Mbivilia Yaasya Ata Ĩũlũ wa Mĩisyo?

Ũndũ Mbivilia yaasya

Ngai tiwe ũetae mĩisyo ĩla yĩthĩawa kwʼo ũmũnthĩ, ĩndĩ nũthĩnĩkĩaa mũno andũ ala makwatwa nĩyo. Mĩisyo nĩ ũndũ ũmwe katĩ wa maũndũ maingĩ ala matumaa andũ mathĩna, na maũndũ asu onthe makaminwa nĩ Ũsumbĩ wa Ngai. Nũndũ ĩvinda yĩu yĩinamba kũvika, ũmũnthĩ Ngai nũkiakiasya andũ ala makwatwa nĩ mĩisyo.​—2 Akolintho 1:3.

• Nĩkĩ tũtonya kwĩthĩwa tũte na nzika kana mĩisyo ti ũsilĩlo kuma kwa Ngai?

• Yo mĩisyo nĩ wonanyʼo wa kana tũilye mĩthenyanĩ ya mũminũkĩlyo?

• Ngai atetheeasya ata andũ ala makwatwa nĩ mĩisyo?

• Yo Mbivilia no ĩtũtetheesye kwĩyũmbanĩsya mĩisyo?

• Maandĩko matonya kwĩkĩa vinya andũ ala makwatwa nĩ mĩisyo

Nĩkĩ tũtonya kwĩthĩwa tũte na nzika kana mĩisyo ti ũsilĩlo kuma kwa Ngai?

Mbivilia nĩtũtetheeasya kũmanya kana ve mavinda Yeova watũmĩaa syĩndũ ila woombie ta mbua na mwaki kũsilĩla eki ma naĩ. Ĩndĩ kĩu kĩ kĩvathũkanyʼo vyũ na mĩisyo ĩla yumĩlaa ũmũnthĩ.

• Yĩla mĩisyo yaumĩla nĩyũaaa na kũũmĩsya andũ ĩte kũvathũla. Kĩvathũkanyʼo na ũu, Ngai atũmĩaa vinya wa syĩndũ ila woombie nĩ kana anange o andũ ala athũku me oka. Kwa ngelekanyʼo, yĩla Ngai wanangaa ndũa sya Sotomo na Ngomola, nĩwatangĩĩie mũndũ waĩ mũlũngalu weetawa Loto na eĩtu make elĩ. (Mwambĩlĩlyo 19:29, 30) Ĩvindanĩ yĩu, nĩwasomie ngoo sya andũ ala maĩ ndũanĩ isu na aananga o ala woonie me athũku.​—Mwambĩlĩlyo 18:23-32; 1 Samueli 16:7.

• Ũmũnthĩ, mavinda maingĩ mĩisyo yumĩlaa vate mũndũ wĩsĩ kana nĩtonya kumĩla. Ĩndĩ kĩvathũkanyʼo na ũu, Ngai nĩwakanasya andũ ala athũku atanamba kũtũmĩa vinya wa syĩndũ ila woombie kũmananga. Andũ ala meethĩawa me ewi kwelekela mokanyʼo asu maĩ matonya kũtangĩĩwa maikakwatwe nĩ mũisyo.​—Mwambĩlĩlyo 7:1-5; Mathayo 24:38, 39.

• No twasye kana andũ nĩmekaa maũndũ matonya kũtuma mĩisyo yumĩla kana makelikya mũisyonĩ. Mekaa ũu ata? Kwa kwananga mawĩthyũlũlũko na kwaka nyũmba isionĩ ila syĩthĩawa na ithingitho sya nthĩ mavinda kwa mavinda, ila syĩthĩawa na mbua mbingĩ ĩtonya kũete wanangĩko, iuutani na maũndũ angĩ ta asu. (Ũvuanyʼo 11:18) Ngai ndaĩle kũtũlwa mũtĩ ona vanini nũndũ wa motwi ta asu andũ mekaa makelikya mũisyonĩ.​—Nthimo 19:3.

Yo mĩisyo nĩ wonanyʼo wa kana tũilye mĩthenyanĩ ya mũminũkĩlyo?

Ĩĩ, na kĩtumi nũndũ wathani ũla wĩ Mbivilianĩ wonanĩtye kana kwaĩ kwĩthĩwe na mĩisyo “mĩthenyanĩ ya mũminũkĩlyo,” kana “[mũminũkĩlyonĩ] wa ĩvinda yĩĩ.” (Mathayo 24:3; 2 Timotheo 3:1) Kwa ngelekanyʼo, Yesũ aineenea ĩvinda yĩĩ tũtwĩe aisye atĩĩ: “Kũkeethĩwa ũnyivu wa lĩu na ithingitho sya nthĩ kũũ na kũũ.” (Mathayo 24:7) Ĩndĩ o mĩtũkĩ, Ngai nũkwosa ĩtambya ya kũvetanga maũndũ ala maetae woo na mathĩna, ala nĩ vamwe na mĩisyo, ĩũlũ wa nthĩ yonthe.​—Ũvuanyʼo 21:3, 4.

Ngai atetheeasya ata andũ ala makwatwa nĩ mĩisyo?

• Ngai nũtũmĩaa Ndeto yake, Mbivilia, kũkiakisya andũ ala makwatwa nĩ mĩisyo. Mbivilia nĩtũĩkĩĩthasya kana Ngai nũtũthĩnĩkĩaa na nĩwĩwʼaa woo yĩla woona tũithĩna. (Isaia 63:9; 1 Vetelo 5:6, 7) O na nĩtũtavasya ĩũlũ wa watho wake wa kana ve ĩvinda mĩisyo ĩtakethĩwa vo ĩngĩ.​—Sisya kĩlungu kĩ na kyongo “Maandĩko matonya kwĩkĩa vinya andũ ala makwatwa nĩ mĩisyo.”

• Ngai nũtũmĩaa athaithi make kũkiakisya andũ ala makwatwa nĩ mĩisyo. Ngai atũmĩaa athaithi make kũatĩĩa ngelekanyʼo ya Yesũ ya kũtetheesya andũ. Mbivilia yathanĩte kana Yesũ aĩ akiakisye “ala me na ngoo ndũlĩku” na “onthe ala mametaa.” (Isaia 61:1, 2) Ũmũnthĩ athaithi ma Ngai nĩmatataa ũndũ matonya meke ta Yesũ.​—Yoana 13:15.

  O na ĩngĩ, Ngai nũtũmĩaa athaithi make kũtetheesya andũ ala makwatwa nĩ mĩisyo kwa kũmanenga syĩndũ ila me na vata nasyo.​—Meko ma Atũmwa 11:28-30; Akalatia 6:10.

Yo Mbivilia no ĩtũtetheesye kwĩyũmbanĩsya mĩisyo?

Ĩĩ. O na kũtwʼĩka Mbivilia ndyaandĩkĩtwe yĩ na kĩeleelo kya kũtetheesya andũ kwĩyũmbanĩsya mĩisyo, yĩ na myolooto mĩseo ĩtonya kũtetheesya. Kwa ngelekanyʼo:

• Vanga tene maũndũ ala ũtonya kwĩka mũisyo waumĩla. Mbivilia yaĩtye atĩĩ: “Mũndũ wĩ kĩlĩko nĩwonaa ũthũku, na kwĩvitha.” (Nthimo 22:3) Kwoou nĩ ũndũ wa ũĩ tũkasũanĩa tene maũndũ ala tũtonya kwĩka mũisyo waumĩla. Kwa ngelekanyʼo, ũndũ ũmwe tũtonya kwĩka nĩ kũmbanyʼa kamũvuko ke na syĩndũ ila tũtonya kũtũmĩa mũisyo waumĩla, o vamwe na kũneena na andũ ma mũsyĩ na kũvanga tene vala tũtonya kũkĩĩa ethĩwa mũisyo nĩwaumĩla.

• Thayũ nĩwʼo wa vata vyũ kũvĩtũka syĩndũ ila ingĩ. Na ũu nĩwʼo nũndũ o na Mbivilia yaĩtye atĩĩ: “Tũyaaete kĩndũ ĩũlũ wa nthĩ na tũitonya kuma na kĩndũ.” (1 Timotheo 6:7, 8) Kwoou twaĩlĩte kwĩthĩwa twĩyũmbanĩtye kũtia syĩndũ sitũ o na nyũmba yĩla mũisyo waumĩla. Kĩla ĩvinda, nũseo tũkekalaa tũlilikene kana thayũ witũ nĩwʼo wa vata vyũ kũvĩtũka syĩndũ syonthe sya kĩ-mwĩĩ.​—Mathayo 6:25.