Isaia 26:3—“Ũkamekalya Mũuonĩ Mwĩanĩu Ala Ilĩko Syoo Ilũmĩte Kwaku”

“Ũkamwĩkalya e mũuonĩ mwĩanĩu we ũla kĩlilikano kyake kĩlũlũmĩle kwaku we; nũndũ nũkũĩkĩĩaa.”—Isaia 26:3, The Bible in Kikamba, 1974.

“Ũkamekalya mũuonĩ mwĩanĩu ala ilĩko syoo ilũmĩte kwaku, nũndũ nĩmakũĩkĩĩe.”—Isaia 26:3, New International Version.

Kĩla Ĩandĩko ya Isaia 26:3 Yonanasya

Kwĩsĩla ndeto ii sya kwĩkĩa vinya, mwathani Isaia onanĩtye kana Ngai nũsũvĩaa ala mamũĩkĩĩaa vyũ. Ekaa ũu kwa kũmatetheesya mewʼe me asũvĩĩku na me na mũuo.

“Ũkamwĩkalya e mũuonĩ mwĩanĩu we ũla kĩlilikano kyake kĩlũlũmĩle kwaku we.” Ndeto ii ieleetye ala matwʼĩte vyũ ilĩkonĩ syoo kũmũĩkĩĩaa Yeovaa Ngai mavinda onthe. Ala mamũĩkĩĩaa Ngai nĩmethĩawa mesĩ kana me na vata wa kũmwĩkwatasya. Kwa ngelekanyʼo, mayĩkwatasya ũĩ woo yĩla mekwĩka motwi ma vata. Vandũ va ũu, mekaa maũndũ onthe ũndũ Ngai wendaa. (Nthimo 3:5, 6) Nĩmemanyĩasya woni wa Ngai kwa kũsoma Ndeto yake Mbivilia kwa ũito, na kũvindĩĩsya kwa ũliku ĩũlũ wa kĩla masoma. (Savuli 1:2; 119:15) Yĩla makwatwa nĩ mathĩna, nĩmamũvoyaa Yeova kuma ngoonĩ nĩ kana amatetheesye. (Savuli 37:5; 55:22) Kwa kwĩka ũu, monanasya kana nĩmamũĩkĩĩe Ngai, na nũndũ wa ũu nũmanengae mũuo.

“Ũkamwĩkalya e mũuonĩ mwĩanĩu.” Kĩthyomonĩ kya tene kya Kĩevelania, ndeto ĩla yonanasya “mũuo” nĩtũngĩlĩĩlwe kelĩ kwonanyʼa ũito; kwoou, nĩ kana ũito ũsu umĩlwʼe nesa, ndeto ii no ialyũlwe ta “mũuo wa kũendeea,” “mũuo mwĩanĩu,” kana “mũuo ũte maela.” Kwa ndeto ingĩ, ala mamũĩkĩĩaa Yeova vyũ nĩmatanĩaa mũuo, kana ũuu wa ngoonĩ na kĩlĩkonĩ, o na ethĩwa maũndũ moo mailye ata. (Savuli 112:7; 119:165) Mũuo ũũ wumanaa na kwĩthĩwa na ngwatanĩo ya vakuvĩ vamwe na Yeova, na kũtataa kwĩka kĩla kyaĩlĩte methonĩ make.—Nthimo 3:32; Isaia 48:18.

‘Mũuo mwĩanĩu’ ũyonanasya kana Ngai asiĩĩaa athũkũmi make maikakwatwe nĩ mathĩna kana maikethĩwe na mawĩmakĩo o na meva. (1 Samueli 1:6, 7; Yovu 6:1, 2; Savuli 31:9) Vandũ va ũu, nũmatetheeasya momĩanĩsye na mathĩna ala mamakwataa. (Isaia 41:10, 13) Nũsũngĩaa mboya syoo, na aimanenga ũĩ, vinya, na ũkiakisyo. (Savuli 94:19; Nthimo 2:6; Isaia 40:29) Nũndũ wa ũu, methĩawa matonya kwĩkala mauĩtye o na yĩla makwatwa nĩ mathĩna.—Avilivi 4:6, 7.

Mĩsoa Ĩla Ĩthyũlũlũkĩte Isaia 26:3

Mwathani Isaia aĩ kwʼo myakanĩ ya 700 mbee wa Klĩsto. Ĩvindanĩ yĩu na myakanĩ ĩla yaatĩĩe, andũ aingĩ Yuta mayamũthũkũmaa Yeova Ngai me aĩkĩĩku. Nũndũ wa ũu, Yeova nĩwesie kwĩtĩkĩlya ndũa ĩla nene, Yelusaleme, yanangwe mwakanĩ wa 607 mbee wa Klĩsto.

O na ũu wĩ o vo, myaka mbee wa 100 ndũa ĩsu ĩtanamba kwanangwa, Isaia nĩwaandĩkie wathi wa kũmũtaĩa Yeova ũla wonanĩtye wathani, na ũlekotiĩtwe kĩlungunĩ kya 26. (Isaia 26:1-6) Wathi ũsu waeleetye ĩvinda yũkĩte yĩla ndũa ĩmwe nthĩ ya Yuta yaĩ ĩtũngĩĩwe, na nĩvatonyeka ĩkethĩwa yaĩ Yelusaleme.

Yelusaleme nĩyesie kũtũngĩĩwa ĩtina wa mwaka wa 537 mbee wa Klĩsto. Ĩtina wa ũu, Ayuti aĩkĩĩku ala maĩ manasyoka Yelusaleme, maĩ matonya kwĩwʼa me asũvĩĩku na mayasya ũũ: “Twĩ na ndũa yĩ vinya.” (Isaia 26:1) O na ũu wĩ o vo, ngũta ndũmu sya ndũa ĩsu ti syo syatumaa yĩthĩwa na vinya. Vandũ va ũu, ũsũvĩo wa ndũa ĩsu waumanaa na ũathimo wa Yeova na ũsũvĩo wake.—Isaia 26:2.

Ũu nowʼo kũilye ũmũnthĩ. Ala mamũĩkĩĩaa Yeova vyũ mewʼaa me asũvĩĩku nũndũ mamwonaa e “ĩvia” yoo, kana wĩvitho woo.—Isaia 26:4.

Ĩloele vitio ĩĩ nguvĩ wone maelesyo makuvĩ ma ĩvuku ya Isaia.