Mũtavanyʼa 3:11—“Nũseũvĩtye Kĩla Kĩndũ Kĩthĩwe Kĩseo Ĩvinda Yakyo”

“Nũseũvĩtye kĩla kĩndũ kĩthĩwe kĩseo ĩvinda yakyo. O na nĩwiĩte ĩvinda ya tene na tene ngoonĩ syoo; ĩndĩ andũ maikamanya mawĩa ala Ngai wa wʼo ũtethetye kuma mwambĩlĩlyo kũvika mũminũkĩlyo.”—Mũtavanyʼa 3:11, New World Translation.

“Nũseũvĩtye kĩla kĩndũ kĩthĩwe kĩseo ĩvinda yakyo. O na nĩwiĩte ĩvinda ya tene na tene ngoonĩ ya mũndũ; ĩndĩ vai mũndũ ũtonya kũmanya mawĩa ala Ngai ũtethetye kuma mwambĩlĩlyo kũvika mũminũkĩlyo.”—Mũtavanyʼa 3:11, New International Version.

Kĩla Ĩandĩko ya Mũtavanyʼa 3:11 Yonanasya

“Nũseũvĩtye kĩla kĩndũ kĩthĩwe kĩseo ĩvinda yakyo.” Ndeto ya Kĩevelania ĩla ĩalyũlĩtwe “kĩseo” no yonanyʼe maũndũ maingĩ eka o kĩndũ kĩkwoneka kĩ kyanake. O na ĩngĩ no ĩalyũlwe ta kĩndũ kĩvange nesa kana kyaĩlĩte. (Mũtavanyʼa 3:11) Mawĩa ma Ngai ma kwendeesya ti syĩndũ ila woombie syoka, ĩndĩ nĩ vamwe na maũndũ onthe ala wĩkaa nĩ kana eanĩsye kwenda kwake.—Ndanieli 2:21; 2 Vetelo 3:8; Ũvuanyʼo 4:11.

“O na nĩwiĩte ĩvinda ya tene na tene ngoonĩ syoo.” Ngai oombie andũ mekalae tene na tene. (Savuli 37:29) Kwoou, nĩ ũndũ ũkwosana na kĩlĩko kana, amombie me na wendi wa kwĩkala tene na tene. Ĩndĩ o na ũu wĩ o vo, asyai ma mbee, Atamu na Eva, nĩmaleile kũmwĩwʼa Ngai, na nũndũ wa ũu, meeyĩetee kĩkwʼũ, o vamwe na nzyawa syoo. (Mwambĩlĩlyo 3:17-19; Alomi 5:12) Ĩndĩ Ngai nĩwathanĩte “kwĩanĩsya kwenda kwa kĩla kĩndũ kĩ thayũ,” o vamwe na wendi wa andũ wa kwĩkala tene na tene. (Savuli 145:16) Mbivilia nĩeleetye kĩla Yeova wĩkĩte nĩ kana andũ methĩwe ĩngĩ na wĩkwatyo wa thayũ wa tene na tene.—Alomi 6:23.

“Andũ maikamanya mawĩa ala Ngai wa wʼo ũtethetye kuma mwambĩlĩlyo kũvika mũminũkĩlyo.” Ũĩ wa Ngai nĩ mwingĩ mũno na Mbivilia yaĩtye kana ‘ũitonya kũmanthĩka.’ (Alomi 11:33) O na ũu wĩ o vo, Ngai nĩwĩyũmbanĩtye kũvuanĩsya onthe ala mendaa kũmwendeesya ieleelo syake.—Amosi 3:7.

Mĩsoa Ĩla Ĩthyũlũlũkĩte Mũtavanyʼa 3:11

Ĩvuku ya Mũtavanʼya yaandĩkiwe nĩ Mũsumbĩ Solomoni wa Isilaeli ya tene, mũndũũme wĩsĩkĩe mũno nũndũ wa ũĩ ũla wanengetwe nĩ Ngai. Yĩthĩawa na ũtao mũseo ĩũlũ wa maũndũ ala matonya kũtũtethya thayũnĩ na ala matatonya kũtũtethya. (Mũtavanʼya 1:2, 3; 2:1, 17; 7:1; 12:1, 13) Kĩlungunĩ kya 3, Solomoni nũwetete maũndũ amwe ala mekĩkaa kĩla mũthenya thayũnĩ witũ. Ve maũndũ me kĩvathũkanyʼo twĩkaa mawetetwe ĩvukunĩ yĩu. (Mũtavanʼya 3:1-8, 10) Ngai nũnengete andũ ũthasyo wa kũnyuva meĩka maũndũ meva katĩ wa asu, na memeka ĩndĩĩ. (Kũtũngĩlĩlwa Kwa Mĩao 30:19, 20; Yosua 24:15) Solomoni aeleetye kana yĩla andũ meeka maũndũ kwosana na kĩeleelo kya Ngai na manenga ndaĩa “ĩvinda” yĩla ũtwʼĩte, nowʼo matanĩaa moseo ala maumanaa na kũtethya wĩa na kĩthito. Na ũsu nĩwʼo Solomoni ũwĩtĩte “mũthĩnzĩo wa Ngai.”—Mũtavanʼya 3:1, 12, 13.

Ĩloele vitio ĩĩ nguvĩ wone maelesyo makuvĩ ma ĩvuku ya Mũtavanyʼa.