Ĩmanyĩsye Kũvikaa ũte Mũselee
1. Yeova atwiĩe ngelekanyʼo yĩva?
1 Yeova ndaseleawa. Kwa ngelekanyʼo, nũtetheeasya athũkũmi make “ĩvinda ya vata.” (Aevl. 4:16) O na ĩngĩ, nũtũnengae lĩu wa kĩ-veva “ĩvinda yawʼo.” (Mt. 24:45) Kwoou twĩ na mũĩkĩĩo kana mũthenya wa ũthatu wake “ndũkekala.” (Ava. 2:3) Nĩtũtethekaa mũno nũndũ Yeova ndaseleawa. (Sav. 70:5) Ĩndĩ nũndũ twĩthĩawa na maũndũ maingĩ na tũi eanĩu, ti ũndũ wĩ laisi kwĩkaa maũndũ tũteũselewa. Nĩkĩ twaĩle kwĩmanyĩsya kwĩka maũndũ tũteũselewa?
2. Nĩkĩ kwĩkaa maũndũ tũteũselewa kũtumaa Yeova ataĩwa?
2 Andũ aingĩ nĩmaemawa nĩ kũatĩĩa masaa nũndũ wa kwĩyenda na kwĩthĩwa mate na wĩtingʼo mĩthenyanĩ ĩno ya mũminũkĩlyo. (2 Tim. 3:1-3) Kwoou, ĩla ana-a-asa na eĩtu-a-asa mavika wĩanĩ, maũmbanonĩ, kana maũndũnĩ angĩ mate aselee, andũ nĩmonaa ũu na maimũtaĩa Yeova. (1 Vet. 2:12) Yo noĩthwa tũvikaa wĩanĩ tene, ĩndĩ mavinda maingĩ tũiselewa maũndũnĩ ma kĩ-veva? Ĩla twavika maũmbanonĩ tũte aselee na tweethĩwa vo ũmbano ũyambĩĩa na wathi na mboya, twonanasya nĩtũkwenda kũatĩĩa ngelekanyʼo ya Ĩthe witũ wa ĩtunĩ ũla wĩkaa maũndũ ũndũ vaĩle.—1 Ako. 14:33, 40.
3. Kũlea kũselewa kwonanasya ata nĩtũthĩnĩkĩaa ala angĩ?
3 Kũvikaa tũte aselee kwonanasya nĩtũthĩnĩkĩaa ala angĩ. (Avi. 2:3, 4) Kwa ngelekanyʼo, ĩla twavika tene maũmbanonĩ ma kĩkundi na maũmbanonĩ ma kũthi kũtavanyʼa, tũithĩnasya ala angĩ. Ĩndĩ twamanyĩa kũselewa, twonanasya kana ĩvinda yitũ nĩyo ya vata kũthonoka ya ala angĩ. Mũndũ ũtaseleawa onanasya nũtonya kwĩkwatwʼa, e kĩthito, na nĩ mũĩkĩĩku. Andũ monaa ndaĩa isu syĩ sya vata.
4. Ethĩwa mavinda maingĩ nĩtũseleawa, twaĩle kwĩka ata?
4 Ethĩwa nũseleawa mavinda maingĩ, ĩkũlye nĩkĩ. Vanga maũndũ nesa nĩ kana wĩanĩasye kĩla ũndũ ĩvinda yĩla yaĩle. (Mũta. 3:1; Avi. 1:10) Mũvoye Yeova aũtetheesye. (1 Yoa. 5:14) Kũlea kũselewa nĩ nzĩa ĩmwe ya kwonanyʼa nĩtũmwendete Ngai na atũi maitũ o tondũ ĩla mĩao ĩlĩ mĩnene yaĩtye.—Mt. 22:37-39.