Ve ũndũ ũngĩ ũkonetye ũnyanya waku na Ngai ũtaĩle kũlwa nĩwʼo. Mũandĩki wa savuli, Ndaviti, aandĩkie atĩĩ: “Samai mũsisye kana Yeova nĩ mũseo.” (Savuli 34:8) Ve ũndũ wa kwĩkĩa wia waĩ ũmũkwatĩte Ndaviti ayĩandĩka Savuli ya 34. Twĩasya waĩ ũndũ wa kwĩkĩa wia nũndũ amũtolokete Mũsumbĩ Saulo ũla wendaa kũmũaa. Na vailye oou, alasimĩkĩte kũmantha wĩvitho katĩ wa Avilisiti ala maĩ amaitha make. E kũu, Ndaviti nĩweetwʼĩkĩthisye mũndũ wa ndũũka na ũĩ wake watuma avonoka.—1 Samueli 21:10-15.

Ndaviti ndaasũanĩa kana avĩtiwʼe nĩ ũĩ wake. Ĩndĩ, oonie kũu kwĩ kwʼoko kwa Yeova. Mwambĩĩonĩ wa savuli ĩsu twaweta aisye atĩĩ: “Nĩnamũmanthie Yeova, na anzũngĩa, na ambonokya kuma wʼĩanĩ wakwa wʼonthe.” (Savuli 34:4) Kwoou, Ndaviti ayĩa andũ ala angĩ, “Samai mũsisye kana Yeova nĩ mũseo,” ameaa ũu nũndũ we mwene nĩweeyoneete kana Yeova nĩ mũseo.a

“Nĩ atanu ala mesĩ me na nzaa ya kĩ-veva.”—Mathayo 5:3.