We waaĩkũlya makũlyo ta asu? Ethĩwa ũu nĩ w’o, ndwĩ weka. Andũ ĩũlũ wa nthĩ nĩmekũlasya makũlyo ala ma vata thayũnĩ. Yo ve mosũngĩo ma makũlyo asu?

Andũ milioni mbingĩ nĩmatonya kwasya, “Ĩĩ!” Nĩkĩ? Nũndũ nĩmakwatĩte mosũngĩo maseo kuma Mbivilianĩ ma makũlyo moo. No wende kũmanya ũndũ Mbivilia yaasya? No ũtetheke kumana na mũvango wa Ngũsĩ sya Yeovaa wa kũmanyĩsya andũ Mbivilia vate ndĩvi.

Ũw’o nĩ kana andũ aingĩ methĩawa na mawoni ta aa ĩla makũlw’a mamanyĩw’e Mbivilia: “Nĩngwatene.” “Nĩ vinya kũmĩelewa Mbivilia.” “Ũndũ ũla ũnemaa nĩ kwĩyumya nĩ kana nĩmanyĩw’e Mbivilia.” Ĩndĩ o na ũu wĩ o vo, andũ angĩ nĩmetĩkĩlaa kwĩmanyĩsya Mbivilia. Amwe moo maĩtye ũũ:

• “Nĩnaendie ndĩninĩ ya Katholeki, na nathi ndĩninĩ ila ingĩ sya Kĩklĩsto, o na nĩnaendie ndĩninĩ ya Sikh, na ya Buddha, na nĩnasomie maũndũ ma ndĩni nĩ yunivasĩtĩ. Ĩndĩ o na vailyĩ ũu, ndyaakwata mosũngĩo ma makũlyo ala neekũlasya ĩũlũ wa Ngai. Ĩtina, nĩnathokeiwe nĩ mũndũ mũka ũmwe waĩ Ngũsĩ ya Yeova. Nĩnendeeiw’e nĩ mosũngĩo ala wambonisye kuma Mbivilianĩ na neetĩkĩla kũmanyĩw’a Mbivilia.”​—Gill, England.

• “Nĩneekũlasya makũlyo maingĩ ĩũlũ wa thayũ, ĩndĩ ndyaaĩanĩwa nĩ mosũngĩo ala nakwatie kuma kwa mwalimũ wa ndĩni ĩla naendaa. Ĩndĩ, mũndũ ũmwe waĩ Ngũsĩ ya Yeova nĩwasũngĩie makũlyo makwa atũmĩĩte Mbivilia. Ĩla wangũlilye kana nĩngwenda kwĩmanyĩsya mũnango, nĩneetĩkĩlile kuma ngoonĩ.”6​—Koffi, Benin.

• “Nĩnendaa mũno kũmanya ũndũ kwĩkĩkaa ĩla mũndũ wakw’a. Naĩkĩĩaa kana akw’ũ no maũmĩsye ala me thayũ, ĩndĩ nĩnendaa kũmanya kĩla Mbivilia ĩmanyĩasya. Kwoou, nambĩĩa kwĩmanyĩsya Mbivilia vamwe na mũndũũme ũmwe mũnyanyawa waĩ Ngũsĩ ya Yeova.”—José, Brazil.

• “Nĩnatataa kũsoma Mbivilia, ĩndĩ ndyaeleawa nĩ kĩla nasomaa. Ĩtina Ngũsĩ sya Yeova nĩsyangeleisye nesa mawatho kauta ala me Mbivilianĩ. Nĩnendaa kũmanya kana ve maũndũ angĩ maingĩ naĩ ndonya kwĩmanyĩsya.”—Dennize, Mexico.

• “Neekũlasya kana Ngai nũnthĩnĩkĩaa. Na kwoou natw’a kũmũvoya Ngai ũla ũwetetwe Mbivilianĩ. Mũthenya ũla waatĩĩe Ngũsĩ sya Yeova nĩsyookie nyũmba kwakwa, na neetĩkĩla kwĩmanyĩsya Mbivilia.”—Anju, Nepal.

Maũndũ asu mawetwa metũlilikany’a ndeto ii sya Yesũ: “Nĩ aathime ala me na nzaa na waũni wa ũlũngalu.” (Mathayo 5:6) Kwoou, andũ mombĩtwe me na wendi wa kũmũmanya Ngai. No Ngai e weka ũtonya kwĩanĩsya wendi ũsu, na ekaa ũu kwĩsĩla Ndeto yake, Mbivilia.

Kwoou, tũmanyĩasya mũndũ Mbivilia ata? Kwĩmanyĩsya Mbivilia kũtonya ũkũtethya ata? Makũlyo asu nĩmeũsũngĩwa kĩlungunĩ kĩla kĩatĩĩe.

Ithyĩ Ngũsĩ sya Yeova nĩtwĩsĩkĩe nũndũ wa wĩa wa kũtavany’a. Ĩndĩ nĩwĩsĩ kana nĩtwĩthĩawa na mũvango wa kwĩmanyĩsya Mbivilia na andũ nthĩ yonthe?

Mwakanĩ wa 2014, Ngũsĩ sya Yeova mbee wa 8,000,000 nthĩnĩ wa nthĩ 240, kĩla mwei nĩsyeemanyĩisye Mbivilia na andũ vakuvĩ 9,500,000.a Vate nzika, ve nthĩ ta 140 ila syĩ andũ anini mbee wa ala twĩmanyĩasya Mbivilia namo!

Nĩ kana mũvango wa kwĩmanyĩsya Mbivilia na andũ ũendeee, Ngũsĩ sya Yeova syumĩthasya Mbivilia, mavuku, makaseti, na syĩndũ ingĩ syakũtetheesya andũ kwĩmanyĩsya Mbivilia, vakuvĩ mbilioni ĩmwe na nyusu, kwa ithyomo vakuvĩ 700 kĩla mwaka! Mũvango ũsu wa mwanya wa kumĩthya mavuku nũtetheeasya andũ aingĩ makemanyĩsya Mbivilia na kĩthyomo kĩla mekwenda.

MOSŨNGĨO MA MAKŨLYO ALA MAKŨLANGAW’A ĨŨLŨ WA MŨVANGO WITŨ WA KŨMANYĨSYA ANDŨ MBIVILIA

Mũvango ũsu wa kwĩmanyĩsya wĩthĩawa ũilyĩ ata?

Tũnyuvaa masomo me kĩvathũkany’o, na tũimantha Mbivilianĩ mĩsoa ĩla ĩeleetye ĩsomo yĩla twanyuva. Kwa ngelekany’o, Mbivilia nĩsũngĩaa makũlyo ta aa: We Ngai nũũ? We Ngai ailyĩ ata? E ĩsyĩtwa? Ekalaa va? Na no tũmũthengeee? Ũndũ ũla wĩ vinya nĩ kũmanya vala tũtonya kũkwata mosũngĩo ma makũlyo asu Mbivilianĩ.

Nĩ kana tũtetheesye andũ kũkwata mosũngĩo, tũtũmĩaa ĩvuku Mbivilia Yo Ĩmanyĩasya Ata? yĩla yĩ na mathangũ 224.b Ĩvuku yĩu yaseũviw’e kwa nzĩa ya mwanya nĩ kana yĩtetheesye andũ kũelewa momanyĩsyo ma mũsingi ma Mbivilia. Ĩvuku yĩu yĩthĩawa na masomo ĩũlũ wa Ngai, Yesũ Klĩsto, mathĩna ala makwataa andũ, ũthayũũkyo, mboya, na maũndũ angĩ maingĩ.

Mũndũ atonya kwĩmanyĩĩsya va, na ĩndĩĩ?

Mũndũ nũtonya kũsakũa saa, na vandũ vala ũkwenda kwĩmanyĩĩsya.

Mũndũ akuaa ndatĩka siana ata kwĩmanyĩsya?

Andũ aingĩ matũmĩaa ĩsaa yĩmwe, kana o mbeange kĩla kyumwa nĩ kana memanyĩsye Mbivilia. Ĩndĩ mũndũ no anyuve ndatĩka ila ũkwenda kwĩmanyĩsya. Tũkeetĩkĩlana na ĩvinda yĩla wanyuva kũtũmĩa. Amwe memanyĩasya kwa ndatĩka 10 kana 15 kĩla kyumwa.

Mũndũ aĩvaa mbesa siana ata nĩ kana amanyĩw’e?

Twĩmanyĩasya na mũndũ vate ndĩvi, na mavuku ala tũtũmĩaa mayĩĩvĩawa. Ũndũ ũsu wosanĩte nesa vyũ na ndeto ii Yesũ watavisye amanyĩw’a make: “Nĩmwosete mana, nenganai mana.”—Mathayo 10:8.

Mũndũ akuaa ĩvinda yĩana ata aimina kwĩmanyĩsya?

No ũendeee kwĩmanyĩsya Mbivilia kwa ĩvinda yĩla ũkwenda. Ĩvuku Mbivilia Yo Ĩmanyĩasya Ata? yĩthĩawa na masomo 19. No ũnyuve ĩsomo yĩla ũkwenda, kana ũkanyuva kwĩmanyĩsya masomo onthe kwĩanana na ũtonyi waku.

No nginya mũndũ atw’ĩke Ngũsĩ ya Yeova eemanyĩsya?

Aiee. Nĩtũnengete ndaĩa ũthasyo wa kĩla mũndũ wa kwĩnyuvĩa kĩla ũkwenda kũĩkĩĩa. Ĩndĩ o na vailyĩ ũu, andũ ala makwata ũmanyi wa mũsingi wa Mbivilia no meke ũtwi ũla waĩle.

Nĩ va ndonya kũkwata ũvoo mwingangĩ?

Kĩsese kitũ kya jw.org/kam nĩkĩthĩawa na ũvoo wa w’o wa maũndũ ala tũĩkĩĩaa, na maũndũ angĩ ĩũlũ wa Ngũsĩ sya Yeova.

Naĩle kwĩka ata nĩ kana nĩmanyĩw’e Mbivilia?

• 

  Kũlya ũmanyĩw’e Mbivilia Kĩsesenĩ kya www.jw.org/kam.

• Tũmĩa ĩsandũkũ ya valũa yĩla yaĩle ĩthangũnĩ ya kelĩ ĩkasetinĩ yĩĩ.