Makũlyo Kuma Kwa Asomi Maitũ

Mũndũũme na mũndũ mũka matatwaanĩte makakyeewa vandũ me oka vate kĩtumi kĩseo, no matalwe ta mekie naĩ yaĩlĩte kwĩkalĩlwa nthĩ nĩ kamitii ya sila?

Ĩĩ, kamitii ya sila no ĩseũvwʼe, nũndũ kũkyeewa vamwe ũtukũ mũima mate na kĩtumi kĩseo nĩ ũndũ mũito ũtonya kũtũmĩwa ta ũkũsĩ ũkũĩkĩĩthya kana nĩmekie ũlaalai.—1 Ako. 6:18.

Ĩndĩ ve makũlyo mana nzama ya atumĩa yaĩlĩte kũsũanĩa yakwata ũvoo ta ũsu ĩtanamba kũtwʼa ethĩwa kamitii ya sila nĩkũseũvwʼa kana ndĩseũvwʼa. Kwa ngelekanyʼo, mo asu meũwetwa nĩ andũ mekwĩvaanyʼa? Nĩmethwa mela kũnewa ũtao ĩũlũ wa mwĩkalĩle woo yĩla me ĩmwe? Nĩ kyaũ kĩtumie makyeewa ĩmwe me oka? Ũsu nĩ ũndũ manavangĩte kwĩka? Ve ũndũ ũngĩ meĩ meka, kana nĩ ũndũ umĩlile ũtathũkĩĩka? Kwa ngelekanyʼo, nĩ ũndũ mateĩtaĩe, kana nĩ thĩna mũna ũmakwatie weethĩa no nginya makyeewe me oka? (Mũta. 9:11) Makomangie ata? Na nũndũ maũndũ maivwʼananaa, ve maũndũ angĩ atumĩa matonya kwenda kũmanya matanamba kwĩka ũtwi.

Ĩtina wa kũmanya nesa kĩla kĩendeeie, nowʼo nzama ya atumĩa ĩtonya kũtwʼa kana ũndũ ũsu nũtonya kwĩkalĩlwa nthĩ nĩ kamitii ya sila kana vai vata wa kwĩka ũu.