Yo Mbivilia Ĩwetaa Maũndũ ma Wʼo Ĩũlũ wa Thayũ wa Yesũ?

Ũndũ Mbivilia yaasya

Mũandĩki wa Mbivilia weetawa Luka aisye ũũ ĩũlũ wa maũndũ ala waandĩkie ĩũlũ wa thayũ wa Yesũ: ‘Nĩnĩĩkuũĩte nesa vala maũndũ asu onthe maumie’—Luka 1:3.

Andũ amwe maasya kana maũndũ ala maandĩkiwe ĩũlũ wa Yesũ ĩvukunĩ ya Mathayo, Maliko, Luka, na Yoana nĩmavĩndũiwe myakanĩ ya 300.

Ĩndĩ ve kĩlungu kĩmwe kya ĩvuku ya Yoana kyakwatĩkanie nthĩ ya Egypt myakanĩ ya 1900 ĩyambĩĩa. Kĩlungu kĩu yu kĩsĩkĩe ta Papyrus Ryland na kiĩtwe nyũmbanĩ ĩmwe yĩtawa John Rylands Library, Manchester, England. Kĩlungu kĩu kĩ na ndeto sya Yoana 18:31-33, 37, 38 o ila syĩ Mbivilianĩ ĩla twĩ nayo ũmũnthĩ.

Kĩlungu kĩu nĩkyo kya tene vyũ kyaakwatĩkana kya Maandĩko ma Kĩkiliki ma Kĩklĩsto. Asomi aingĩ maĩkĩĩaa kana kyaandĩkiwe mwakanĩ wa 125 ĩtina wa Yesũ kũsyawa, o myaka ta 25 ĩtina wa ĩvuku ya Yoana kũandĩkwa. Ndeto ila syĩ kĩlungunĩ kĩu kyakwatĩkanie nĩsyosanĩte kwa vakuvĩ na ndeto sya mĩsoa ĩsu, ila itũmĩĩtwe mathangũnĩ ma mĩtũkĩ.