindanĩ ya atũmwa, atavanyʼa amwe anyuve na amanyĩsye nĩmeyumasya kũtũmĩaa ĩvinda yingĩ maitavanyʼa, na nũndũ wa ũu, nĩmatetheeawʼa kũkwata vandũ va kwĩkala na syĩndũ ila ingĩ sya vata.—Avilivi 4:16, 17; 1 Timotheo 5:17, 18.
Kũmanyĩsya: Tũtũmĩaa mĩvothi ĩla yumawʼa kũũngamĩa ngalama sya maũmbano maitũ manene. O na mĩvothi ĩsu nĩyo ĩtumaa tũkwata syĩndũ sya kwĩthukĩĩsya ineeneete Mbivilia vamwe na vitio. Kwongela kĩu, nĩtwĩthĩawa na sukulu sya kũmanyĩsya atumĩa na ala meyumĩtye mathũkũme ĩvinda yonthe, nĩ kana methĩwe matonya kwĩanĩsya nesa wĩa woo.
Wĩa wa Kumya Ũtethyo: Yĩla andũ makwatwa nĩ mĩisyo nũndũ wa maũndũ ta ithingitho sya nthĩ kana makaũ, nĩtũmanengae lĩu, kĩwʼũ, na tũimakĩa nyũmba. Tũyumasya ũtethyo kwondũ wa “ana-a-asa maitũ nthĩnĩ wa mũĩkĩĩo” me oka, ĩndĩ nĩtũtethasya o na ala mate Ngũsĩ.—Akalatia 6:10.