ANDŨ MA MŨIKA MAKŨLASYA
Naĩle Kwĩka Ata Ĩla Navĩtya?
We Ũtonya Kwĩka Ata?
Soma wone kĩla kyakwatie Karina, na ũisũanĩa ta keka nue wakwatiwe nĩ ũndũ ũsu we wĩka ata.
Karina: “Ĩvinda yĩmwe nĩendete sukulu nasembetye ngalĩ mũno, na mũsikalĩ ambũngamya anenga lisiti yonanĩtye vainĩ ũla naĩlĩte kũĩva. Nathatie mũno! Nĩnatavisye Mami ũndũ ũsu na ambĩa no nginya nĩtavye Tata. Ĩndĩ Ndyaaenda kwĩka ũu.”
We Ũtonya Kwĩka Ata?
1. Kũvindya na ndimanya ĩthe-akwa ndakamanya ũndũ ũsu.
2. Ndavya ĩthe-akwa kĩla kĩneekĩkie.
Nĩvatonyeka ũkosa ũsũngĩo wa mbee. Nĩkĩ? Nũndũ nũtonya kũsũanĩa inyia-aku ndeatĩanĩa naku aivanga nũnatavisye ĩthe-aku. Ĩndĩ ve itumi nzeo syaĩlĩte kũtuma wĩtĩkĩla mavĩtyo maku, wĩthwe ũkũniwe vainĩ nũndũ wa kũsembya ngalĩ kana o mavĩtyo angĩ.
Itumi itatũ syonanĩtye nĩkĩ waĩle kwĩtĩkĩla mavĩtyo maku
1. Nũndũ nĩwʼo ũndũ ũla waĩle. Mbivilia nĩwetete ũndũ Aklĩsto maĩle kwĩthĩwa mailyĩ. Yaĩtye: “Neenai wʼo.”—Aeveso 4:25.
“Nĩndataa ũndũ ndonya kũneena ũla wʼo, kwĩtĩkĩla mavĩtyo makwa na mĩtũkĩ ũndũ vatonyeka, na kwĩtĩkĩla kĩla kyaumĩla nũndũ wa meko makwa.”—Alexis.
2. Nũndũ nĩ laisi andũ kũekea ũla weetĩkĩla mavĩtyo make. Mbivilia yaĩtye: “Ũla ũvwʼĩkaa mavĩtyo make ndakaathimĩka; ĩndĩ ũla ũmaumbũlaa na kũmatia akeewʼĩwa tei.”—Nthimo 28:13.
No nginya wĩthwe na ũkũmbaũ nĩ kana wĩtĩkĩle mavĩtyo. Ũu nũtumaa andũ makũĩkĩĩa ,nũndũ nĩmamanyaa ndũkenganaa. Na nĩmonaa ũseo ũla weeka vandũ va ĩvĩtyo yaku.—Richard.
3. Ũu nũmũtanĩthasya Yeova. Mbivilia yaĩtye: “Ũla wĩ ngũlũ [“wĩvithaa ũndũ ũilyĩ,” NWT] nĩ ũthatyo kwa Yeova; ĩndĩ ũnyanya wake nĩ wake na ũla mũlũngalu.”—Nthimo 3:32.
“Ve ĩvinda neekie ĩvĩtyo yĩito, na nĩnamanyie kana nĩnaĩlĩte kũyĩweta. Yeova ndaĩ esa kũmbathima ndyĩka maũndũ kĩvathũkanyʼo na ũndũ wendete.”—Rachel.
We Karina eekie ata? Nĩwatatie kũvitha ĩthe lisiti ĩla wanengiwe nũndũ wa kũsembya ngalĩ. Ĩndĩ ĩthe nĩwesie kũmyona. Karina easya: “Ĩtina wa mwaka ũmwe, Tata aisisya lekoti sya inisualenzi, nĩweethĩie lisiti ya vainĩ wa kũsembya ngalĩ ĩandĩkĩtwe ĩsyĩtwa yakwa.” Naĩ thĩnanĩ mũnene. O na inyia-akwa nĩwathatie amanya ndyaĩ naatavya ĩthe-akwa ũndũ ũsu.
Kĩla tũkwĩmanyĩsya: Karina aĩtye: “Kũvitha mavĩtyo kwĩkaa kwanangĩĩa maũndũ. Wĩsaa o kũmaĩvĩa ĩtina.”
Ũndũ ũtonya kwĩmanyĩsya kumana na mavĩtyo maku
Kĩla mũndũ nũvĩtasya. (Alomi 3:23; 1 Yoana 1:8) Na o tondũ twoona, ĩla tweetĩkĩla mavĩtyo tũteũtindĩa, twonanasya twĩ na wĩnyivyo na kana twĩ aimu.
Twamina kwĩtĩkĩla mavĩtyo, ũndũ ũla ũngĩ nĩ kwĩmanyĩsya kumana namo. Ĩndĩ ũsengyʼo nĩ kana andũ aingĩ ma mũika mayĩkaa ũu. Nĩvatonyeka mekewʼa ũndũ mwĩĩtu ũmwe wa mũika wĩtawa Priscilla weewʼaa, aĩtye atĩĩ: “Mavinda maingĩ nĩnatũlĩkaa ngoo mũno nũndũ wa mavĩtyo makwa. Noonaa nde wa vata, na kwoou mavĩtyo makwa namonaa me mũio mũnene ndatonya kũũvikya. Nathĩnĩkaa mũno na ngeyĩwʼĩa tei mwingĩ.”
We mavinda amwe nĩwĩwʼaa ũu? Kũtindĩa ũisũanĩa mavĩtyo weekie nĩ ũndũ ũmwe na kũtindĩa kũsisya kĩoo kya ngalĩ kĩla kyonanasya ĩtina. Kwĩka ũu no kũtume wĩwʼa ũte wa vata na ũyĩthĩa ndwĩ na vinya wa kũthĩnĩkĩa maũndũ angĩ ala matonya kũũkwata.
Vandũ va ũu, twaĩlĩte kwĩthĩwa na woni waĩlĩte.
“Sũanĩa mavĩtyo maku na ũyĩmanyĩsya kumana namo nĩ kana ndũkamasyokeleele. Ĩndĩ ndũkatindĩae kũmasũanĩa maikakũũmĩsye.”—Elliot.
“Nĩndataa ũndũ ndonya kwĩmanyĩsya kumana na mavĩtyo makwa. Kĩla ĩvĩtyo yĩnengae ĩsomo yĩtonya kũtuma nĩthwa nĩ mũndũ mũseango na yĩkandetheesya kũmanya ũndũ ndonya kũthĩnĩkĩa ũndũ ta ũsu waumĩla ĩvinda yĩngĩ. Ĩsu nĩ nzĩa nzeo ya kũatĩĩa nũndũ nĩtumaa tũima.”—Vera.