23. Nĩ kyaũ Luthi wambĩĩie kũsũanĩa, na Mĩao ya Mose yanenganĩte mwĩao wĩva ũla watethasya andũ ala ngya? (O na ĩngĩ, sisya maelesyo ma kwongeleela.)

²³ Ĩtina wa aka aa elĩ kwĩkalanga Mbetheleemu kwa kavinda, Luthi nĩwambĩĩie kũsũanĩa kĩla ũtonya kwĩka nĩ kana eanĩsye mavata make na Naomi. Nĩwamanyie kana nthĩnĩ wa Mĩao ĩla Yeova wanengete andũ make ma Isilaeli, vaĩ mwĩao mũseo mũno wasũvĩaa andũ ala ngya. Nĩmanengetwe mwanya wa kũthi mĩũndanĩ ĩvinda ya ngetha na maikolanyʼa matialyo ala matiawa nĩ akethi vamwe na lĩu ũla wameaa kũu ũtee wa mĩũnda.b—Ali. 19:9, 10; Kũt. 24:19-21.

24, 25. Luthi eekie ata avika mĩũndanĩ ya Mboasi, na wĩa wa kũkolanyʼa matialyo wailye ata?

²⁴ Mũthenya ũmwe ĩvinda ya kũketha mbaale, twĩ ta Mwei 4 ũu kwosana na kalenda kaitũ, Luthi nĩwaendie mĩũndanĩ one kana ve mũndũ ũkũmwĩtĩkĩlya akolanyʼe matialyo mũũndanĩ wake. Nĩwavikie mĩũndanĩ ya mũndũũme ũmwe weetawa Mboasi, ũla waĩ mũthwii na waĩ ũko na Elimeleki mũũme wa Naomi. O na kau Mĩao nĩyamũnengete mwanya wa kũkolanyʼa matialyo, Luthi ndaavika alikĩte o mũũndanĩ wene atekwenda ũmanya, ĩndĩ nĩwakũlilye mwanya mũndũũme ũla Mboasi wamwiĩte aũngamĩe athũkũmi. Mũndũũme ũsu nĩwamũnengie mwanya, na ĩndĩ Luthi alika wĩanĩ.—Lu. 1:22–2:3, 7.