-
Mũthengeee Ngai Kwĩsĩla MboyaTanĩa Thayũ Tene na Tene!—Masomo ma Mbivilia Matonya Kũũtethya
-
-
Mũthengeee Ngai Kwĩsĩla Mboya
Nĩwĩsaa kwĩwʼa ũyenda ũtao wa kũũtetheesya thayũnĩ? Wĩ na makũlyo ma vata ũendeee kũmantha mosũngĩo? Wĩ na vata wa kũkiakiwʼa na kwĩkĩwa vinya? No wende kũmũthengeea Yeova mũnango? Mboya no yĩũtetheesye maũndũnĩ asu onthe. Ĩndĩ twaĩle kũvoya ata? We Ngai nĩwĩthukĩĩasya mboya syonthe? Ũtonya kwĩka ata nĩ kana ethukĩĩsye mboya syaku? Eka twone.
1. Twaĩle kũvoya ũũ, na tũtonya kũvoya ĩũlũ wa kyaũ?
Yesũ amanyĩisye kana twaĩle kũvoya Ĩthe witũ wa ĩtunĩ e weka. O nake Yesũ nĩwamũvoyie Yeova. Aisye ũũ: “Inywʼĩ ĩndĩ voyaai atĩĩ: ‘Asa waitũ ũla wĩ ĩtunĩ . . . ’” (Mathayo 6:9) Yĩla twamũvoya Yeova, ũnyanya witũ vamwe nake nũlũlũmĩlaa.
Nĩtũtonya kũvoya ĩũlũ wa maũndũ onthe. Ĩndĩ nĩ kana Ngai asũngĩe mboya sitũ, no nginya syĩthĩwe syosanĩte na kwenda kwake. Mbivilia yaĩtye: “Twavoya kĩndũ o na kĩva kwosana na kwenda kwake [Ngai], nũtwĩthukĩĩasya.” (1 Yoana 5:14) Yesũ nĩwawetie maũndũ amwe maĩlĩte ala tũtonya kũvoya ĩũlũ wamo. (Soma Mathayo 6:9-13.) O vamwe na kũmũtavya Ngai mathĩna ala twĩ namo, tũyaĩlĩte kũlwa nĩ kũmũtũngĩa mũvea nũndũ wa maũndũ ala ũtwĩkĩte na kũmũvoya atetheesye andũ ala angĩ.
2. Twaĩle kũvoya ata?
Mbivilia ĩtwĩkĩĩte vinya ‘tũmũtulũĩle Ngai ngoo sitũ.’ (Savuli 62:8) Kwoou mboya sitũ syaĩlĩte kwĩthĩwa syumĩte ngoonĩ. No tũvoye na wasya, tũte kumya wasya, na ti nginya twĩthĩwe tũilye ũndũ mũna. Kĩla kya vata nĩ twĩthĩwe na ndaĩa. O na ĩngĩ, no tũvoye ĩvinda o na yĩva na twĩ vandũ o na va.
3. Ngai asũngĩaa mboya sitũ ata?
Ekaa ũu kwa nzĩa syĩ kĩvathũkanyʼo. Yeova nũtũnengete Ndeto yake Mbivilia, ĩla ĩtũtetheeasya kũkwata mosũngĩo ma makũlyo maitũ. Kũsoma Ndeto ya Ngai nĩkũtonya ‘kũĩvya ũla ũte na ũmanyi.’ (Savuli 19:7; Soma Yakovo 1:5.) Yeova nũtonya kũtũtetheesya twĩthĩwe na mũuo wa kĩlĩko yĩla twĩ mathĩnanĩ. O na ĩngĩ, no ekĩe athũkũmi make vinya matũtetheesye yĩla twĩ na vata.
ĨMANYĨSYE MŨNANGO
Ĩmanyĩsye wone ũndũ ũtonya kũvoyaa kuma ngoonĩ nĩ kana ũmwendeesye Ngai, na ũyona ũndũ kũvoya kũtonya ũkũtethya.
4. Ve maũndũ Ngai wendaa twĩanĩsye yĩla tũũvoya
Nĩ maũndũ meva matonya kũtuma mboya sitũ syĩthukĩĩwʼa nĩ Ngai, kana akalea kũsyĩthukĩĩsya? Ĩloelei VITIO.
Yeova nĩwendaa tũmũvoyae. Somai Savuli 65:2, na ĩndĩ mũineenea makũlyo aa:
Nũkwona “ũla wĩwʼaa mboya” ta wendaa we ũmũvoye? Nĩkĩ wasũngĩa ũu?
Nĩtwaĩlĩte kũtata vyũ tũatĩĩe myolooto ya Ngai ethĩwa nĩtũkwenda ethukĩĩasye mboya sitũ. Somai Mika 3:4 na 1 Vetelo 3:12, na ĩndĩ mũineenea ĩkũlyo yĩĩ:
Ũtonya kwĩka ata nĩ kana Yeova ethukĩĩsye mboya syaku?
Ĩvinda ya kaũ, asikalĩ ma ngalĩ syelĩ nĩmatonya kũvoya makwate ũsindi. We nũkwona Ngai ta ũtonya kũsũngĩa mboya isu?
5. Mboya sitũ syaĩle kuma ngoonĩ
Andũ amwe mamanyĩĩtwʼe kũtũngĩlĩĩlaa mboya o ĩla kĩla ĩvinda. Ĩndĩ ũu nĩwʼo Ngai wendaa tũmũvoye? Somai Mathayo 6:7, na ĩndĩ mũineenea ĩkũlyo yĩĩ:
Ũtonya kwĩka ata nĩ kana ndũkatũngĩlĩĩlae “ndeto o ila ila” yĩla ũũvoya?
Kĩla mũthenya, no ũsũanĩae ũathimo ũmwe ũkwatĩte thayũnĩ waku na ĩndĩ ũimũtũngĩa Yeova mũvea nũndũ wa ũathimo ũsu. Weeka ũu kĩla mũthenya, ĩtina wa kyumwa kĩmwe ũkeethĩwa ũvoyete ĩũlũ wa maũndũ mũonza me kĩvathũkanyʼo ũte kwĩtũngĩlĩĩla.
Ĩthe wa kana endaa kamũtavye ũndũ kekwĩwʼa ngoonĩ. O nake Yeova endaa tũmũvoye kuma ngoonĩ
6. Mboya nĩ mũthĩnzĩo kuma kwa Ngai
Mboya ĩtonya kũtũnenga vinya ata, yĩla kũseo o na yĩla kũthũku? Ĩloelei VITIO.
Mbivilia ĩtũtavĩtye kana mboya no ĩtũtetheesye tũkethĩwa na mũuo wa kĩlĩko. Somai Avilivi 4:6, 7, na ĩndĩ mũineenea makũlyo aa:
O na kau ti mavinda onthe mboya ĩtumaa mathĩna maitũ mathela, ĩtethasya ata?
Nĩ maũndũ meva ũtonya kwenda kũvoya?
We nĩwĩsĩ?
Ndeto “ameni” yonanasya “ũu ũtwʼĩke ũu.” Kuma tene vyũ, andũ nĩmethĩĩtwe mayasya “ameni” mũthyanĩ wa mboya syoo.—1 Mavinda 16:36.
7. Manthaa ĩvinda ya kũvoya
Mavinda amwe nĩtũtonya kũkwatana mũno nginya tũkolwa nĩ kũvoya. Yesũ oonaa kũvoya kwĩ kwa vata ata? Somai Mathayo 14:23, na Maliko 1:35, na ĩndĩ mũineenea makũlyo aa:
Yesũ ekaa ata nĩ kana akwate ĩvinda ya kũvoya?
Ũtonya kũkwata ĩvinda ya kũvoya ĩndĩĩ?
ANDŨ AMWE MAASYA: “Mboya no ya kũtũtetheesya twĩwʼe nesa.”
We ũtonya kwasya ata?
KĨLA TWEEMANYĨSYA
Mboya sya kuma ngoonĩ nitũtetheeasya kũmũthengeea Ngai, kũkwata mũuo wa kĩlĩko, na nitũnengae vinya ũla tũkwenda nĩ kana tũmwendeesye Yeova.
Makũlyo ma Kũsyokeleela
Twaĩle kũvoya ũũ?
Twaĩle kũvoya ata?
Mboya ĩtonya kũtũtethya ata?
MAŨNDŨ ANGĨ MA KWĨMANYĨSYA
Soma ũkwate mosũngĩo ma makũlyo ala makũlawʼa mavinda maingĩ ĩũlũ wa mboya.
“Maũndũ Mũonza Waĩle Kũmanya Ĩũlũ wa Mboya” (Mũsyaĩĩsya, Ĩtukũ 1, Mwei wa 10, 2010)
Ĩmanyĩsye wone nĩkĩ nĩ ũndũ wa vata kũvoya na ũndũ ũtonya kwaĩlangya mboya syaku.
Soma wone Mbivilia yaĩtye twaĩle kũvoya ũũ.
Ũyĩloela wathi ũũ, sisya wone ethĩwa no nginya tũvoye twĩ vandũ vana, kana tũvoye saa na.
-
-
Endeea Kwĩka MaendeeoTanĩa Thayũ Tene na Tene!—Masomo ma Mbivilia Matonya Kũũtethya
-
-
4. Ndũkaeke kũneena na Mũnyanyau ũla mũnene
Kũvoya na kwĩmanyĩsya Mbivilia nĩkũũtetheesye ũkatwʼĩka mũnyanya wa Yeova. Maũndũ asu matonya kũũtetheesya ata ũkamũthengeea mũnango?
Somai Savuli 62:8, na ĩndĩ mũineenea ĩkũlyo yĩĩ:
Nĩ kana ũlũlũmĩĩlye ũnyanya waku na Yeova, ũtonya kwĩka ata waĩlangye mboya syaku?
Somai Savuli 1:2, na ĩndĩ mũineenea ĩkũlyo yĩĩ:
Nĩ kana ũlũlũmĩĩlye ũnyanya waku na Yeova, ũtonya kwĩka ata nĩ kana waĩlangye ũndũ ũsomaa Mbivilia?
Ũtonya kwĩka ata nĩ kana ũtethekae mũnango yĩla ũkwĩmanyĩsya Mbivilia we mwene? Nĩ kana wone maũndũ amwe ũtonya kwĩka, ĩloelei VITIO, na ĩndĩ mũineenea makũlyo ala maatĩĩe.
Nĩ maũndũ meva woona vitionĩ ĩsu ũtonya kũtũmĩa?
Nĩ maũndũ ta meva ũtonya kwenda kwĩmanyĩsya?
-