Nyuva Anyanya Maku kwa Ũĩ

Anyanya ma vakuvĩ nĩmatumaa tũtana mũnango mavindanĩ ala maseo, na makatwĩkĩa vinya yĩla maũndũ meeta. Ĩndĩ Mbivilia nĩtũkanĩtye kana ti kĩla mũndũ ne mũnyanya mũseo. Kwoou ũtonya kũnyuva anyanya aseo ata? Kwasũanĩa makũlyo aa maatĩĩe.

1. Anyanya ala wanyuva matonya kũtuma wĩthĩwa wĩ mũndũ ũilye ata?

Mavinda maingĩ nĩtũkothaa kũtutya andũ ala tũtindanasya namo. Na ũu nĩ wʼo, twĩthĩwe tũtindanasya namo twenene metho kwa metho, kana nĩ isesenĩ sya kũea ngewa. Mbivilia ĩtũtavĩtye atĩĩ: “Endaa na andũ oĩ, ũkeethĩwa mũĩ; ĩndĩ ũla ũtindanasya na ndia [ala matamwendete Yeova] akathĩna.” (Nthimo 13:20) Anyanya ala mamwendete Yeova na mamũthaithaa no maũtetheesye ũkamũthengeea, na ũyĩkaa motwi maseo. Ĩndĩ tweethĩwa na ũnyanya wa vakuvĩ na ala matamwendete, no matume twĩsa kũmũtia. Kĩu nĩkyo kĩtumi Mbivilia ĩtwĩkĩĩte vinya tũnyuvae anyanya maitũ kwa ũĩ! Yĩla twatuma ndũũ na andũ ala mamwendete Ngai, ithyonthe tũkekĩanaa vinya twĩkae maũndũ ala maseo. Tũkeethĩwa tũtonya ‘kũendeea kũthangaanyʼa na kwakana ithyĩ kwa ithyĩ.’—1 Athesalonika 5:11.

2. Anyanya maku matonya kũtuma Yeova ewʼa ata?

Yeova nũnyuvaa anyanya make nesa. Mbivilia yaĩtye: “Ũnyanya wake nĩ wake na ũla mũlũngalu.” (Nthimo 3:32) Wĩona Yeova ta ũtonya kwĩwʼa ata tũkanyuva andũ ala matamwendete methĩwe anyanya maitũ? No athate mũno! (Soma Yakovo 4:4.) O vamwe na ũu, Yeova akatwĩtĩkĩla twĩthĩwe anyanyae twaleana vyũ na kĩtindo kĩthũku, twamũthengeea, na twekala vakuvĩ na ala mamwendete.—Savuli 15:1-4.

ĨMANYĨSYE MŨNANGO

3. Ĩthĩwa wĩ metho ndũkelikye kĩtindonĩ kĩthũku

Andũ ala matamwendete Ngai na myolooto yake ya mwĩkalĩle, nĩ kĩtindo kĩthũku. Ĩloelei VITIO, na ĩndĩ mũineenea ĩkũlyo yĩla yĩatĩĩe.

VITIO: Ĩmanyĩsye Kũleana na Kĩtindo Kĩthũku (6:17)

• Tũtonya kũlika kĩtindonĩ kĩthũku ata tũteũmanya?

Somai 1 Akolintho 15:33, na ĩndĩ mũineenea makũlyo aa:

• Nĩ andũ meva matonya kwĩthĩwa me kĩtindo kĩthũku kwaku? Nĩkĩ wasũngĩa ũu?

Somai Savuli 119:63, na ĩndĩ mũineenea ĩkũlyo yĩĩ:

• Waĩlĩte kũsisya kyaũ ũtanamba kũnyuva mũndũ ethĩwe mũnyanyau?

4. No tũkwate anyanya aseo andũnĩ me kĩvathũkanyʼo

Mbivilia nĩyĩeleetye ĩũlũ wa aũme elĩ maĩ ma mbaĩ ya tene ya Isilaeli, namo nĩ Ndaviti na Yonathani. Yonathani nĩwamũkũĩe Ndaviti na myaka mingĩ, na aĩ mwana wa mũsumbĩ. Ĩndĩ o na ũu wĩ o vo, nĩmatumie ndũũ ngamu mũno. Somai 1 Samueli 18:1, na ĩndĩ mũineenea ĩkũlyo yĩĩ:

• Nĩkĩ ti kĩla ĩvinda anyanya maitũ maĩle kwĩthĩwa me o ma yĩika yitũ, kana kĩlasi kitũ?

Somai Alomi 1:11, 12, na ĩndĩ mũineenea ĩkũlyo yĩĩ:

• Anyanya ala mamwendete Yeova matonya kwĩkĩana vinya ata?

Vitionĩ ĩno, sisya wone ũndũ mwana-a-asa ũmwe wa mũika wakwatie anyanya kuma kũndũ o na ũtataĩaa. Ĩloelei VITIO, na ĩndĩ mũineenea makũlyo ala maatĩĩe.

VITIO: Mantha Anyanya Kũla Andũ Mateũsũanĩa Kana no Moneke (5:06)

• Kwosana na ũndũ twoona vitionĩ, nĩkĩ asyai ma Akil maĩ na nzika ĩũlũ wa anyanya make ku sukulu?

• Nĩ maũndũ meva matumaa mbeenĩ amona me anyanya aseo?

• Nĩ kyaũ kyamũtetheeisye aeka kwĩwʼaa ta wĩ weka?

5. Ũndũ tũtonya kwĩthĩwa anyanya aseo

VITIO: Mũnyanya wa Wʼo Nũũ? (4:14)

Somai Nthimo 18:24 na 27:17, na ĩndĩ mũineenea makũlyo aa:

• Anyanya ma wʼo matethanasya ata?

• We wĩ na anyanya aseo ta asu? Ethĩwa ndwĩ namo, ũtonya kũmakwata ata?

Somai Avilivi 2:4, na ĩndĩ mũineenea ĩkũlyo yĩĩ:

• Nĩ kana wĩthĩwe na anyanya aseo, we mwene nĩwaĩle kwĩthĩwa wĩ mũnyanya mũseo. Ũtonya kwĩka ũu ata?

KĨLA TWEEMANYĨSYA

Yĩla twanyuva anyanya maitũ kwa ũĩ, Yeova nũtanaa mũno, na ithyĩ ene nĩtũtethekaa.

Makũlyo ma Kũsyokeleela

• Nĩkĩ ũndũ tũũnyuva anyanya ne ũndũ wa vata kwa Yeova?

• Twaĩlĩte kwĩvathana na anyanya ma mũthemba mwaũ?

• Ũtonya kwaka ngwatanĩo ndũmu ata na anyanya ala mamwendete Yeova?

MAŨNDŨ ANGĨ MA KWĨMANYĨSYA

Soma wone ũndũ anyanya ma wʼo matonya kũtũtethya mavindanĩ ma thĩna.

“Nĩtũlũlũmĩlyei Ũnyanya Witũ Mũthya Ũtanavika” (Mũsyaĩĩsya, Mwei wa 11, 2019)

Soma wone matambya ala ũtonya kwosa nĩ kana ũkwate anyanya ma wʼo.

“Ndonya Kũkwata Anyanya Aseo Ata?” (Maswali Ambayo Vijana Huuliza—Majibu Yafanyayo Kazi, Ĩvuku ya 1, kĩlungu kya 8)

Waĩlĩte kũmanya kyaũ ĩũlũ wa kũmantha anyanya isesenĩ sya kũea ngewa Indanetinĩ?

Tũmĩa na Ũĩ Isese sya Kũea Ngewa Indanetinĩ (4:12)

Ngewanĩ yĩ na kyongo, “Nĩnendaa Mũno Kwĩthĩwa na Mũndũ Nĩta Tata,” soma wone kĩla kyatumie mũndũũme ũmwe atwʼa kũnyuva anyanya make ĩngĩ.

“Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 4, 2012)

1. Twaĩlĩte kũlilikana kyaũ yĩla tũũnyuva ũndũ wa kwĩtanĩthya?

Nĩ ũndũ wĩva wendete kwĩka yĩla ũthyũmũĩte? Amwe mendete kũtũmĩa ĩvinda yoo ya kũthyũmũa me o mũsyĩ kwoo maisoma ĩvuku, mayĩthukĩĩsya wathi, mayĩloela sinema, kana kũsisya syĩndũ Indanetinĩ. Namo angĩ mendete o kũtindanyʼa na anyanya moo, kũthi kũthambĩa kana kũthaũka ĩthaũ ĩna. O na ethĩwa twendete kwĩka ata, nĩtwaĩle kũĩkĩĩthya kana maũndũ ala twanyuva kwĩtanĩthya namo nĩ ala “metĩkĩlĩkaa kwa Mwĩaĩi.” (Aeveso 5:10) Nĩ ũndũ wa vata tũelewe ũndũ ũsu nũndũ maũndũ maingĩ ma kwĩtanĩthya ũmũnthĩ mausũĩte maũndũ ala Yeova ũmenete. Maũndũ ta ũngʼendu, ũlaalai, kana kũneenanyʼa na maveva. (Soma Savuli 11:5.) Nĩ kyaũ kĩtonya kũtũtetheesya twĩke motwi ma ũĩ yĩla tũũnyuva maũndũ ma kwĩtanĩthya?

Twanyuva anyanya ala mamwendete Yeova, makatumaa tũnyuva maũndũ ma kwĩtanĩthya ala maĩlĩte. O tondũ tũnoonie ĩsomonĩ ya 48, ũla ‘ũendaa na andũ oĩ akeethĩwa mũĩ.’ Ĩndĩ tweethĩwa na kĩmanyĩo kya kũtindanasya na ala matendete myolooto ya Ngai, ‘tũkathĩna.’—Nthimo 13:20.