Watchtower LIBRARY INDANETINĨ
Watchtower
LIBRARY INDANETINĨ
Kikamba
Ũ
  • ũ
  • Ũ
  • ĩ
  • Ĩ
  • MBIVILIA
  • MAVUKU
  • MAŨMBANO
  • ijwyp kĩlungu 83
  • Ndonya Kwĩka Ata Nĩkĩlye Vinya Motato?

Vai vitio ya kĩla wanyuva.

Vole, ve thĩna waumĩla.

  • Ndonya Kwĩka Ata Nĩkĩlye Vinya Motato?
  • Andũ ma Mũika Makũlasya
  • Syongo Nini
  • Ũvoo Ũngĩ ta Ũũ
  • Kĩla waĩle kũmanya
  • Ũndũ ũtonya kwĩka
  • “Nĩ Kana Mũikalike Matatwanĩ”
    Syaĩĩsyai!
  • Endeea Kwĩsũvĩa Ndũkalike Ĩtatwanĩ
    Mũsyaĩĩsya Yĩtavanasya Ũsumbĩ wa Yeova (Ĩkaseti ya Kwĩmanyĩsya)—2024
  • Ũndũ Tũtonya Kũkĩlya Vinya Mawendi Mathũku
    Mũsyaĩĩsya Yĩtavanasya Ũsumbĩ wa Yeova (Ĩkaseti ya Kwĩmanyĩsya)—2025
  • 1 Akolintho 10:13—“Ngai Nĩ Mũĩkĩĩku”
    Mĩsoa ya Mbivilia Ĩeleetwʼe
Ũvoo Mwingangĩ
Andũ ma Mũika Makũlasya
ijwyp kĩlungu 83
Mũndũ wa mũika eĩwʼa aitatĩka oona kĩmwana na mwĩĩtu maiea ngewa sya wendo, oona imwana ilĩ isyaĩĩsye simũ, na oona kelĩtu kavĩtĩte

ANDŨ MA MŨIKA MAKŨLASYA

Ndonya Kwĩka Ata Nĩkĩlye Vinya Motato?

Mũtũmwa Vaulo aandĩkie atĩĩ: “Yĩla ngwenda kwĩka ũla ũseo, ũla ũthũku wĩthĩawa vamwe nakwa.” (Alomi 7:21) We waaĩwʼa ũu Vaulo weewʼaa? Ethĩwa waaĩwʼa ũu, kĩlungu kĩĩ nĩkĩũkũtetheesya ũmanye ũndũ ũtonya kwĩka nĩ kana ũkĩlye vinya motato.

  • Kĩla waĩle kũmanya

  • Ũndũ ũtonya kwĩka

  • Kĩla andũ angĩ ma mũika maasya

Kĩla waĩle kũmanya

Motato na kĩtindo nikonanĩtye. Ũu nĩ wʼo nũndũ Mbivilia yaĩtye kana “itindo nthũku nĩsyanangaa mwĩkalĩle mũseo.” (1 Akolintho 15:33) Kũthingʼĩĩwʼa nĩ andũ angĩ kana kwenda kũatĩĩa maũndũ ala me isesenĩ sya maũvoo no kũtume wambĩĩa kwĩthĩwa na mawendi mathũku ngoonĩ yaku, na ũu no ũtume wĩka maũndũ mataĩle kana ‘ũkaatĩanĩa na wingĩ wa andũ wĩke naĩ.’—Kuma 23:2.

“Kwĩwʼa ũyenda wĩtĩkĩlwe nĩ angĩ na makwende no kũtume wĩka ũndũ mekwenda nĩ kana makwĩtĩkĩle.”—Jeremy.

Sũanĩa ũndũ ũũ: Nĩkĩ nĩ laisi mũno kũkĩlwʼa vinya nĩ motato ethĩwa ũthĩnĩkĩaa mũno ũndũ andũ ala angĩ makwonaa?—Nthimo 29:25.

Ũwʼo wa maũndũ: Ndũketĩkĩle kwĩka ũndũ ũte mũseo nũndũ wa kũthingʼĩĩwʼa nĩ andũ angĩ.

Ũndũ ũtonya kwĩka

Manya kĩla ũĩkĩĩaa. Kũlea kũmanya kĩla ũĩkĩĩaa no kũtume andũ ala angĩ maũtũmĩa ũndũ mekwenda. Kwoou nũseo ũkaatĩĩa ũtao ũũ wĩ Mbivilianĩ: “Osyai maũndũ onthe; lũmyai vyũ ala maseo.” (1 Athesalonika 5:21) Weethĩwa wĩsĩ nesa maũndũ ala ũĩkĩĩaa, ũkethĩa nĩ laisi kwaku kũlũmanyʼa namo na kũleana na maũndũ ala mataĩle.

Sũanĩa ũndũ ũũ: Nĩkĩ ũĩkĩĩaa kana myolooto ya Ngai no ĩkũtethye we mwene?

“Nonete kana yĩla nalũmanyʼa na maũndũ ala nĩĩkĩĩte na nakĩlya vinya motato, andũ ala angĩ nĩmanengae ndaĩa.”—Kimberly.

Ngelekanyʼo yĩ Mbivilianĩ: Ndanieli. Nĩvatonyeka yĩla Ndanieli waĩ wa mũika akethĩwa ‘eetwʼĩĩe ngoonĩ yake’ kana akakwataa mĩao ya Ngai.—Ndanieli 1:8.

Mũndũ wa mũika ovewe ndii nĩ kana eke ũndũ angĩ mekwenda

Waema kwĩthĩwa wĩsĩ maũndũ ala ũĩkĩĩaa, ũkatũmĩawa nĩ andũ ũndũ mekwenda

Manya mawonzu maku. Mbivilia nĩwetete ĩũlũ wa “mawendi ma ĩvinda ya ũika” ala methĩawa me na vinya mwingĩ, na mũno mũno yĩla mũndũ mũninangi. (2 Timotheo 2:22) Mawendi asu methĩawa ne kwenda kũmanyana kĩ-mwĩĩ, kwenda kwĩtĩkĩlwa nĩ andũ ala angĩ, na kwenda kwĩyĩũngamĩa o na kũtwʼĩka wĩ o mũndũ mũnini.

Sũanĩa ũndũ ũũ: Mbivilia yaĩtye kana “kĩla mũndũ atatawa kwa kũkuswʼa na kũkengwa nĩ ĩtomo yake mwene.” (Yakovo 1:14) Nĩ wendi wĩva ũkũthĩnasya mũno?

“Ĩthĩwa wĩsĩ nesa nĩ ĩtatwa yĩva wĩwʼaa yĩ vinya kũsinda. Ĩka ũkunĩkĩli wone ũndũ ũtonya kũsinda ĩtatwa yĩu na ũiandĩka maũndũ ala matonya kũũtethya. Kwĩka ũu kũkaũtetheesya ũsinde ĩtatwa yĩu wakomana nayo ĩngĩ.”—Sylvia.

Ngelekanyʼo yĩ Mbivilianĩ: Ndaviti. Mavinda amwe Ndaviti nĩweetĩkĩlanaa na maũndũ ala andũ angĩ mekwenda eke, o na mavinda angĩ nĩwakĩlawʼa vinya nĩ mawendi make mwene. Ĩndĩ nĩweemanyĩisye kumana na mavĩtyo make na eemanyĩsya kwĩkaa ũla waĩlĩte. Amũvoyie Yeova amwĩa atĩĩ: “Mbũmbĩa ngoo ntheu; na tũnga ĩngĩ veva wa wʼo nthĩnĩ wakwa.”—Savuli 51:10.

Ĩsiĩĩe. Mbivilia yaĩtye: “Mũiketĩkĩle mũkĩlwʼe vinya nĩ ũthũku.” (Alomi 12:21) Ũu nĩ kwasya kana ti nginya ũkakĩlwʼa vinya nĩ motato. No ũnyuve kwĩka ũla waĩle.

Sũanĩa ũndũ ũũ: Kũsũanĩa kĩla ũtonya kwĩka vaumĩla kĩndũ kĩtonya kũtuma wĩka kĩla kĩtaĩle kũtonya kũũtethya ata?

“Nĩnĩsũanĩaa ũndũ vatonya kwĩthĩwa nakĩlwʼa vinya no ĩtatwa yĩla yaumĩla. Nĩkũlasya neeka ũu nĩngwĩwʼa nĩ mwĩanĩe? Noĩthwa, ĩndĩ o kwa kavinda kanini. Ĩtina wa ĩvinda ngewʼaa nĩ mwĩanĩe? Aiee, ĩndĩ maũndũ makeka kũthũkĩĩa. Kwoou nĩnaĩle kwĩka ũu? Aiee!”—Sophia.

Ngelekanyʼo yĩ Mbivilianĩ: Vaulo. O na kau Vaulo nĩweesĩ kana nĩweethĩawa na mosũanĩo mataĩle, nĩweesiĩĩaa. Aandĩkie ũũ: “Nĩkũnaa mwĩĩ wakwa na kũũtongoesya ta ngombo.”—1 Akolintho 9:27.

Ũwʼo wa maũndũ: No we mwene ũtonya kũtwʼa ũndũ waĩle kwĩka yĩla wakomana na motato.

Ndũkolwe kana motato no ma kavinda kanini. Mwĩĩtu ũmwe wĩtawa Melissa, ũla wĩ na myaka 20, aĩtye atĩĩ: “Maũndũ ala noonaa me matatwa manene nĩ sekondalĩ yu nonaa twaĩ o tũmaũndũ tũnini. Yĩla nasũanĩa maũndũ asu, ũu ũtumaa nĩmanya kana matatwa ala nĩkomanaa namo ũmũnthĩ mai ndĩi ya kũthela, na kana ĩvinda yũkĩte ngatana kũmanya nĩ kavaa ũu namakĩlilye vinya.”

Kĩla andũ angĩ ma mũika maasya

Olivia

“Yĩla natwʼa kwĩka ũndũ mũna na neethĩwa na ũkũmbaũ wa kũwĩka, ũu nũndetheeasya kũsinda motato. Kwa ngelekanyʼo, yĩla natwʼa kana ndyĩĩka ũndũ mũna, ndyĩsaa kũwĩka kana kũsũanĩa ya kelĩ, kana kũatĩĩa motwi ma andũ angĩ.”—Olivia.

Jared

“Andũ ma mũika nĩmathingʼĩĩawʼa mũno kũthi kũndũ kwa kwĩtanĩthya na mayĩka maũndũ onthe ala mekawa kũu, ta kũnywʼa ũkĩ, kũtũmĩa ndawa sya kũmila, na kũmanyana kĩ-mwĩĩ. Kĩla kĩndethetye nĩ kũelesya asyai makwa ndeũmavitha kĩndũ ũndũ nĩthingʼĩĩawʼa nĩke maũndũ asu. O na ĩngĩ, kwĩthĩwa na maũndũ maingĩ ma kwĩka yĩla nĩ weka nĩkũndetheeasya nĩvathane na maũndũ matonya kũtuma nĩka maũndũ mathũku.”—Jared.

Mayan

“Ĩtatwa yĩla nonaa yĩ vinya mũno kũkĩlya vinya nĩ kwĩwa nĩke ũndũ andũ angĩ matekwona wĩ mũthũku, ĩndĩ ũyĩthĩa nyie nĩngwona wĩ mũthũku, ta kwa ngelekanyʼo, yĩla tũũnyuva maũndũ ma kwĩtanĩthya. Waĩlĩte kwĩthĩwa wĩsĩ nesa maũndũ ala ũĩkĩĩaa nĩ kana ũkĩlye vinya ĩtatwa ta yĩu. Ũsu nĩ ũndũ wendaa ĩvinda nĩ kana wĩthĩwe na ũmanyi wa kwĩka ũu.”—Mayan.

Julian

“Waĩle kwĩthĩwa wĩyĩsĩ nesa, na ũimanya nĩ kyaũ kĩtonya kũtuma ũtatĩka. Waĩle kwĩthĩwa wĩsĩ nĩ isese syĩva sya Indaneti itonya kwĩthĩwa na maũndũ mataĩle, na ũimanya ũndũ ũtonya kwĩka yĩla maumĩla. No nginya wĩyũmbanyʼe nesa nĩ kana ũsinde motato.”—Julian.

    Kikamba Publications (1950-2025)
    Uma
    Lika Nthĩnĩ
    • Kikamba
    • Tũma
    • Mũvangĩle ũla ũkwenda
    • Copyright © 2025 Watch Tower Bible and Tract Society of Pennsylvania
    • Mĩao ya Kũtũmĩa
    • Ũvoo Waku wa Kĩmbithĩ
    • Mpangilio wa Faragha
    • JW.ORG
    • Lika Nthĩnĩ
    Tũma