Makũlyo Kuma kwa Asomi Maitũ

Ĩandĩko ya Aevelania 4:​12 yaasya kana “ndeto ya Ngai ĩ thayũ, na nĩ nthangaau.” Ndeto ĩsu nĩ yĩva?

Mĩsoa ĩla ĩthyũlũlũkĩte ĩandĩko yĩu yonanĩtye kana mũtũmwa Vaulo aneenaa ĩũlũ wa ndeto syonthe ila Ngai waneenie ikonetye kĩeleelo kyake, ta ila syĩ Mbivilianĩ.

Mavinda maingĩ ĩandĩko ya Aevelania 4:​12 yĩtũmĩawa mavukunĩ maitũ kwonanyʼa kana Mbivilia yĩ vinya wa kũalyũla andũ. Ti ũthũku kũelesya ĩandĩko yĩu kwa nzĩa ĩsu. Ĩndĩ o na ũu wĩ o vo, nũseo tũkaelesya ĩandĩko ya Aevelania 4:​12 kwosana na mĩsoa mingĩ ĩla ĩyĩthyũlũlũkĩte. Vaulo athuthasya Aklĩsto Aevelania meke maũndũ ala mosanĩte na kĩeleelo kya Ngai. Maũndũ maingĩ makonanĩtye na kĩeleelo kya Ngai nĩmaandĩkiwe maandĩkonĩ matheu. Mĩsoanĩ ĩsu Vaulo nĩwanenganie ngelekanyʼo ya Aisilaeli, ala matangĩĩiwe kuma Misili. Aisilaeli asu maĩ na wĩkwatyo mũseo wa kwĩkala ĩla nthĩ “yusũĩte ĩia na ũkĩ wa nzũkĩ,” vala mesaa kũlika ũthũmũonĩ wa wʼo.​—Kuma 3:8; Kũt. 12:9, 10.

Isu nĩsyo ndeto ila Ngai waneenie aielesya kĩeleelo kyake. Ĩndĩ ĩtina Aisilaeli nĩmoomisye ngoo syoo na malea kwĩthĩwa na mũĩkĩĩo, na kwoou aingĩ moo mayaalika ũthũmũonĩ ũsu. (Mot. 14:30; Yos. 14:​6-​10) O na vailyĩ ũu, Vaulo ongeleeile kwasya kana “watho nĩvo ũĩ wa kũlika ũthũmũonĩ wa [Ngai].” (Aevl. 3:​16-​19; 4:⁠1) Vate nzika, “watho” ũsu Vaulo wawetie nĩ kĩlungu kĩmwe kya kĩeleelo kĩla Ngai ũwetete. O tondũ ala Aklĩsto Aevelania meekie, ithyĩ nĩtũtonya kwĩmanyĩsya ĩũlũ wa kĩeleelo kyu na tũkeka maũndũ mosanĩte nakyo. Nĩ kana Vaulo akindĩlĩĩle kana watho ũsu nũeleetwʼe Maandĩkonĩ, nĩwawetie maũndũ amwe me nthĩnĩ wa Mwambĩlĩlyo 2:2 na Savuli 95:⁠11.

Nĩtwaĩle kwĩwʼa mũyo nĩkwĩthĩwa o na yu ‘watho nĩvo ũĩ wa kũlika ũthũmũonĩ wa [Ngai].’ Nĩtwĩsĩ kana nĩvatonyeka tũkalika ũthũmũonĩ wa Ngai ũla wathanĩtwe Mbivilianĩ, na nĩtwosete matambya ala maĩle nĩ kana tũlike ũthũmũonĩ ũsu. Matambya asu tũimosete kwa kũtata kũatĩĩa Mĩao ya Mose kana kũtata kũmwendeesya Yeova kwa kwĩka maũndũ angĩ maseo. Vandũ va ũu, mũĩkĩĩo nĩwʼo ũtumĩte twĩka maũndũ mosanĩte na kĩeleelo kya Ngai, tũtekũeka na twĩ atanu. Kwongela ũu, o tondũ tũwetie kana Mbivilia yĩ vinya wa kũalyũla andũ, andũ ngili mbingĩ ĩũlũ wa nthĩ nĩmambĩĩe kwĩmanyĩsya Mbivilia na kwĩmanyĩsya ĩũlũ wa kĩeleelo kĩla Ngai ũwetete. Aingĩ ma asu nĩmaalyũlĩte mĩkalĩle yoo, makethĩwa na mũĩkĩĩo, na ĩtina makavatiswa. Maũndũ asu mekĩte nĩ wonanyʼo mũseo vyũ kana “ndeto ya Ngai ĩ thayũ, na nĩ nthangaau.” Kĩeleelo kĩla Ngai ũwetete Mbivilianĩ nĩkĩtumĩte twĩka moalyũku, na nĩkĩkũendeea kwĩthĩwa na vinya thayũnĩ witũ.