Mayĩtĩkĩlaa Ũndũ o na Wĩva Ũmasiĩĩe

¹ Ĩsyĩtwa yitũ, Ngũsĩ sya Yeova, nĩyĩtumaa tũmanyĩka nithyĩ aaũ na nĩyĩeleasya wĩa ũla tũtethasya. Nĩtũtavanasya ĩũlũ wa ũnene wa Ngai witũ, Yeova. (Isa. 43:10, 12) No nginya kĩla ũmwe kĩkundinĩ aumye ũkũsĩ. Nzĩa ĩla nene ya kumya ũkũsĩ nĩ kwĩsĩla kũtavanyʼa. Tũtavanasya kwa nzĩa syĩ kĩvathũkanyʼo ta nyũmba na nyũmba, nzĩanĩ, kũsyokea andũ, na kũtongoesya amanyĩwʼa ma Mbivilia. Ithyonthe nĩtwĩkĩawa vinya twĩthĩwe na kĩthito wĩanĩ ũũ.—1 Ako. 15:58.

² O na kau ithyonthe twaĩle kũtavanyʼa na kĩthito, amwe kĩkundinĩ methĩawa matatonya kũtavanyʼa mũno. No methĩwe mathĩnawʼa nĩ ũwau kana me na wonzu mũna wa mwĩĩ. Angĩ no methĩwe mavĩngawa nĩ andũ ma mũsyĩ. Mũndũ wa mũika no ethĩwe asiĩĩawa nĩ asyai make mate Ngũsĩ. O na ala mekalaa kũndũ kũasa na kĩkundi na kũtavikĩka laisi nĩmatonya kũemwa nĩ kũtavanyʼa mũno. Wia no ũtume angĩ malea kũtavanyʼa mũno. Atavanyʼa amwe ala makwatawa nĩ maũndũ ta asu no makwʼe ngoo nũndũ maiũtavanyʼa mũno ta Aklĩsto ala angĩ na maikwĩanĩsya kyonthe kĩla mekwenda. Ĩndĩ mayaĩlĩte o na vanini kũvũthĩĩsya kĩthito kyoo. (Aka.6:4K) ũmanya kana Yeova nĩwĩtĩkĩlaa kyonthe kĩla mekwĩka kuma ngoonĩ kwaĩle kũtuma mewʼa me eanĩe, o na ethĩwa me na mathĩna meva.—Luka 21:1-4.

³ Kũmantha Nzĩa sya Kũtavanyʼa: Maũndũ maingĩ monekete nĩmaeleetwʼe ĩũlũ wa ũndũ andũ aingĩ matetĩkĩlasya mathĩna mamasiĩĩe kũtavanyʼa. Mo ene nĩmamanthĩte nzĩa syĩ kĩvathũkanyʼo sya kũtavanyʼa ĩla me maũndũnĩ moo. Ala mataumaa mũsyĩ nĩmatũmĩaa simũ kũtavanyʼa. Matavasya kĩla mũndũ wathi kũmona. O na kau nĩvatonya kwĩthĩwa ve vinya mũndũ mũka ũvĩngawa nĩ mũũme kũtavanyʼa mũsyĩ, nũtũmĩaa nesa myanya ĩla yaumĩla kũneena na atũi na andũ angĩ ala wakomana namo e maũndũnĩ make.

⁴ Mũndũ wa mũika nũtonya kwĩthĩwa aivatwa kũtavanyʼa nĩ mũsyai wake ũte Ngũsĩ. Vandũ va kwona kĩu ta kĩsiĩĩi kĩnene kya kũtavanyʼa, no avange kũtavya ala masomaa ĩmwe na alimũ, o na no ambĩĩe kwĩmanyĩsya Mbivilia namo. Amwe ala mekalaa isionĩ syĩ kũasa nĩmethĩĩtwe maitavanyʼa kwa kũandĩka valũa. Onthe ala me kĩthito nĩmamanthaa nzĩa sya kũtavanyʼa nĩ kana maikethĩwe me ‘atulu kana mate na ũsyao makĩmanya Mwĩaĩi waitũ Yesũ Klĩsto.’—2 Vet. 1:8.

⁵ Yeova endaa ithyonthe tũmũthũkũmae “kuma ngoonĩ.” (Ako. 3:23) O na kau nĩtũtonya kũlea kũtũmĩa ĩvinda yĩanene kana kwĩanĩsya maũndũ maingĩ ũtavanyʼanĩ, ithyonthe tũsukumawa nĩ wendo wa wʼo, ũla ũmanaa na “ngoo mbĩanĩu.” (1 Mav. 28:9; 1 Ako. 16:14) Ethĩwa twĩkaa kyonthe kĩla tũtonya ũtavanyʼanĩ, tũyaĩlĩte o na vanini kwona ta tũte na mũĩkĩĩo kana ta tũte ma vata nũndũ tũikwĩanĩsya maũndũ maingĩ ta ala angĩ kĩkundinĩ. Tweeka ũu, tũkeethĩwa tũtonya kwasya ta Vaulo, kana ‘tũyaatundua kũmatavya mo ndeto o na yĩva ĩmaĩle na kũmamanyĩĩsya andũnĩ.’—Meko 20:20.