Nthembo ya Wovosyo Nĩyo Ĩkatuma Kwĩthĩwa Ũthayũũkyo

Ĩvinda ya kũlilikana kĩkwʼũ kya Yesũ yĩthĩawa no ĩvinda ĩseo ya kũsũanĩa moathimo ala tũkakwata nũndũ wa nthembo ya wovosyo. Ũmwe wa moathimo asu nĩ ũthayũũkyo. Yeova ndavangĩte andũ makusae. Nũndũ wa ũu, kĩkwʼũ nĩ kĩmwe kya syĩndũ ila itũũmĩasya mũno ngoonĩ. (1Ako 15:26) Yesũ nĩwaũmĩie ngoonĩ ĩla woonie amanyĩwʼa make me na kyeva nũndũ wa kĩkwʼũ kya Lasalo. (Yoa 11:33-35) Nũndũ Yesũ avwʼanene na Ĩthe wake, no twĩthĩwe na mũĩkĩĩo kana o nake Yeova nũũmĩaa mũno ĩla woona twĩ na kyeva. (Yoa 14:7) Yeova e na mea ma kwona ĩvinda yĩla ũkathayũũkya andũ ala makwie yĩ ĩviku, o naitũ nĩtwaĩle kwĩthĩwa na mea ma kwĩsa kwona ala makwie.—Yovu 14:14, 15.

Nũndũ Yeova nĩ Ngai wa mũvango, no twasye kana akathayũũkya andũ na mũvango. (1Ako 14:33, 40) Vandũ va andũ kũthi mathikonĩ, nĩvatonyeka andũ makethĩwa makombanaa kũthokya ala makwie. Nũsũanĩaa ĩũlũ wa ũthayũũkyo na mũno mũno ĩla wakwʼĩĩwa? (2Ako 4:17, 18) We nũmũtũngĩaa Yeova mũvea nũndũ wa nthembo ya wovosyo na nũndũ wa kũtũvuanĩsya kwĩsĩla Maandĩko kana kũkeethĩwa na ũthayũũkyo? —Ako 3:15.

• Nĩ mũnyanyau wĩva kana mũndũ wa mũsyĩ wĩenda kũmwona ĩngĩ?

• Nĩ mũndũ wĩva ũandĩkĩtwe Mbivilianĩ wĩenda kũmwona na kũneena nake?