Watchtower LIBRARY INDANETINĨ

Maũndũ Ala Wĩa wa Kũtavanyʼa Wĩanĩĩtye “Mĩũnda . . . Nĩ Mĩathĩku Kũvika Ũkethwa”

Ũsumbĩ wa Ngai Nũsumbĩkĩte!
- 12. Ngelekanyʼo ya mbeke ya kalatali ĩkonanĩtye ata na wĩa wa ngetha ũmũnthĩ? (Ĩngĩ sisya kyati kĩ na kyongo, “Kwongeleka kwa Amanyĩwʼa ma Mbivilia.”)
  
  ¹² (1) Kwĩana: Ngelekanyʼo ĩsu yonanĩtye kũnyaĩĩka kwa ũvoo ĩũlũ wa Ũsumbĩ na kwĩana kwa kĩkundi kya Kĩklĩsto. Kuma mwaka wa 1919 akethi me na kĩthito nĩmethĩĩtwe mayũmbanĩwʼa kĩkundinĩ kya Kĩklĩsto. Ĩvinda yĩu akethi asu maĩ anini, ĩndĩ mongeleka mĩtũkĩ mũno. Twĩasya ũu nũndũ kuma mwambĩĩonĩ wa myaka ya 1900 nginya ũmũnthĩ, kwĩthĩĩtwe na wongeleku mũnene mũno. (Isa. 60:22) (2) Ũĩkĩĩthyo: Kwĩana kwa kĩkundi kya Kĩklĩsto kwĩthĩĩtwe kũtasiĩĩka. O na kau amaitha ma Ngai nĩmatatie ũndũ matonya kũsiĩĩa mbeke ĩsu nini ndĩkeane, no yaendeeie kwĩana na yakĩlya vinya isiĩĩi syonthe. (Isa. 54:17) (3) Wĩkalo: “Nyũnyi sya yayaya” ila ikwataa wĩkalo ungu wa kĩtĩ kĩu nĩ andũ milioni mbingĩ kuma nthĩ ta 240, ala mendete ũlũngalu. Andũ asu nĩmetĩkĩlĩte ũvoo ĩũlũ wa Ũsumbĩ na makalika kĩkundinĩ kya Kĩklĩsto. (Esek. 17:23) Vau nĩmakwataa lĩu wa kĩ-veva, ũthũmũo, na ũsũvĩo.—Isa. 32:1, 2; 54:13.
  
  Ngelekanyʼo ya mbeke ya kalatali yonanasya kana ala me kĩkundinĩ kya Kĩklĩsto nĩmakwataa wĩkalo na ũsũvĩo (Sisya kalungu ka 11, na 12)

Maũndũ Ala Wĩa wa Kũtavanyʼa Wĩanĩĩtye “Mĩũnda . . . Nĩ Mĩathĩku Kũvika Ũkethwa”

Ũsumbĩ wa Ngai Nũsumbĩkĩte!
- “ŨLA MŨNINI” NŨTWʼĨKĨTE “MBAĨ YĨ VINYA”
  
  MBIVILIA yaĩtye atĩĩ: “Ũla mũnini akatwʼĩka ngili, na ũla mũnini akeethĩwa mbaĩ yĩ vinya: nyie, Yeova, ngakalaata ũndũ ũsu ĩvinda yawʼo.” (Isa. 60:22) Wathani ũsu wĩanĩĩte ata? Kwĩanĩa kwawʼo kũtumĩte ala methĩĩtwe maimũthũkũma Yeova kwa myaka mingĩ methĩwa na mawoni meva?
  
  Börje Nilsson (e na myaka 84, avatisiwe 1943). Börje aĩtye ũũ: “Nĩngũlilikana mwana-a-asa ũmwe mwĩtĩkĩwʼa mauta, ũla waĩ mũtavanyʼa wa ĩvinda yonthe myakanĩ ya 1920. Mwana-a-asa ũsu nĩwanengiwe wĩa wa kũtavanyʼa vakuvĩ nyusu ya Sweden, na eeka ũu. Kĩthito kyake vamwe na kya atavanyʼa ala angĩ aĩkĩĩku nĩkĩathimĩtwe mũno! Ũmũnthĩ twĩ na atavanyʼa mbee wa 22,000. O na vala yu nĩ mũkũũ, nĩenda kũendeea kũmũthũkũma Yeova nĩ mũĩkĩĩku. Na nũũ wĩsĩ nĩ moathimo meva ala twĩkwata kuma kwa Yeova ĩvinda yũkĩte?”
  
  Etienne Esterhuyse (e na myaka 83, avatisiwe 1942). Etienne aĩtye ũũ: “Nĩnĩsengʼaa mũno nasũanĩa ũndũ andũ ma Yeova nthĩ ya South Africa maendeee kwongeleka kuma andũ ta 1,500 mwaka wa 1942 nginya andũ mbee wa 94,000 ũmũnthĩ. Nĩ ũndũ ũlũlũmĩĩlasya mũĩkĩĩo wakwa ta kĩ kwĩthĩwa nĩ ũmwe wa athũkũmi asu maingĩvĩte ũu ma Yeova!”
  
  Keith Gaydon (e na myaka 82, avatisiwe 1948). Keith aĩtye atĩĩ: “Noona ũndũ atavanyʼa mongelekete nthĩ ya Britain, kuma atavanyʼa ta 13,700 mwaka wa 1948, nginya atavanyʼa vakuvĩ 137,000 ũmũnthĩ, ũu ũmbĩkĩĩthasya kana wĩa ũũ nĩ wa Yeova. Wĩa ũsu ndũtonyeka kwa vinya wa mũndũ, ĩndĩ Yeova ‘nĩwĩkĩte mosengʼyo.’”—Kuma 15:11.
  
  Ulrike Krolop (e na myaka 77, avatisiwe 1952). Ulrike aĩtye atĩĩ: “Ĩtina wa Kaũ wa Kelĩ wa Nthĩ Yonthe, ikundi nthĩ ya Germany nĩsyeekĩiwe vinya mũno nĩ kĩthito kĩla kyaĩ na Ngũsĩ ila syoomĩĩisye kũthĩnwʼa nĩ kyama kya Nazi. Andũ nĩmendaa kũkiakiwʼa, na nĩtweekie ũu na mĩtũkĩ nũndũ ithyĩ Ngũsĩ tũyaaĩlikya kaũnĩ ũsu waĩ mũthũku mũno. Kwa ĩvinda ya myaka 60 mĩvĩtu, nĩnĩyoneete ũndũ veva wa Ngai wĩthĩĩtwe ũitongoesya andũ make. Ũmũnthĩ twĩ Ngũsĩ mbee wa 164,000, na ũsu nĩ ũndũ wa kwendeesya mũno!”
  
  Mariya Brinetskaya (e na myaka 77, avatisiwe 1955). Mariya aĩtye ũũ: “Nũndũ nĩnakĩaa kũkwatwa, nĩnavatisiwe ũtukũ. Ĩtina mũũme wakwa, nĩwatwaiwe kambinĩ ya kũthũkũmĩthya andũ wĩa mũmũ, nũndũ wa kwĩthĩwa e Ngũsĩ. Nĩnaendeeie kũtavanyʼa nĩ metho ndũanĩ ĩmwe Russia, vala nekalaa, na atũi kauta meetĩkĩla ũla wʼo. Ĩvindanĩ yĩu, twaĩ na ana-a-asa na eĩtu-a-asa o anini. Nĩ na ũtanu nũndũ ũmũnthĩ nthĩ ya Russia yĩ na Ngũsĩ mbee wa 168,000!”
  
  Kimiko Yamano (e na myaka 79, avatisiwe 1954). Kimiko aĩtye atĩĩ: “Mwaka wa 1970, ĩla namanyie kana Japan yaĩ na atavanyʼa 10,000, neewie mũyo mwingĩ mũno, na ũndũ ũsu watuma nĩmwatha Yeova ĩngĩ kana, nĩenda kwĩthĩawa nĩ mũĩkĩĩku kwake thayũnĩ wakwa wʼonthe. We wĩona ta nĩ na ũtanu wĩana ata ethĩwa ũmũnthĩ Japan yĩ na atavanyʼa mbee wa 216,000!”
  
  Daniel Odogun (e na myaka 83). Daniel aĩtye atĩĩ: “Ĩla navatisiwe mwaka wa 1950, Nigeria kwaĩ atavanyʼa 8,000, ĩndĩ ũmũnthĩ kwĩ atavanyʼa ta 351,000! Ĩla nĩ maũmbanonĩ manene, nĩnĩtanaa kwona andũ aingĩ mũno maũmbanonĩ asu, na ũu ũndilikanasya ĩandĩko ya Akai 2:7. Ĩandĩko yĩu yonanĩtye kana Yeova nũendeee kũthingithya mbaĩ, na syĩndũ syĩ vata mũno niendeee kũka. Nĩendeee kũtavanyʼa ũndũ ndonya, nũndũ kũtavanyʼa nĩyo nzĩa yakwa ya kũmũtũngĩa Yeova mũvea.”
  
  Carlos Silva (e na myaka 79). Carlos aĩtye ũũ: “Ĩla navatisiwe mwaka wa 1952, Brazil yaĩ na atavanyʼa 5,000. Mwakanĩ o ũsu twaĩ na ũmbano mũnene nyũmbanĩ nene ya mathaũ, nthĩnĩ wa taoni ya São Paulo. Vaĩ o ngalĩ ilĩ vala vaũngamawʼa ngalĩ. Mwana-a-asa ũmwe nĩwoolotie kĩwanza kyaĩ vau vakuvĩ kyeetawa Pacaembu Stadium, na angũlya, ‘Yo ve ĩvinda tũkausũa kĩwanzanĩ kĩĩ?’ Ũsu woonekaa ne ũndũ ũtatonyeka, ĩndĩ mwaka wa 1973 kĩwanza kĩu nĩkyausũie andũ 94,586. Ũmũnthĩ twĩ na ana-a-asa na eĩtu-a-asa mbee wa 767,000 Brazil. Nĩ ũndũ wa kwendeesya ta kĩ kwona wongeleku ũsu!”
  
  Carlos Cázares (e na myaka 73). Carlos aĩtye ũũ: “Ĩla navatisiwe mwaka wa 1954 kwaĩ atavanyʼa 10,500 Mexico. Ĩvinda yĩu kwaĩ na vata mũnene wa atavanyʼa, kwoou nĩnanyuviwe nĩthĩwe mũsyaĩĩsya wa mũthyũlũlũko nĩ na myaka 21. Wĩthĩĩtwe ne ũathimo mũnene kwona ĩandĩko ya Isaia 60:22 ĩyĩanĩa. Ũmũnthĩ twĩ na atavanyʼa mbee wa 806,000, na memanyĩasya Mbivilia na andũ mbee wa milioni ũmwe! Ũndũ ũsu nũndanĩthasya mũno.”