Nĩ Mwaũ “Ũndũ wa Kwĩkathĩĩa” Kwaku?

1. Ũndũ wa kwĩkathĩĩa nĩ mwaũ ũla twĩthĩawa nawʼo mũthyanĩ wa kĩla mwei?

¹ Ĩla mwei wathela na mwakũlwʼa mumye livoti syenyu sya ũtavanyʼa, nĩ mwaũ “ũndũ wa kwĩkathĩĩa” kwaku? (Aka. 6:4) Twĩthĩwe twĩ mavainia ma mwanya ala twaĩle kumya masaa 130 kana twĩ atavanyʼa ala twĩtĩkĩlĩthĩtwʼe kumya kwambĩĩa ndatĩka 15, ithyonthe twaĩlĩte kũtana nũndũ wa ũthũkũmi witũ kwa Yeova wa ngoo yonthe.—Sav. 100:2.

2. Nĩkĩ twaĩlĩte kwĩkĩa kĩthito ũthũkũminĩ wa Yeova?

² E Mwĩaĩi na Mũsumbĩ Mũnene wa nthĩ yonthe, Yeova aĩlĩte kũthũkũmwa na ngoo yonthe. (Mal. 1:6) Nũndũ wa wendo witũ kwa Yeova, nĩtumĩtye mathayũ maitũ kwĩka kwenda kwake. Kwoou, ethĩwa mũthyanĩ wa kĩla mũthenya kana wa kĩla mwei, nĩtwĩsĩ ki kana nĩtwĩyumisye kũmũthũkũma Yeova na ngoo yonthe kwa kũmũnenga ĩvinda yitũ, inengo, na vinya witũ, twĩ na ũndũ wa kwĩkathĩĩa. (Nth. 3:9) Ethĩwa wasya witũ wa ngoo wĩtwonyʼa no twĩyumye mũnango, twaĩlĩte kũsũanĩĩa ũndũ tũtonya kwĩka nĩ kana twĩke maendeeo.—Alo. 2:15.

3. Nĩkĩ ti ũĩ kwĩelekanyʼa na angĩ?

³ “Na ti Kwĩelekanʼya na Ũngĩ Ũndũ Wĩkaa”: Nĩ ũndũ ũte wa ũĩ kwĩelekanyʼa na angĩ kana na ithyĩ ene ĩvinda yĩla twaĩ na vinya mwingĩ. Maũndũ nĩmavĩndũkaa. Ũtonyi wĩthĩawa wĩ kĩvathũkanyʼo. Kwĩelekanyʼa mavinda maingĩ kũetae veva wa masindano kana kũkatuma mũndũ ewʼa ate wa vata. (Aka. 5:26; 6:4) Yesũ ndaelekanasya andũ. Vandũ va ũu, akathaa mũndũ kwosana na ũtonyi wake wa kwĩka.—Mko. 14:6-9.

4. Nĩ masomo maũ ma vata tũtonya kwĩmanyĩsya kumana na ngelekanyʼo ya Yesũ ya talendi?

⁴ Nthĩnĩ wa ngelekanyʼo ya Yesũ ya talendi, kĩla mũthũkũmi anengiwe talendi ‘kwĩanana na ũtonyi wake.’ (Mt. 25:15) Ĩla vwana woo wasyokie na amakũlya ĩũlũ wa wĩa woo, ala mathũkũmĩte kwa kĩthito na kwĩanana na ũtonyi woo nĩmakathiwe na malika ũtanunĩ wa vwana woo. (Mt. 25:21, 23) O ta ũu tweethĩwa na kĩthito nthĩnĩ wa wĩa wa kũtavanyʼa ĩũlũ wa Ũsumbĩ, nĩtũtonya kwĩthĩwa na mũĩkĩĩo kana Yeova akendeewʼa nĩ wĩa witũ na tũyĩthĩwa na ũndũ wa kwĩkathĩĩa!