Kũthokanyʼa kwa Mwanya

1. Kambeini ya kũthokya andũ maũmbanonĩ manene ma 2014 ĩkambĩĩa ĩndĩĩ?

¹ Twasye wĩ na mũvango wa kũuĩa anyanya maku kana mũsyĩ waku lĩu mũna ũwendete. Wĩtũmĩa mbesa mbingĩ, na kĩthito kingĩ kũthooa na kũua lĩu ũsu. No mũvaka wĩthĩwe wĩ mũtanu ĩla ũũmathokya. O ta ũu, ana-a-asa na eĩtu-a-asa nĩmakũnĩte wĩa mwingĩ nĩ kana tũkwate lĩu wa kĩ-veva ũla tũkatanĩa maũmbanonĩ manene ma mĩthenya ĩtatũ na maũmbanonĩ manene ma nthĩ mbingĩ mwaka wa 2014. Syumwa itatũ ũmbano ũsu ũtanamba kũvika, tũkeethĩwa na kĩanda kya kũthokya andũ. Nĩ kyaũ kĩkatũtheesya kũthokanyʼa kwa ũtanu?

2. Nĩ kyaũ kĩkatuma twĩthĩwa na kĩthito kingĩ kya kũthokanyʼa?

² Twasũanĩa ũndũ ithyĩ ene tũunĩkaa kumana na lĩu wa kĩ-veva ũla Yeova ũtũnengae maũmbanonĩ manene, tũkeethĩwa na kĩthito kingĩ kya kũthokanyʼa. (Isa. 65:13, 14) Ĩngĩ, nĩtwaĩlĩte kũlilikana kana kambeini ya kũthokanyʼa ĩla twĩthĩawa nayo kĩla mwaka yĩthĩawa na mosyao maseo. Amwe ala tũũmathokya makooka ũmbanonĩ ũsu. O na ethĩwa ala tũũthokya maikoka onthe, kĩthito kitũ ĩvindanĩ ya kambeini ĩsu kĩkamũtaĩa Yeova na kĩkoonanyʼa ũndũ Yeova no Ngai mũlau.—Sav. 145:3, 7; Ũvu. 22:17.

3. Tũthangũ twa kũthokanyʼa tũkanenganwe ata?

³ Nzama ya atumĩa nĩyo yaĩle kũvanga ũndũ kĩkundi kĩkathokanyʼa. Nĩ kana kĩkundi kĩthokanyʼe kĩsio kĩnene, nzama ĩsu no ĩtwʼe ethĩwa kĩkundi kĩkatiaa tũthangũ twa kũthokanyʼa mĩsyĩ ĩla ĩte na andũ na kana no kĩthokanyʼe kũndũ kũla kwĩthĩawa na andũ aingĩ. Mĩthenya ya Wathanthatũ na Wakyumwa, atavanyʼa maĩle kũnengane makaseti vamwe na tũthangũ twa kũthokanyʼa moona vaĩle. Ethĩwa Wathanthatũ wa mbee wa mwei wavika ĩvindanĩ ya kambeini, atavanyʼa maĩle kwĩyumya mũno kũthokya andũ vandũ va kũmantha andũ ma kũmanyĩwʼa Mbivilia. Kambeini yathela, tũkatana mũno kũmanya kana nĩtũnatethisye wĩa mũseo wa kũthokya andũ aingĩ ũndũ vatonyeka moke mbokanĩ ĩsu Yeova ũnatũseũvĩsye.