Nĩkĩ Ngũsĩ sya Yeova Syĩkĩte Moalyũku Ĩũlũ wa Momanyĩsyo Amwe Inaĩkĩĩaa?

Mavinda onthe tũtũmĩaa Mbivilia ta yo mũsingi wa maũndũ ala tũĩkĩĩaa. Kwoou, nĩtũvĩndũĩte momanyĩsyo amwe ala tũĩkĩĩaa, o ũndũ ũmanyi witũ wa Maandĩko wongelekete.a

Moalyũku ta asu nĩmosanĩte na mwolooto wa Mbivilia ũla wĩ nthĩnĩ wa Nthimo 4:18: “Ĩndĩ nzĩa ya alũngalu nĩ ta kyeni kya kũikya, kĩla kĩkenaa mbee na mbee kũvika mũthenya mwĩanĩu.” O tondũ sua yĩyuma syĩndũ ĩũlũ wa nthĩ syambĩĩaa kwoneka o kavola kwa kavola, o ta ũu Ngai nũtũvuanĩasya ũmanyi wa ũla wʼo o kavola kwa kavola ĩvindanĩ yake yĩla yaĩlĩte. (1 Vetelo 1:10-12) O tondũ Mbivilia yathanie, nũendeee kwĩanĩsya ũndũ ũsu na mĩtũkĩ ‘ĩvindanĩ yĩĩ ya mũminũkĩlyo.’—Ndanieli 12:4.

Moalyũku asu ĩũlũ wa ũmanyi witũ mayaĩle kũtũsengyʼa kana kũtũthĩnyʼa. O namo athaithi ma Ngai ma tene maĩ na mawoni mataĩle o vamwe na maũndũ meeteelete meanĩe, na kwoou nĩmaaĩlĩte kũvĩndũa woni woo.

• Mose nĩweeyumisye atangĩĩe mbaĩ ya Isilaeli myaka 40, o na Ngai ataaĩsa kũmũnyuva.—Meko ma Atũmwa 7:23-25, 30, 35.

• Atũmwa mayaaelewa nĩ wathani ũla wathanĩte ĩũlũ wa kĩkwʼũ na ũthayũũkyo wa Masia.—Isaia 53:8-12; Mathayo 16:21-23.

• Aklĩsto amwe ma ĩvinda ya atũmwa maĩ na mawoni mataĩle ĩũlũ wa kũka kwa “mũthenya wa Yeova.”—2 Athesalonika 2:1, 2.

Ĩtina Ngai nĩwalũngile mawoni moo mataĩle, na twĩvoya aendeee kwĩka oou kwondũ witũ.—Yakovo 1:5.