Ũndũ Ũtonya Kwĩmanyĩsya Ĩũlũ wa Ngai

Nũtonya kwĩmanyĩsya ĩũlũ wa Yeova kwa kũsoma Mbivilia. Tene Ngai nĩwanyuvie andũ amwe maandĩke mesilya make. Moandĩko asu metawa Mbivilia. Ũmũnthĩ twĩmanyĩasya ĩũlũ wa Ngai kwa kũsoma Mbivilia. Nũndũ wa kwĩthĩwa Mbivilia yĩ na ndeto kana ũtũmani wa Yeova, o na ĩngĩ nĩyĩtawa Ndeto ya Ngai. Nĩtũtonya kũĩkĩĩa ũndũ Mbivilia yaasya nũndũ Yeova ndaneenaa ũvũngũ nongi. “Kũitonyeka Ngai kũneena ũvũngũ.” (Aevelania 6:18) Ndeto ya Ngai yĩna ũla wʼo.—Yoana 17:17.

Mbivilia nĩ ũmwe wa mĩthĩnzĩo ya Ngai kwitũ ĩla ya vata mũno. Yo nĩ ta valũa kuma kwa ĩthe wĩ wendo kwa syana syake. Ĩtũtavasya ĩũlũ wa watho wa Ngai kũalyũla nthĩ ĩtwʼĩke vandũ vaseo mũno va kwĩkala thayũ—valatiso. Ĩtũtavasya ũndũ wĩkĩte ĩvinda yĩla ĩvĩtũku, ũndũ ũnũkwĩka yuyu, na ũndũ ũkeka ĩvinda yĩla yũkĩte kwondũ wa syana syake ila mbĩkĩĩku. O na nĩtũtethasya kwona ũsũngĩo wa mathĩna maitũ na kũkwata ũtanu.—2 Timotheo 3:16, 17.

Ngũsĩ sya Yeova nĩ anyanya ma Ngai; makaũtethya ũmanye ũndũ Mbivilia ĩmanyĩasya. Kĩla ũkwĩka no kũmatavya kana wĩenda kwĩmanyĩsya Mbivilia. Mayĩĩvĩthasya mbesa sya kwĩka ũu. (Mathayo 10:8) Kwongeleela ũu, nũtonya kũthi kũmbana mawũmbano ma Kĩklĩsto. Mekĩawa nthĩnĩ wa kũndũ kwa ũthaithi kwĩtawa Nyũmba sya Ũsumbĩ. Waenda kũmbana mawũmbano ma Kĩklĩsto, ukaendeea kwĩana mĩtũkĩ mũno nthĩnĩ wa ũmanyi wa Ngai.

Nũtonya kwĩmanyĩsya ĩũlũ wa Ngai kumana na syĩndũ ila ũtwʼĩkĩthĩtye. Kwa ngelekanʼyo, Mbivilia yaasya atĩĩ: “Ngai nĩwoombie matu na nthĩ.” (Mwambĩlĩlyo 1:1, NW) Yĩla Yeova woombie “matu,” nĩwatwʼĩkĩthisye syũa. Yuyu ũndũ ũsu wĩtũmanyĩthya ata ĩũlũ wa Ngai? Wĩtũmanyĩthya kana Yeova e ũtonyi mũnene. Nowe e weka waĩ atonya kũtwʼĩkĩthya kĩndũ kĩ vinya ta syũa. Ĩngĩ ũndũ ũsu wĩtũmanyĩthya kana Yeova nĩ mũĩ, nũndũ nĩkwendekaa ũĩ wa kũtwʼĩkĩthya syũa, yĩla yumasya ũvyũvu na kyeni yĩte kwĩsa kũthelelwa nĩ mwaki wayo nongi.

Wũmbi wa Yeova wonanasya kana nũtwendete. Sũanĩa mĩthemba yonthe ya matunda me kĩvathũkanʼyo ala me ĩũlũ wa nthĩ. Kethĩwa Yeova nĩwendaa, ethĩwa atũnengie mũthemba o ũmwe wa ĩtunda—kana akalea kũtũnenga mũthemba o na ũmwe. Vandũ va ũu, Yeova atũnengie mĩvwʼanĩle mingĩ ya matunda me myũmbo, monene, malangi, na mĩsamĩle yĩ ũvathũkanʼyo mwingĩ. Ũu wonanasya kana Yeova ti Ngai wa wendo wʼoka, ĩndĩ o ta ũu nĩ mũlau mũno na nũsũanĩaa ĩũlũ wa mavata ma andũ na e kanee.—Savuli 104:24.