Ĩthĩwa Wĩyũmbanĩtye Kũtwʼĩkĩthya Andũ Amanyĩwʼa
1. Tũtonya kũtetheesya andũ ata nĩ kana matangĩĩwe?
1 Livoti ya ũthũkũmi ya mwaka wa 2014 yĩonanyʼa kĩthito kya andũ ma Ngai kya kũtavanyʼa ũvoo mũseo wa Ũsumbĩ. (Mt. 24:14) Ĩvindanĩ yĩĩ nĩtũtavasya andũ aingĩ mũno ũvoo mũseo ũla wĩ Mbivilianĩ kwĩsĩla kũtavanyʼa nyũmba na nyũmba, kambeini sya kũnengane tulakiti na tũthangũ twa kũthokanyʼa, na kũtavanyʼa kũla kwĩthĩawa na andũ aingĩ. Ĩndĩ nĩ kana andũ matangĩĩwe, no nginya tũkamatetheesya methĩwe amanyĩwʼa ma Yesũ kwa kwĩmanyĩsya Mbivilia namo.—1 Tim. 2:4.
2. Nĩ makũlyo meva tũtonya kwĩkũlya makatũtetheesya kwĩthĩwa twĩyũmbanĩtye kũtwʼĩkĩthya andũ amanyĩwʼa?
2 Ĩthĩawa Wĩyũmbanĩtye Kwambĩĩa Kwĩmanyĩsya na Andũ: Ĩla mũndũ wendeewʼa, nũmũkũlasya ũndũ ũtonya kũmũkwatya ĩngĩ na ũimũsyokea na mĩtũkĩ ũndũ vatonyeka wĩ na kĩeleelo kya kwĩmanyĩsya Mbivilia nake? Nĩ ĩndĩĩ wĩla ũkomana na mũndũ ya mbee, na ũkamwonyʼa ũndũ twĩmanyĩasya na andũ Mbivilia? Nĩ ĩndĩĩ wĩla kũkũlya ala ũmatwaĩaa makaseti kĩla mwei wĩmanyĩsye namo? Waaonyʼa ala ũthũkũmaa namo, ũsomaa namo, atũi maku, ala mwĩ ũko, kana o anyanyau angĩ vitio, Nĩkĩ Waĩle Kwĩmanyĩsya Mbivilia? na Twĩkaa Ata Ĩla Tũũmanyĩsya Mũndũ Mbivilia? Ĩla ũũtũmĩa kakalĩ kana mesa ya kwilĩĩla mavuku, nũtavasya ala moosa mavuku ma kwĩmanyĩsya kana no mamanyĩwʼe Mbivilia vate ndĩvi?
3. Nĩ kyaũ kyendekanaa nĩ kana tũmanyĩsye ũwʼo kwa nzĩa ĩla yaĩlĩte?
3 Yeova na Yesũ Nĩmatũtetheeasya: Yesũ ambĩĩisye na kwasya “endai” ĩla wanengae amanyĩwʼa make mwĩao wa ‘kũtwʼĩkĩthya mbaĩ syonthe amanyĩwʼa.’ Kwoou oonanasya kana no nginya twĩkĩe kĩthito na tũyonanyʼa kana twĩ na wendi ũsu kwa kwosa ĩtambya ya kwĩka ũu. Ĩndĩ ndaatũtia tũte na ũtethyo. Atwathie kana akeethĩwa vamwe naitũ. (Mt. 28:19, 20) O na ĩngĩ, Yeova nũtũnengete veva wake mũtheu na syĩndũ sya kũtũtetheesya ũtavanyʼanĩ, na akatũmanyĩsya ũndũ tũtonya kũmanyĩsya andũ ũwʼo. (Nzek. 4:6; 2 Ako. 4:7) Kwoou, nĩtwaĩle kũmũvoya Ngai nĩ kana twĩthĩwe na ‘wendi’ na vinya wa kũtethya wĩa ũũ wa vata.—Avi. 2:13.
4. Nĩkĩ twaĩle kwĩthĩwa twĩyũmbanĩtye kũtwʼĩkĩthya andũ amanyĩwʼa?
4 Kũtavanyʼa ũvoo mũseo nĩkũtũeteae ũtanu mwingĩ. Ĩndĩ ũtanu witũ nĩwongelekaa ĩla twamanyĩsya ũmwe ũwʼo, na twamũtetheesya oke tũkinyĩle vamwe nzĩanĩ ĩla “ĩelete thayũnĩ.” (Mt. 7:14; 1 Ath. 2:19, 20) Ũndũ ũla wa vata nĩ kana ĩla tweethĩwa twĩyũmbanĩtye kũtwʼĩkĩthya andũ amanyĩwʼa, nĩtũmwendeeasya Yeova ũla ‘ũtendaa ũmwe o na wĩva ae, ĩndĩ endaa onthe mavikĩe ũalyũlo wa ngoo.’—2 Vet. 3:9.