MWĨKALĨLE WA AKLĨSTO

Andũ ma Mũika, Ĩthĩwai na “Kĩthito Mekonĩ Maseo”

Nthĩnĩ wa valũa ũla mũtũmwa Vaulo wamũandĩkĩie Tito, aandĩkie kana andũ ma mũika o vamwe na ũ Tito, maĩle kwĩkĩa kĩthito mũno methĩwe “ngelekanyʼo nzeo mekonĩ ala maseo.” (Tit 2:6, 7) Kĩlungunĩ o kĩu, Vaulo nĩwoonanisye kana andũ ma Yeova nĩ athesye nĩ kana methĩwe me na “kĩthito mekonĩ maseo.” (Tit 2:14) Meko amwe maseo nĩ kũtavanyʼa na kũmanyĩsya ĩũlũ wa Ũsumbĩ wa Ngai. Ethĩwa wĩ mũndũ ma mũika, no ũtũmĩe vinya ũla wĩ nawʼo yu kũtavanyʼa wĩ vainia mũtetheesya kana vainia wa kĩla ĩvinda?—Nth 20:29.

Ethĩwa nũenda kũtwʼĩka vainia, sũanĩa na ũivanga maũndũ maku nesa. (Luk 14:28-30) Kwa ngelekanyʼo, ũkaumasya mbesa va sya kwĩanĩsya mavata maku ũendeee na ũvainia? Ũkatavanasya mĩthenya yĩana ata nĩ kana wĩanĩsye masaa ala waĩle kwĩanĩsya wĩ vainia? Mũtavye Yeova ĩũlũ wa wendi waku wa kũtwʼĩka vainia. (Sav 37:5) Neena na asyai maku vamwe na ana-a-asa ala methĩĩtwe me mavainia ĩũlũ wa mĩvango yaku. Wamina kwĩka maũndũ asu osa matambya ala maĩle nĩ kana ũvikĩĩe mĩvango yaku. Vate nzika Yeova akakũathima mũno!

ĨLOELEI VITIO YĨ NA KYONGO, ANDŨ MA MŨIKA NĨMATONYA KŨMŨTAĨA YEOVA, NA ĨNDĨ MŨISŨNGĨA MAKŨLYO AA MAATĨĨE:

Amũika amwe masindie mawetu meva nĩ kana methĩwe mavainia, na masindie mawetu asu ata?
Asyai matonya kũtetheesya syana syoo ata itwʼĩke mavainia wa kĩla ĩvinda?
Nĩkĩ nĩ ũndũ wa vata kwĩthĩwa na mĩvango mĩseo ya ũndũ ũkeanĩasya masaa ma vainia?
Ana-a-asa kĩkundinĩ matonya kũtetheesya mavainia ata na kũmekĩa vinya?
Mavainia makwataa moathimo meva?

Mwĩĩtu-a-asa wa mũika aineena na ĩthe wake ĩũlũ wa ũvainia; mwana-a-asa wa mũika vainia ayĩandĩka mũvango wake mwene wa ũndũ ũkatavanasya; mwĩĩtu-a-asa wa mũika vainia aitavany’a na mwĩĩtu-a-asa ũngĩ; mwĩĩtu-a-asa wa mũika aimanyĩsya mũndũ Mbivilia — Ndonya kwĩka ata nĩtwʼĩke vainia?