Ndonya Kwĩka Ata Nĩ Kana Andũ Maikanthĩnyʼe Mayenda Kũkoma Nakwa?
Ũndũ Mbivilia yaasya
Kwasũanĩa maũndũ aa ũtonya kwĩka ala maumanĩte na ũĩ ũla wĩ Mbivilianĩ:
Ndũkethĩwe na ũnyanya ũvĩtũkĩte. Ĩthĩwa wĩ mũseo na ũinenga ndaĩa ala ũthũkũmaa namo ĩndĩ ndũkatate kwĩthĩwa na ũnyanya ũtonya kũtuma angĩ masũanĩa no wĩtĩkĩle kũkoma namo.—Mathayo 10:16; Akolosai 4:6.
Ĩkĩa ngũa nesa. Kwĩkĩa ngũa syĩkwonanyʼa mwĩĩ waku no kũtume andũ maũsũanĩa naĩ. Mbivilia yaĩtye twĩthĩwe na “kĩlĩko kya kwĩkĩa ngũa nesa.”—1 Timotheo 2:9, The Holy Bible in Current Kikamba Language.
Nyuva anyanyau nesa. Watindanyʼa na ala metĩkĩlaa kũthaukĩwa nĩ andũ mayenda kũkoma namo, ĩthĩwa wĩsĩ kana nĩ ũndũ ũtonyeka mũno o naku wĩkwe oou.—Nthimo 13:20.
Ndũketĩkĩle kwĩthukĩĩsya ũneeni ũtaĩlĩte. Ndũkethukĩĩsye andũ maambĩĩa kũea ngewa sya maũndũ me “nthoni, o na kũneena na ũtumanu, kana kũvũa ngũĩ.”—Aeveso 5:4.
Ndũketĩkĩle maũndũ matonya kũtuma ũlika thĩnanĩ. Kwa ngelekanyʼo, ndũketĩkĩle weewa nĩ mũndũ ũtiwe wĩanĩ masaa mate ma wĩa vate kĩtumi kĩseo.—Nthimo 22:3.
Ĩthĩwa wĩ mũlũmu na ũyĩelesya maũndũ ũtheinĩ. Ethĩwa mũndũ nĩwakwĩka maũndũ mekwonanyʼa eenda ũkome nake, mũelesye nesa kana ndũkwendeewʼa nĩ mĩkanĩlye ĩsu yake. (1 Akolintho 14:9) Kwa ngelekanyʼo no ũmwĩe: “Nũkothaa kũnthengeea mũno na ũndũ ũsu ũtumaa nĩwʼa naĩ mũno. Ndũkambĩle kũnthengeea mũno wĩana ũu.” No ũmũandĩkĩe valũa ũmũeleetye ũndũ ũnakwĩkie, ũndũ ũneewie akwĩka ũu, na ũndũ ũkwenda ekae. Mũelesye nesa vyũ kana mũĩkĩĩo waku nĩwʼo ũũtuma ũleana na maũndũ asu.—1 Athesalonika 4:3-5.
Mantha ũtethyo. Ũndũ ũsu waendeea, mantha ũtethyo vala ve mũnyanyau ũmũĩkĩĩe, mũndũ wa mũsyĩ, mũndũ mũthũkũmaa ĩmwe, kana mũndũ wĩ na ũmanyi wa kũtetheesya andũ ala mathĩnawʼa kwa nzĩa ĩsu. (Nthimo 27:9) Andũ aingĩ ala mathĩnawʼa nĩ angĩ mayenda kũkoma namo nĩmakwatĩte ũtethyo kwĩsĩla mboya. O na ethĩwa ndwaavoya ĩũlũ wa ũndũ ũsu, ndũkavũthĩĩsye ũtethyo ũla ũtonya kũkwata kuma kwa Yeova, “Ngai wa ũkiakisyo wʼonthe.”—2 Akolintho 1:3.
Ndwĩthĩawa wĩ ũndũ wĩ laisi kwa andũ aingĩ kũthũkũma na andũ mamathĩnasya mayenda makome namo ĩndĩ Mbivilia no ĩũtetheesye.