-
Ngũsĩ sya Yeova Naaũ?Mũsyaĩĩsya—2015 | Mwei wa 9 1
-
-
KYONGO KYA ĨTHANGŨ YA MBEE
Ngũsĩ sya Yeova Naaũ?
“Nĩneesĩ Mike kwa myaka mingĩ. O na nĩneesĩ kana we nĩ Ngũsĩ ya Yeova, ĩndĩ ndĩni ĩsu yake nĩyanzaanĩasya. Neekũlasya Yeova nũũ? Nĩkĩ Ngũsĩ itatanĩaa sikũkũ? Noonaa Mike ta weekwatanĩtye na ndĩni ĩte nzeo.”—Becky, California, U.S.A.
“Ĩla atũi makwa mambĩĩie kwĩmanyĩsya Mbivilia na Ngũsĩ sya Yeova, neekũlasya, ‘Yo ĩsyĩtwa yĩĩ Ngũsĩ sya Yeova yonanasya ata?’ Noonaa yĩ ĩsyĩtwa ĩsaanu ya kwĩtwa ndĩni!” —Zenon, Ontario, Canada.
“Nĩ na kĩveti kyakwa, twasũanĩaa kana Ngũsĩ sya Yeova syookaa kũtũtavya ũvoo syĩ na kĩeleelo kya kũtwony’a mavĩtyo maitũ nũndũ wa kũlea kũthi ĩkanisanĩ. Twasũanĩaa kana ethĩwa ndĩni ila syĩ nguma na sya tene kĩsionĩ kitũ iyaĩ itũtethya, vayaĩ vatonyeka ndĩni nzaanu ta Ngũsĩ sya Yeova ĩkesa kũtũtethya.”—Kent, Washington, U.S.A.
“Kwa w’o, ndyeesĩ Ngũsĩ sya Yeova naaũ na maĩkĩĩaa kyaũ.”—Cecilie, Esbjerg, Denmark.
Nĩvatonyeka ũkethĩwa woonie Ngũsĩ sya Yeova iitavany’a nyũmba na nyũmba kana kũla kwĩ andũ aingĩ, iinenga andũ mavuku maeleetye Mbivilia, na iyĩmanyĩsya na andũ Mbivilia vate ndĩvi. No wĩthĩwe ũnanengiwe ĩkaseti yĩĩ nĩ ũmwe woo. O na ũu wĩ o vo, no wĩthĩwe wĩkũlasya-ĩ, Yo Ngũsĩ sya Yeova naaũ? O na no wĩthĩwe ũsũanĩaa ta ũmwe wa asu monanĩtw’e vaa ĩũlũ.
Ethĩwa nĩwĩkũlasya makũlyo ta asu, ũtonya kũkwata mosũngĩo va? Ũtonya kũmanya ata kĩla Ngũsĩ sya Yeova siĩkĩĩaa, vala syumasya mbesa sya kũendeesya wĩa wa kũtavany’a na kwaka nyũmba sya ũthaithi? O na ĩngĩ, ũtonya kũmanya ata nĩkĩ ithokeaa andũ mĩsyĩ kwoo, kana ikamatavĩsya ũvoo kũla kwĩthĩawa andũ aingĩ?
Cecilie aĩtye, “Nĩnasomete maũndũ maingĩ Indanetinĩ ĩũlũ wa Ngũsĩ sya Yeova.” Aendeee kwasya, “Nĩneew’ĩte andũ maineena maũndũ mathũku na mate ma kwendeesya ĩũlũ wa Ngũsĩ. Ũndũ ũsu watumie nĩthĩwa na mawoni mathũku mũno ĩũlũ wa Ngũsĩ sya Yeova.” Ĩtina Cecilie nĩwesie kũneena na Ngũsĩ sya Yeova na akwata mosũngĩo ma makũlyo ala waĩ namo.
We no wende kũkwata mosũngĩo ma w’o ĩũlũ wa Ngũsĩ sya Yeova? Twĩũkũlya ũneene na ũmwe wa Ngũsĩ sya Yeova, atumbĩthya ma ĩkaseti yĩĩ, nũndũ nĩmo matonya kwĩyĩelesya nesa nĩmo aaũ. (Nthimo 14:15) Twĩ na mũĩkĩĩo kana ilungu ila siatĩĩe nĩsiũkũtetheesya kũelewa nithyĩ aaũ, na tũĩkĩĩaa kyaũ. O na ilungu isu niũkũtetheesya kũelewa nesa wĩa witũ wa kũtavany’a.
-
-
Ngũsĩ sya Yeova Nĩ Andũ Mailyĩ Ata?Mũsyaĩĩsya—2015 | Mwei wa 9 1
-
-
KYONGO KYA ĨTHANGŨ YA MBEE | NGŨSĨ SYA YEOVA NAAŨ?
Ngũsĩ sya Yeova Nĩ Andũ Mailyĩ Ata?
Ngũsĩ sya Yeova syĩ nthĩ yonthe, ĩndĩ iyĩlikanasya na ndĩni ila ingĩ. O na kau ovisi ũla mũnene wĩ Amelika, Ngũsĩ sya Yeova ila mbingĩ syĩkalaa nthĩ ila ingĩ. Ngũsĩ sya Yeova ta milioni nyanya nimanyĩasya andũ Mbivilia nthĩnĩ wa nthĩ mbee wa 230. Syĩkaa ũu iatĩĩe ndeto ii sya Yesũ: “Ũvoo ũũ mũseo wa ũsumbĩ ũkatavanw’a nthĩ yonthe wĩthĩwe ũkũsĩ kwa mbaĩ syonthe.”—Mathayo 24:14.
Vandũ vonthe vala twĩkalaa nĩtũkwataa mĩao ya nthĩ na tũyĩlikasya siasanĩ. Twĩkaa ũu nũndũ nĩtũkwataa mwĩao ũũ wa Yesũ kwa Aklĩsto ũla waĩtye kana ‘tũi ma nthĩ.’ Kwoou, tũyĩlikasya siasanĩ kana kaũnĩ. (Yoana 15:19; 17:16) Ĩvinda ya Kaũ wa Kelĩ wa Nthĩ Yonthe, Ngũsĩ sya Yeova nĩsyooviwe, syathĩnw’a, na syeekwa maũndũ mathũku nũndũ nĩsyaleile kũlika siasanĩ. Mũtongoi ũmwe wa ĩkanisa wa nthĩ ya German aandĩkie ũũ: “[Ngũsĩ sya Yeova] no masye kana nomo me oka nthĩ ya German (Third Reich) maleile kũkua mĩio ya kaũ kana kũlika itanĩ sya kaũ nũndũ wa mũĩkĩĩo woo.”
“[Andũ ma Ngũsĩ sya Yeova] methĩawa na mwĩkalĩle mũseo vyũ. No tũmanenge ivĩla nene mũno siasanĩ nũndũ mayĩthĩawa meyendete, ĩndĩ mayĩsa kwĩtĩkĩla o na vanini. . . . Nĩmenyivĩasya silikalĩ, ĩndĩ maĩkĩĩaa kana Ũsumbĩ wa Ngai now’o ũtonya kũmina mathĩna onthe ma andũ.”—Ĩkaseti ya ũvoo yĩtawa Nová Svoboda, Czech Republic.
Ĩndĩ o na ũu wĩ o vo, tũyĩvathanaa na andũ. Yesũ avoyie ũũ ĩũlũ wa amanyĩw’a make: “Ndiũvoya nĩ kana ũmaumye kũũ nthĩ.” (Yoana 17:15) Kwoou, no ũtwone tũitethya wĩa, tũendete sukulu, kana o ndukanĩ kĩsionĩ kĩla wĩkalaa.
-
-
Ngũsĩ sya Yeova Iĩkĩĩaa Kyaũ?Mũsyaĩĩsya—2015 | Mwei wa 9 1
-
-
KYONGO KYA ĨTHANGŨ YA MBEE | NGŨSĨ SYA YEOVA NAAŨ?
Ngũsĩ sya Yeova Iĩkĩĩaa Kyaũ?
Ngũsĩ sya Yeova iĩkĩĩaa kana “kĩla Ũandĩko nĩwaveveewe nĩ Ngai, naw’o nĩwaĩle.” (2 Timotheo 3:16) Tũtũmĩaa Mbivilia tayo nzĩa ĩla nene ya kwĩmanyĩsya ĩũlũ wa Mũmbi witũ na kwĩkala thayũ mũseo.
Mbivilia yaĩtye: “Nĩ kana mamanye no we wĩ weka, syĩtwa yaku nĩ Yeova, Nue Wĩ Ĩũlũ wa Onthe ĩũlũ wa nthĩ yonthe.” (Savuli 83:18) Kwoou, tũthaithaa Yeova Ngai e weka, na twĩthĩawa tũtw’ĩte kũmanyĩthya andũ ĩsyĩtwa yake nũndũ twĩ Ngũsĩ syake.—Isaia 43:10-12.
Nũndũ twĩ Aklĩsto, tũĩkĩĩaa kana Yesũ, “Mwana wa Ngai,”a ookie kũũ nthĩ na atw’ĩka Masia. (Yoana 1:34, 41; 4:25, 26) Ĩtina wa akw’a, Yesũ nĩwathayũũkiw’e, na ambata ĩtunĩ. (1 Akolintho 15:3, 4) Ĩtina wa ũu, atw’ĩkie Mũsumbĩ wa Ũsumbĩ wa Ngai. (Ũvuan’yo 11:15) Ũsumbĩ ũsu nĩ silikalĩ ya w’o ĩla ĩkaseũvya nthĩ ĩno yĩthĩwe yĩ nzaũ. (Ndanieli 2:44) Mbivilia yaĩtye: “Ala auu makatiĩwa nthĩ, na makeetan’ya mũuonĩ mwingĩ.”—Savuli 37:11, 29.
“Ĩla [Ngũsĩ sya Yeova] syasoma Mbivilia, siĩkĩĩaa kana nĩ Ngai ũkũneena nasyo. O na ĩla syakwatwa nĩ mathĩna, isomaa Ndeto ya Ngai nĩ kana imanye ũndũ itonya kũmĩanĩsya na mathĩna asu. . . . Syonaa Ndeto ya Ngai yĩ thayũ.”—Mũtongoi wa ndĩni ya Katholeki Benjamin Cherayath, Münsterland National Newspaper, Germany
Ngũsĩ sya Yeova siĩkĩĩaa kana motao ma Mbivilia nĩmatethasya andũ ũmũnthĩ. (Isaia 48:17, 18) Na kĩu nĩkyo kĩtumi tũatĩĩaa vyũ motao asu. Kwa ngelekany’o, nũndũ Mbivilia nĩtũkanĩtye twĩvathane na imanyĩo ila ivukasya ilĩko na mĩĩ, tũinyusaa sikala kana kũtũmĩa ndawa sya kũmila, kana syĩndũ ingĩ ta vangi. (2 Akolintho 7:1) O na nĩtwĩvathanaa na maũndũ ala Mbivilia ĩleanĩte namo ta ũlaalai, ũnywi, na ũng’ei.—1 Akolintho 6:9-11.
a O na ĩngĩ, Mbivilia ĩmwĩtĩte Yesũ “Mwana wa Ngai ũla wasyaiwe e weka,” nũndũ nĩwe waĩ wa mbee kũmbwa, na nĩwe woombiwe nĩ Yeova ĩmwe kwa ĩmwe.—Yoana 3:18; Akolosai 1:13-15.
-
-
Mbesa sya Kũendeesya Wĩa wa Kũtavany’a Syumaa Va?Mũsyaĩĩsya—2015 | Mwei wa 9 1
-
-
KYONGO KYA ĨTHANGŨ YA MBEE | NGŨSĨ SYA YEOVA NAAŨ?
Mbesa sya Kũendeesya Wĩa wa Kũtavany’a Syumaa Va?
Kĩla mwaka nĩtũtumbĩthasya milioni maana maingĩ sya Mbivilia na mavuku maeleetye Mbivilia. Nĩtwakaa na tũkaendeesya wĩa movisinĩ maitũ o vamwe na movisi ma kũtumbĩthya mavuku ĩũlũ wa nthĩ. Ikundi ngili mbingĩ nĩsyũmbanĩaa nyũmbanĩ nzeo sya ũthaithi syĩtawa Nyũmba sya Ũsumbĩ (Kingdom Halls). Mbesa sya kũtethya maũndũ asu syumaa va?
Wĩa witũ ũtethaw’a na mĩvothi ya ngoo ya kwenda. (2 Akolintho 9:7) Ĩkaseti ya kelĩ yĩla yaumiw’e mwaka wa 1879, yaisye atĩĩ: “Nũndũ nĩtwĩsĩ YEOVA nĩwe ũtũtetheeasya kũtumbĩthya ĩkaseti yĩĩ ya ‘Zion’s Watch Tower’ [ũu nĩw’o ĩkaseti yĩĩ yeetawa ĩvinda yĩu], vaiĩ ĩvinda o na yĩmwe tũkavoya, kana kwĩtya andũ ũtethyo nĩ kana yĩendeee na kũtumbĩthw’a.” Na kwa w’o, tũyaaĩsa kwĩtya andũ ũtethyo wa kũyĩtumbĩthya.
Mĩvothi ĩtũmawa ovisinĩ witũ wa ũvonge kana ĩkekĩwa masandũkũnĩ ma kwĩkĩa mĩvothi ala methĩawa Nyũmbanĩ ya Ũsumbĩ. Ĩndĩ tũyumasya kĩlungu kya ĩkũmi, kwĩtya nthembo, kana tũkaĩvĩthya andũ nĩ kana tũmamanyĩsye Mbivilia, o na tũimaĩvĩthasya mavuku ala tũmanengae. Tũyĩĩvawa nĩ kana tũkatavany’e, tũmanyĩsye kĩkundinĩ, kana tũtetheesye kwaka nyũmba sya ũthaithi. Twĩkaa ũu nũndũ Yesũ aisye: “Nĩmwosete mana, nenganai mana.” (Mathayo 10:8) Athũkũmi onthe ala mathũkũmaa movisinĩ ma ũvonge, ovisinĩ ũla mũnene wa Ngũsĩ sya Yeova, vamwe na ala ma Nzama Ĩla Ĩtongoesye ya Ngũsĩ sya Yeova mayĩĩvawa.
“O tondũ Ngũsĩ sya Yeova syĩkaa maũndũ ala angĩ, mĩvothi ya kũtetheesya wĩa wa kũtavany’a yumaw’a na ngoo ya kwenda. Kĩla mũndũ nĩwe wĩtw’ĩĩaa ‘mũvothi’ ũla ũkumya, na mavinda ala ũkaumasya.”—European Court of Human Rights, 2011
O na ĩngĩ, mbesa ila syaumw’a mĩvothi nitũmĩkaa ĩla kweethĩwa na mĩisyo. Aklĩsto ma ĩvinda ya tene nĩmatanĩaa kũtũmĩa malĩ yoo nĩ kana matetheesye ala makwatwa nĩ mĩisyo. (Alomi 15:26) O ta ũu, ĩla kweethĩwa na mũisyo nĩtũtetheeasya kũseũvya nyũmba na kũndũ kwa kũthaithĩa kũla kwaanangĩka, na tũkanenga andũ lĩu, ngũa, na ũiiti ũla ũkwendeka.
-
-
Nĩkĩ Tũtavanasya?Mũsyaĩĩsya—2015 | Mwei wa 9 1
-
-
KYONGO KYA ĨTHANGŨ YA MBEE | NGŨSĨ SYA YEOVA NAAŨ?
Nĩkĩ Tũtavanasya?
Ũndũ ũla ũtũvathũkanasya na andũ ala angĩ nĩ wĩa witũ wa kũtavany’a nyũmba na nyũmba, kũndũ kũla kwĩthĩawa na andũ aingĩ, kana vandũ vonthe vala andũ methĩawa. Nĩkĩ tũtavanasya?
Ngũsĩ sya Yeova itavanasya nĩ kana itaĩe Ngai na iimanyĩthya andũ syĩtwa yake. (Aevelania 13:15) O na ĩngĩ, nĩsyendaa kwĩanĩsya mwĩao ũũ Klĩsto Yesũ wanengie amanyĩw’a make. Ameie atĩĩ: “Endai ĩndĩ mũkatw’ĩkĩthye mbaĩ syonthe amanyĩw’a, . . . mũkĩmamanyĩsya kũkwata maũndũ onthe o na meva ala namwĩaĩe.”—Mathayo 28:19, 20.
O na ĩngĩ, tũtavanasya nũndũ nĩtwendete atũi maitũ. (Mathayo 22:39) Vate nzika, nĩtwĩthĩawa twĩsĩ kana andũ aingĩ nĩmethĩawa na mĩĩkĩĩo yĩ kĩvathũkany’o, na kana ti kĩla mũndũ wendeeaw’a nĩ ũvoo ũla tũtavanasya. Ĩndĩ nĩtwĩsĩ kana momanyĩsyo ma Mbivilia nĩmatangĩĩaa thayũ. Na kĩu nĩkyo kĩtumi tũendeeaa tũtekũeka “kũmanyĩsya na kũtavany’a ũvoo mũseo wa Yesũ kana nĩwe Klĩsto,” o tondũ Aklĩsto ma ĩvinda ya atũmwa meekaa.—Meko ma Atũmwa 5:41, 42.
Mũsomi ũmwe ũsomaa mĩkalĩle ya andũ (sociologist), wĩtawa Antonio Cova Maduro, aandĩkie ĩũlũ wa “kĩthito na mathĩna ala Ngũsĩ sya Yeova ikwataa nũndũ wa kwĩyumya . . . , nĩ kana andũ ĩũlũ wa nthĩ memanyĩsye Mbivilia.”—Ĩkaseti ya ũvoo yĩtawa El Universal, ya nthĩ ya Venezuela
Andũ aingĩ ala masomaa mavuku maitũ mayĩthĩawa me Ngũsĩ sya Yeova. Na andũ milioni mbingĩ ala twĩmanyĩasya Mbivilia namo methĩawa me ma ndĩni ingĩ. Ĩndĩ nĩmatũngaa mũvea mũno nũndũ Ngũsĩ sya Yeova nimathokeaa imamanyĩsye Mbivilia.
Vate nzika, nũtonya kwĩthĩwa wĩ na makũlyo angĩ ĩũlũ wa Ngũsĩ sya Yeova. Nĩtũũkũthokya ũkwate mosũngĩo asu kwa
Kũneena na ũmwe wa Ngũsĩ sya Yeova.
Kũlika Kĩsesenĩ kitũ kya www.jw.org.
Kũthi maũmbanonĩ maitũ. Mũndũ ndaĩvaa kĩndũ na andũ onthe methĩawa me athokye.
-