Mathayo 6:34—“Mũikemakĩe Kwondũ wa Ũnĩ”

“Mũikemakĩe nongi kwondũ wa ũnĩ, nũndũ ũnĩ ũkeethĩwa na mawĩmakĩo mawʼo. Kĩla mũthenya wĩ na mathĩna mawʼo ala mawĩanĩe.”—Mathayo 6:34, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

“Mũikemakĩe kwondũ wa ũnĩ, nũndũ ũnĩ ũkeethĩwa na mawĩmakĩo mawʼo. Kĩla mũthenya wĩ na mathĩna mawʼo mawĩanĩe.”—Mathayo 6:34, New International Version.

Kĩla Ĩandĩko ya Mathayo 6:34 Yonanasya

Yesũ, ũla nĩwe waneenie ndeto isu, aĩkĩĩthisye ala mamwĩthukĩĩsye kana mayaĩ na vata wa kwĩmakĩa mũno kana kũthĩnĩka ũndũ vataĩle ĩũlũ wa mathĩna ma ĩvinda yũkĩte. Vandũ va ũu, nĩmesaa kũtetheka mũno mathĩnĩkĩa mathĩna ma mũthenya ũmwe kũthi ũla ũngĩ.

Yesũ ndoonanasya kana tũyaĩlĩte kũsũanĩa ĩũlũ wa ũnĩ kana kwĩka mĩvango ya ĩvinda yũkĩte. (Nthimo 21:5) Vandũ va ũu atũtetheeasya tũikemakĩe mũno kũvĩtũka ũndũ vaĩlĩte, kana tũikathĩnĩke mũno ĩũlũ wa kĩla kĩtonya kwĩkĩka ũnĩ. Kwĩmakĩa ta kũu nĩkũtonya kũtũvena ũtanu witũ na kũkatuma tũtathĩnĩkĩa nesa ianda ila twĩ nasyo. Kwĩmakĩa kũyĩsa kũtuma mathĩna ma ĩvinda yũkĩte mathela. O na eka ũu, mavinda maingĩ maũndũ ala meũtuma twĩmakĩa, nĩmatonya kũlea kumĩla, kana makethĩwa mate mathũku ũndũ tũũsũanĩaa.

Mĩsoa Ĩla Ĩthyũlũlũkĩte Mathayo 6:34

Ndeto ii sya Yesũ, nĩ imwe katĩ wa ila wawetie Ũtavanyʼanĩ wake wĩ nguma wa Kĩĩmanĩ, ũla ũwetetwe nthĩnĩ wa Mathayo kĩlungu kya 5-7. Ũtavanyʼanĩ ũsu, Yesũ nĩwaeleisye kana kwĩmakĩa mũno kũyĩsa kwaĩlangya thayũ wa mũndũ kana kũkatuma ekala myaka mingangĩ. (Mathayo 6:27) O na ĩngĩ aisye kana, yĩla twamũvĩtya Ngai mbee thayũnĩ witũ, tũyĩthĩawa na vata wa kwĩmakĩa mũno ĩũlũ wa ũnĩ. Ngai nũsũvĩaa mĩtĩ na nyamũ, na kwoou ndalea kũsũvĩa ala mamũthũkũmaa.—Mathayo 6:25, 26, 28-33.