Mwĩtĩkĩlye Yeova Aũtongoesye

NĨWEEKIE ŨTWI MŨSEO

MWĨĨTU-A-ASA ũmwe kuma Poland easya: “Navatisiwe nĩ na myaka 15, na ĩndĩ myei thanthatũ kuma vau natwʼĩka vainia mũtetheesya. Ĩtina wa mwaka ũmwe nĩnakũlilye nĩtwʼĩke vainia wa kĩla ĩvinda. Na ĩndĩ ĩla naminie sekondalĩ nĩnakũlilye ngatavanyʼe kĩsionĩ kĩ na vata mũnene wa atavanyʼa ma Ũsumbĩ. Ĩvinda yĩu nekalaa na ũsũe wakwa na ndaĩ Ngũsĩ. Na kwoou nĩnendaa mũno ngwate kĩsio kĩ vaasa na mũsyĩ na vaasa na ũsũe wakwa. Ĩndĩ neewie woo mũno ĩla mũsyaĩĩsya witũ wa mũthyũlũlũko wandavisye kana kĩsio kĩla ngũnengwa ndavanyʼe no kyu kya mũsyĩ! Nĩnatatie mũno ndakamanye ũndũ neewie. Naendie nĩwʼĩte thĩna ngasũanĩe kĩla wandavisye. Nĩvo ĩndĩ natavisye mwĩĩtu-a-asa ũla twanengiwe kĩsio kyu ĩmwe ndeto ii: ‘Nĩona ngĩka maũndũ ta Yona. Ĩndĩ ĩtina Yona nĩwesie kũthi Nineva vala watũmĩtwe. Kwoou o nakwa nĩngwĩtĩkĩla kũtavanyʼa kĩsionĩ kĩĩ nanengwa.’

“Nĩthĩĩtwe nĩ vainia kĩsionĩ kya mũsyĩ kwa ĩvinda ya myaka ĩna, na nĩnonete kana waĩ ũndũ wa ũĩ mũno kwĩka ũndũ neeiwe nĩnĩke. Woni mũthũku ũla naĩ nawʼo nĩwʼo waĩ thĩna wakwa mũnene. Yu nĩwʼaa nĩ mũtanu mũno. O na ve mwei naĩ na amanyĩwʼa 24 ma Mbivilia. Na nĩngũtũngĩa Yeova mũvea nũndũ nĩnambĩĩe kwĩmanyĩsya na ũsũa o na kau tene nĩwambĩngaa.”

NĨWOONIE ŨSEO WA KŨTONGOEWʼA NĨ NGAI

Ve ĩvinda mũmanyĩwʼa ũmwe wa Mbivilia wa nthĩ ya Fiji waĩ na ũtwi mũmũ wa kwĩka. Aĩ no nginya atwʼe ethi ũmbanonĩ mũnene kana ethi na mũũme kũlilikana ĩsyawa ya mũndũ ũmwe wa mũsyĩ. Nĩweewʼanie na mũũme kana no athi ũmbanonĩ ũsu. Aithi atiie atha mũũme kana auma ũmbanonĩ nũkwĩsa kũmũatĩĩa. Ĩndĩ ĩla waumie ũmbanonĩ eewie ataĩle kwĩlikya ũndũnĩ ũũtuma ethĩwa e mũisyonĩ kĩ-veva, na kwoou anyuva kũlea kũatĩĩa mũũme.

Nake mũũme avika kyathĩnĩ eeie andũ make ma mũsyĩ kana kĩveti nĩkĩmwĩtisye lũũsa kĩthi ũmbanonĩ wa Ngũsĩ na nĩkĩkwĩsa kũmũatĩĩa ũmbano ũsu wathela. Ĩndĩ namo mamũsũngĩie mamwĩa, “Ndwĩsa kũmwona vaa. Ngũsĩ iililikanaa ĩsyawa ya mũndũ!”a

Mũũme nĩweewie mũyo mũno nũndũ kĩveti kyake kyeekie ũtwi kĩtongoewʼe nĩ mũĩkĩĩo wakyo na wasya wakyo wa ngoo. Nũndũ mũmanyĩwʼa ũsu wa Mbivilia nĩwaendeeie kwĩthĩwa e mũĩkĩĩku, nĩwesie kũkwata mwanya wa kũtavya mũũme vamwe na andũ angĩ ũvoo mũseo. Kweethĩiwe ata? Mũũme nĩweetĩkĩlile kwĩmanyĩsya Mbivilia na ambĩĩa kũendanyʼa nake maũmbanonĩ.