Mũthenya ũmwe ĩa-mawĩoo amina kusũsya kĩkuu kyake kĩwʼũ nĩwoonie mũtumĩa ũmwe asembete moke ũkomana. Ĩla mũtumĩa ũsu wavikie vala ũĩ amwĩie atĩĩ: “Nenga nĩnywʼe, nĩngũũvoya, tũmanzĩ kuma kĩtetenĩ kyaku.” Mũtumĩa ũsu aneenie na Leveka enyivĩtye na e na ndaĩa. Leveka nĩwamanyie kana mũtumĩa ũsu aumĩte vaasa. Kwoou, atheesya kĩkuu nthĩ na mĩtũkĩ na eekĩa mũtumĩa ũsu kĩwʼũ kingĩ anywʼa alaũka. Leveka nĩwoonie ngamĩle ĩkũmi ila mũtumĩa ũsu waĩ nasyo itindiĩte o vu vakuvĩ, na iyaĩ inesa kũnywʼa kĩwʼũ nũndũ mũvalatĩ ndwaĩ na kĩwʼũ. Nĩwoonie mũtumĩa ũsu amũketee na amanya kana nĩwaĩle kũmwonyʼa ũlau ũndũ vatonyeka. Amina kũmũnenga kĩwʼũ amwĩie atĩĩ: “Nĩngũtavĩa ngamĩle syaku nasyo, mũvaka ilaũke.”—Mwambĩlĩlyo 24:17-19.

Ĩla Leveka waisye nũkũtavĩla ngamĩle kĩwʼũ ndendaa o kũinenga kalwʼũ kanini, ĩndĩ aisye kana eingʼithya nginya ilaũke. Ngamĩle yĩ na waũni no ĩnywʼe kĩwʼũ kya lita 95! Ngamĩle isu syĩ ĩkũmi ikethĩwa syaĩ na waũni ũu, Leveka ethĩwa atethisye wĩa mwingĩ mũno. Ĩndĩ veonekana kana ngamĩle isu iyaĩ na waũni mwingĩ mũno.a Ĩndĩ no twĩkũlye-ĩ, Leveka nĩweesĩ kana syĩnywʼa kĩwʼũ kingĩvĩte ũu atanamba kwasya nũkũingʼithya? Aiee. Nĩweeyũmbanĩtye na nĩwendaa kũtethya wĩa ũsu mwingĩ nĩ kana onanyʼe ũlau kwa mũtumĩa ũsu ũtamwĩsĩ. Mũtumĩa ũsu nĩweetĩkĩlile Leveka angʼithye ngamĩle. Na ĩndĩ amũsyaĩĩsya aisyokanĩsya ĩngĩ na ĩngĩ kĩthimanĩ, aendeee kũtavĩĩa kĩwʼũ mũvalatĩnĩ.—Mwambĩlĩlyo 24:20, 21.