KYONGO KYA ĨTHANGŨ YA MBEE | NO ŨMĨELEWE MBIVILIA
Nĩkĩ Waĩle Kũmĩelewa Mbivilia?
“Mbivilia nĩ ĩvuku ya ndĩni yĩsĩkĩe mũno. Ĩndĩ nĩ ĩvuku yĩeni na yĩyĩsa kũtethya andũ ma China.”—LIN, CHINA.
“Ndiona ũndũ ndonya kũelewa Mbivilia, nao nĩnaemiwe nĩ kũelewa nesa mavuku ma ndĩni ĩla nĩendaa ya Hindu.”—AMIT, INDIA.
“Nĩnĩnengete Mbivilia ndaĩa nũndũ nĩ ĩvuku ya tene na yĩthooaw’a mũno. Ĩndĩ o na ũu wĩ o vo, ndyaaĩsa kwona Mbivilia.”—YUMIKO, JAPAN.
Andũ aingĩ ĩũlũ wa nthĩ nĩmanengete Mbivilia ndaĩa. Ĩndĩ o na ũu wĩ o vo, no methĩwe matesĩ kĩndũ o na kĩmwe kana makethĩwa mesĩ o tũmaũndũ tũnini Mbivilianĩ. Ũu nĩw’o vailyĩ kwa andũ aingĩ ma Asia, o na kwa angĩ aingĩ ala mekalaa nthĩ ila Mbivilia ĩkwatĩkanaa laisi.
Ĩndĩ no wĩkũlye, ‘Nĩkĩ naĩle kwendeew’a nĩ kũmĩelewa Mbivilia?’ Kũmanya kĩla ĩvuku yĩĩ ĩtheu yĩneeneete no kũũtetheesye:
Ũkethĩwa wĩ mũtanu na wĩ mwĩanĩe
Ũkethĩwa ũtonya kũmĩanĩsya na mathĩna ma mũsyĩ
Ũkethĩwa ũtonya kũmĩanĩsya na mawĩmakĩo
Ũkethĩwa na ngwatanĩo nzeo na andũ
Ũkethĩwa ũtonya kũtũmĩa mbesa nesa
Kwa ngelekany’o, kwasũanĩa ĩũlũ wa Yoshiko kuma Japan. Nĩwasaanĩaw’a nĩ kĩla Mbivilia ĩneeneaa na avanga kũmĩsoma. Kweethĩiwe ata? Aĩtye atĩĩ: “Mbivilia nĩndetheesye ngamanya nĩkĩ nĩ thayũ, na ĩkandetheesya ngethĩwa na wĩkwatyo wa ĩvinda yũkĩte.” Aendeee kwasya: “Yu nĩthĩawa na ũtanu mbee wa ũndũ nailyĩ ndemanyĩĩtye Mbivilia.” Nake Amit, ũla ũwetiwe mbeenĩ nĩwatwie kwĩmanyĩsya Mbivilia. Aĩtye atĩĩ: “Nĩnaseng’ie mũno nũndũ neethĩie Mbivilia yĩ na ũvoo ũtonya kũtethya kĩla mũndũ.”
Mbivilia nĩtetheesye andũ milioni mbingĩ. Wĩona ata ũkamĩsoma na ũyona ũndũ ĩtonya ũkũtethya?