Kyo Kĩĩ Nĩkyo Kyaĩ Kĩeleelo kya Ngai?
WASOMA makaseti, wasisya televiseni, weethukĩĩsya letiũ, kwĩ ũvoo mwingĩ wa ũtũli wa mĩao, kaũ, na ũngʼendu! Kwasũanĩa ĩũlũ wa mathĩna maku. Ũwau kana kũkwʼĩĩwa no kwĩthĩwe kũkũetee kyeva kingĩ. Nũtonya kwĩwʼa ũndũ Yovu weewʼaa yĩla waisye kana thĩna wake waĩ “mũito kwĩ kĩthangathĩ kya maũkanga.”—Yovu 6:2, 3.
Ĩkũlye makũlyo aa:
Kyo kĩĩ nĩkyo kyaĩ kĩeleelo kya Ngai kwitũ?
Ndonya kũkwata ũtethyo kuma va wa kũndetheesya mathĩnanĩ?
Ve wĩkwatyo wa kwĩsa kwĩthĩwa na mũuo kũũ nthĩ?
Mbivilia nĩyonanĩtye mosũngĩo maseo ma makũlyo asu.
MBIVILIA ĨMANYĨASYA KANA NGAI AKAETE MOALYŨKU AA KŨŨ NTHĨ.
“Akavyaĩa methoi onthe methonĩ moo; na kĩkwʼũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo.”—Ũvuanʼyo 21:4
‘Mũndũ ũthuaa akatũlĩla ta ndatai nũme.’—Isaia 35:6
‘Metho ma ililinda makasalukwʼa.’—Isaia 35:5
“Onthe ala me mbũanĩ . . . makauma.”—Yoana 5:28, 29
“Ũla ũtwĩe kwʼo ndakasya: Nyie nĩ mũwau.”—Isaia 33:24
“Kũkeethĩwa lĩũ mwingĩ mũno wa mbaa ngetha nthĩ.” —Savuli 72:16
TETHEKA KUMANA NA ŨNDŨ MBIVILIA ĨMANYĨASYA
Ndũkone maũndũ asu mawetetwe mathangũnĩ asu ta ndoto. Ngai nĩwathanie kana akeanĩsya maũndũ asu, na Mbivilia nĩyĩeleetye ũndũ ũkeka ũu.
O vamwe na ũu Mbivilia nĩkwonetye ũndũ ũtonya kwĩka nĩ kana ũtanĩe thayũ o na ĩvindanĩ yĩĩ. Sũanĩa ĩũlũ wa mawĩmakĩo na mathĩna maku. No methĩwe me mathĩna ma mbesa, mathĩna ma mũsyĩ, mowau, kana kũkwʼĩĩwa. Mbivilia nĩtonya kũũtetheesya kũmĩĩsya mathĩna ũmũnthĩ, na kũũkiakisya na mosũngĩo ma makũlyo ta aa:
Nĩkĩ tũthĩnaa?
Tũtonya kũmĩĩsya mawĩmakĩo maitũ ata?
Tũtonya kwĩthĩwa na mĩsyĩ yĩna ũtanu ata?
Kwĩthĩawa ata kwitũ yĩla twakwʼa?
Endwa maitũ ala makwie tũkamona ĩngĩ?
Nĩ kyaũ kĩtonya kũtũĩkĩĩthya kana Ngai akeanĩsya mawatho make ma ĩvinda yũkĩte?
Yu ũendee kũsoma ĩvuku yĩĩ, wĩonanyʼa kana nũkwenda kũmanya kĩla Mbivilia ĩmanyĩasya. Ĩvuku yĩĩ nĩyĩũkũtetheesya kwĩka ũu. Ĩtheo wa kĩla ĩthangũ ve makũlyo ma kĩla kalungu. Andũ milioni mbingĩ nĩmatanĩaa nzĩa ĩsu ya makũlyo-na-mosũngĩo yĩla mekwĩmanyĩsya Mbivilia na Ngũsĩ sya Yeova. Twĩĩkwatya o naku nũũtanĩa kwĩmanyĩsya kwa nzĩa ĩsu. Ngai nakũathime nũndũ wa kwosa ĩtambya yĩu ĩseo mũno ya kwĩmanyĩsya ũndũ Mbivilia yo ĩmanyĩasya!