Yoana 15:13—“Wendo Mwingĩ Mbee wa Ũũ Vai Mũndũ wĩ Nawʼo”

“Vaiĩ mũndũ wĩ wendo mwingĩ kwĩ ũũ, mũndũ kwĩyumya akwʼe kwondũ wa anyanyae.”—Yoana 15:13, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

“Wendo mwingĩ mbee wa ũũ vai mũndũ wĩ nawʼo, mũndũ kũwia thayũ wake nthĩ nũndũ wa anyanyae.”—Yoana 15:13, New King James Version.

Kĩla Ĩandĩko ya Yoana 15:13 Yonanasya

Yesũ atetheeasya aatĩĩi make maelewe kana wendo woo waĩle kwĩthĩwa wĩ mwingĩ vyũ ũkethĩa mũndũ nĩwĩyũmbanĩtye kũkwʼa kwondũ wa ũla ũngĩ.

Atanamba kũweta ndeto isu, Yesũ aĩ aneea atũmwa make atĩĩ: “Ũũ nĩwʼo mwĩao wakwa, inywʼĩ mwendane o tondũ namwendie.” (Yoana 15:12) We Yesũ amonasya wendo ũilye ata? Waĩ wendo ũte na wanganganyʼa, na nĩweeyĩimaa maũndũ amwe nĩ kana amonyʼe wendo ũsu. E ũthũkũminĩ wake ĩũlũ wa nthĩ, nĩwavĩtasya mbee mavata na mawendi ma aatĩĩi make na ma ala angĩ. Nĩwavoasya ala awau na akamamanyĩsya ĩũlũ wa Ũsumbĩ wa Ngai.a O na nĩwatethasya mawĩa ma kĩlasi kya nthĩ nĩ kana aune ala angĩ. (Mathayo 9:35; Luka 22:27; Yoana 13:3-5) Ĩndĩ nthĩnĩ wa Yoana 15:13, Yesũ awetaa ĩũlũ wa ũndũ ũngĩ wonanasya wendo mwingĩ vyũ. O na eka ũu, masaa meana ũna ĩtina wa kũneena ndeto isu, nĩwoonanisye wendo ũsu mwingĩ yĩla weeyumisye na ngenda anengane “thayũ wake wĩthĩwe wovosyo kwondũ wa aingĩ.” (Mathayo 20:28; 22:39) Kwoou nĩwoonanisye kwa nzĩa ya kwendeesya mũno kana nĩwendete angĩ kwĩ ũndũ weeyendete.

Yesũ nĩwendete andũ. Ĩndĩ mũno mũno endete ala maatĩĩaa momanyĩsyo make. Nĩwoonaa amanyĩwʼa make me anyanya ma vakuvĩ nũndũ nĩmeewʼaa maũndũ ala wamamanyĩasya na nĩmalũmanisye nake yĩla waĩ mathĩnanĩ. (Luka 22:28; Yoana 15:14, 15) Kwoou aĩ na kĩtumi kĩnenange kya kumya thayũ wake wĩthĩwe wovosyo kwondũ woo.

Aklĩsto ma ĩvinda ya atũmwa nĩmaatĩĩie ndeto sya Yesũ, na nĩmeeyũmbanĩtye kũkwʼa kwondũ wa ala angĩ. (1 Yoana 3:16) Vate nzika, wendo ũte na wanganganyʼa—wendo ũla Yesũ woonanisye—waĩ ũtwʼĩke ũvano ũla wa vata vyũ wa kũmanya Aklĩsto ma wʼo.—Yoana 13:34, 35.

Mĩsoa Ĩla Ĩthyũlũlũkĩte Yoana 15:13

Kĩlungu kya 13-17 Ĩvukunĩ ya Ũvoo Mũseo ya Yoana, nĩsyonanĩtye ũtao ũla Yesũ watavisye atũmwa 11 aĩkĩĩku atanamba kũkwʼa na mboya yake ya mũthya vamwe namo. Ĩtina wa masaa mate maingĩ nĩwakwie. Kĩlungunĩ kya 15, Yesũ nĩwaelekanilye amanyĩwʼa make na mbonge sya mũsavivũ ila isyaa ũsyao, onanyʼe amanyĩwʼa make maĩlĩte kwĩthĩwa me ngwatanĩo vamwe nake nĩ kana maĩkĩĩthye kwa wʼo nĩ aatĩĩi make. Amathuthĩtye “maendeee kũsyaa ũsyao mwingĩ.” (Yoana 15:1-5, 8) Nzĩa ĩmwe mekaa ũu nĩ kwa kwonyʼa angĩ wendo ũte na wanganganyʼa. Kwĩka ũu nĩ vamwe na kũtavya angĩ ũvoo ũla Yesũ watavanasya—“ũvoo mũseo wa Ũsumbĩ wa Ngai.”—Luka 4:43; Yoana 15:10, 17.

Ĩloele vitio ĩĩ nguvĩ wone maelesyo makuvĩ ma ĩvuku ya Yoana.