9. Kwosana na ĩandĩko ya Kuma 12:6, kalondu ka Vasaka kaaĩle kũawa ĩndĩĩ? (Ĩngĩ, sisya ĩsandũkũ “Kalondu ka Vasaka Kaaĩle Kũthĩnzwa Ĩndĩĩ?”)

⁹ Kwosana na ĩandĩko ya Kuma 12:6, kalondu kau kaaĩle kũthĩnzwa “wĩoo.” Mbivilia imwe, ta ĩla ya Ayuti yĩtawa Tanakh, itũmĩĩte ndeto “kwĩ ũmololi,” vandũ va “wĩoo.” Kwoou, kalondu kau kaaĩle kũthĩnzwa syũa yamina kũthũa, kwĩ ũmololi, mwambĩlĩlyonĩ wa matukũ 14, mwei wa Nisani.

10. Kwosana na andũ amwe, kalondu ka Vasaka kaaĩle kũthĩnzwa ĩndĩĩ, na ũu ũtonya kũtuma mũndũ akũlya ata?

¹⁰ Ĩtina wa ĩvinda ĩna, Ayuti amwe nĩmambĩĩie kũsũanĩa kana kũthĩnza malondu onthe ala maetawe ĩkalũnĩ, no nginya kwĩthĩwe kwakuaa masaa maingĩ. Kwoou, matwʼa kana ndeto “wĩoo,” ĩla yĩ ĩandĩkonĩ ya Kuma 12:6 yawetaa ĩũlũ wa mũthenya ũsu wa matukũ 14 ũkĩte kũthela. Mũthenya ũsu wambĩĩaa kũthela kuma syũa yeeka nginya yathũa. (Syũa yamina kũthũa oou, mũthenya wa matukũ 15, ma mwei wa Nisani nĩwambĩĩaa).. Ethĩwa kwosana na Ayuti asu kalondu ka Vasaka kaaĩle kũthĩnzwa mũthenya wa Nisani matukũ 14 ũkĩte kũthela, ĩ mboka ya Vasaka yaaĩle kũĩwa ĩndĩĩ? Kwosana na mũsomi ũmwe wĩtawa Jonathan Klawans, mboka ĩsu yaaĩle kũĩwa matukũ 15 ma mwei ũsu. Ĩndĩ mũsomi ũsu aisye kana ĩvuku ya Kuma yĩyĩeleetye ũndũ ũsu nesa. Ingĩ aisye kana mavuku ala maeleetye momanyĩsyo ma Ayuti mayonanĩtye nesa ũndũ Vasaka yalilikanawa mbee wa ĩkalũ kwanangwa mwaka wa 70.