Atĩĩa Ngelekanyʼo ya Mwathani Avakuki
1. Nĩkĩ ti vinya kũelewa maũndũ ala mamũkwatie Avakuki?
1 Ĩla twoona ũthũku wĩ mwingĩ mũno ĩũlũ wa nthĩ, no twĩwʼe ũndũ Avakuki weewie, ũla wamũkũlilye Yeova atĩĩ: “Nĩkĩ naku ũmbonasya ũthũku, na kũtuma nĩsiasya maũndũ ma ngũlũ?” (Ava. 1:3; 2 Tim. 3:1, 13) Kũsũanĩa ĩũlũ wa ũvoo ũsu wa Avakuki na ngelekanyʼo yake ya kwĩthĩwa e mũĩkĩĩku no kũtũtetheesye kũmĩĩsya mathĩna o tũendeee kweteela mũthenya wa Yeova.—2 Vet. 3:7.
2. Tũtonya kwonanyʼa ata kana twĩ na mũĩkĩĩo?
2 Ĩthĩwa na Mũĩkĩĩo: Vandũ va Avakuki kũemeewa nĩ maũndũ ala mamũkwataa, aendeeie kwĩthĩwa na kĩthito na e metho kĩ-veva. (Ava. 2:1) Yeova amũĩkĩĩthisye mwathani ũsu kana ndeto syake ikeanĩa ĩvindanĩ yĩla yaĩle, na kana “ũla mũlũngalu akekala thayũ kwondũ wa mũĩkĩĩo wake.” (Ava. 2:2-4) Ndeto isu itonya kũtetheesya ata Aklĩsto ala mailyĩ mĩthenyanĩ ya mũminũkĩlyo? No imatetheesye makamanya kana ũndũ ũla wa vata nĩ kũĩkĩĩa kana mũminũkĩlyo ũkooka, ĩndĩ ti kũmanya ĩvinda yĩla ũkoka. Mũĩkĩĩo nũtũtetheeasya kwĩkala twĩ metho na tũivĩtya mbee wĩa wa kũtavanyʼa.—Aevl. 10:38, 39.
3. Nĩkĩ twaĩle kũmũthũkũma Yeova twĩ atanu?
3 Tanai Nthĩnĩ wa Yeova: Ĩla Ngoki wa nthĩ ya Makoki ũkavithũkĩa andũ ma Yeova, mũĩkĩĩo witũ ũkatatwa. (Esek. 38:2, 10-12) Ĩla kweethĩwa na makaũ, o na andũ ala masinda kaũ ũsu nĩmakwatawa nĩ mathĩna. Kwa ngelekanyʼo, lĩu nũnyivaa, andũ nĩmaasya malĩ yoo, na maitheea kĩlasi. Tũkeeka ata ĩla twĩkwatwa nĩ mathĩna? Avakuki nĩweesĩ kana akakwatwa nĩ mathĩna, na kwoou nĩwatwie vyũ kũendeea kũmũthũkũma Yeova e mũtanu. (Ava. 3:16-19) Kwoou “ũtanu wa Yeova” ũkatũtetheesya tũmĩĩsye motato ala metũkwata ĩvinda yũkĩte.—Nee. 8:10; Aevl. 12:2.
4. Tũkatetheka ata ĩvindanĩ yĩĩ na yĩla yũkĩte?
4 Andũ ala Yeova ũkovosya mũthenyanĩ wake wa ũsilĩlo makaendeea kũmanyĩwʼa nzĩa syake. (Ava. 2:14) O na ala makathayũũkwʼa makeemanyĩsya ĩũlũ wake. Kwoou, ekai tũtũmĩe mwanya wʼonthe ũla twakwata kũtavya andũ ĩũlũ wa Yeova na mawĩa make ma ũsengyʼo!—Sav. 34:1; 71:17.