Eekiwe Ũseo O Ũmwe

ĨTHE wa John avatisĩwe taoninĩ nini yĩtawa Gujarat yĩ nthĩ ya India myaka ya 1950 yũkĩte kũthela. John e na eĩtu-a-inyia make atatũ, na ana-a-inyia make elĩ vamwe na inyia woo, maĩ andũ makwete mũno ndĩni ya Roman Catholic, na kwoou nĩmavĩngaa ĩthe woo mũno.

Mũthenya ũmwe ĩthe wa John amũnengie valũa atwaĩe mwana-a-asa mũna kĩkundinĩ. Ĩndĩ kwakya ku, John nĩweetemie kyaa mũno akwetye kũkunũa ĩviva. Ĩndĩ nũndũ ndendaa kũvĩtĩsya ĩthe, oosie ĩtani oova kyaa kĩu kĩuwĩte, na ĩndĩ athi na maaũ atwaa ũla valũa.

Ĩla John wavikie vala watwaĩte valũa, mũka wa mwana-a-asa ũsu ũla o nake waĩ Ngũsĩ nĩwe wawosie. Mwĩĩtu-a-asa ũsu nĩwoonie ũndũ John weetemete kyaa na amũkũlya kana no amũtetheesye. Alikile nyũmba oosa kasandũkũ kala weekĩaa syĩndũ sya kũtetheesya mũndũ aũmĩa, na ĩndĩ amũthambya kyaa kĩu na ndawa na akyova. Amina kwĩka ũu, auĩie John kyai o aendeee kũmũeea ngewa sya Mbivilia kwa nzĩa nzeo.

Kũvikĩĩa vau, kĩmena kĩla John wamenete Ngũsĩ kyaĩ kĩnambĩĩa kũoleka. Nĩvo ĩndĩ wakũlilye mwĩĩtu-a-asa ũsu makũlyo elĩ ĩũlũ wa maũndũ ĩthe wake waĩkĩĩaa na maĩ kĩvathũkanyʼo na mũĩkĩĩo wake. Maũndũ asu nĩ ethĩwa Yesũ nĩ Ngai, na ethĩwa Aklĩsto nĩmaĩle kũvoya Malia. Nũndũ mwĩĩtu-a-asa ũsu nĩweemanyĩĩtye kĩthyomo kya Gujarati, nĩwasũngĩie John na Mbivilia ya kĩthyomo kĩu na ĩndĩ amũnenga kala kavuku keetawa “Ũvoo Ũũ Mũseo wa Ũsumbĩ.”

Ĩtina ĩla John wesie kwambĩĩa kũsoma kavuku kau eewʼaa ta ĩndĩ weewʼa ũwʼo ya mbee. Aendie vala ve mũthembi wake na amũkũlya o ala makũlyo wakũlilye ũla mwĩĩtu-a-asa. Mũthembi ũsu athatie amũkima na Mbivilia na amũkũmũkĩa amwĩa: “Nũtwʼĩkie Satani! Mbonyʼe vala Mbivilia yaĩtye kana Yesũ ti Ngai. Mbonyʼe vala yaĩtye kana ndwaĩle kũthaitha Malia. Mbonyʼe!” John atelemile mũno oona mũthembi ũsu ayĩkanyʼa ũu, na ĩndĩ amwĩa atĩĩ, “Ndikaakinyia kũũ kwakwa ĩkanisanĩ ya Katholeki ĩngĩ.” Nake ndaakũkinya ĩngĩ!

John nĩwambĩĩe kwĩmanyĩsya na Ngũsĩ, atwʼa kũũngama na ũwʼo, na ambĩĩa kũmũthũkũma Yeova. Ĩtina wa ĩvinda, andũ angĩ ma mũsyĩ ũsu woo nĩmeekie o take. O na kũvikĩa ũmũnthĩ ũũ John e o na ĩlanga kyaanĩ kya kwʼoko kwa aũme vala weetemie myaka 60 mĩvĩtu. Ndaaũlwa nĩ ũla ũseo o ũmwe weekiwe watuma endeewʼa nĩ ũthaithi wa wʼo.—2 Ako. 6:4, 6.