Walanyʼo Kyumwanĩ kya Matukũ 17 Mwei wa 2

KYUMWA KYA MATUKŨ 17 MWEI WA 2

Wathi 15 na Mboya

□ Ĩmanyĩsyo ya Mbivilia ya Kĩkundi:

bh kĩl. 2 ¶13-17 (Ndat. 30)

□ Sukulu ya Ũthũkũmi wa Kĩtheokulasi:

Kũsoma Mbivilia: Mwambĩlĩlyo 29-31 (Ndat. 10)

Na. 1: Mwambĩlĩlyo 29:21-35 (Ndũkavĩtũke ndat. 4)

Na. 2: Ũthayũũkyo Ũkatuma Andũ Mewʼa Ata?—rs-SW ĩth. 323 ¶2–ĩth. 324 ¶2 (Ndat. 5)

Na. 3: Ĩkanisa Nĩ Kyaũ?—td 4A (Ndat. 5)

□ Ũmbano wa Ũthũkũmi:

Wathi 92

Ndat. 10: Ĩthĩwa wĩ Mũtanu Ĩla Ũũtavanyʼa. Ũvoo na maelesyo ma ethukĩĩsya ũitũmĩa ĩvuku Shule ya Huduma, ĩthangũ ya 118, kalungu ka 1, nginya ĩthangũ ya 119, kalungu ka 5.

Ndat. 5: We Nũtũmĩaa Kĩsese kya jw.org Ĩla Ũũtavanyʼa? Ũvoo na maelesyo ma ethukĩĩsya. Thokya ethukĩĩsya maelesye maũndũ maseo ala monete nũndũ wa kũtũmĩa Kĩsese kya jw.org ũtavanyʼanĩ. Ĩkĩa atavanyʼa vinya maelesye andũ ĩũlũ wa Kĩsese kya jw.org kĩla ĩvinda makwata mwanya mũseo wa kwĩka ũu.

Ndat. 15: “Tana Ĩvindanĩ ya Kũlilikana Kĩkwʼũ kya Yesũ.” Makũlyo na mosũngĩo. Kũlya ala mavangĩte kwosa ũvainia mũtetheesya maelesye mĩvango ĩla mekĩte nĩ kana meke ũu, o na kũtwʼĩka methĩawa na mathĩna ma mwĩĩ kana makwatene mũno. Mũineenea kalungu ka 3, kũlya mũsyaĩĩsya wa ũthũkũmi aelesye mĩvango ĩla yĩkĩtwe kwondũ wa maũmbano ma kũthi kũtavanyʼa Mweinĩ wa 3, wa 4, na wa 5.

Wathi 8 na Mboya

Tana Ĩvindanĩ ya Kũlilikana Kĩkwʼũ kya Yesũ

1. Nĩ kyaũ kĩtonya kũtuma tũtana mũno ĩvindanĩ ya kũlilikana kĩkwʼũ kya Yesũ?

¹ We no wende kũtana mũnango Mweinĩ wa 3, wa 4, na wa 5? Ũndũ ũmwe ũtonya kũtuma ũtana mũno nĩ kwongela ĩvinda yĩla ũtũmĩaa ũtavanyʼanĩ, na ethĩwa nĩvatonyeka, ũyosa ũvainia mũtetheesya. Nĩ kwa nzĩa yĩva ũndũ ũsu ũkatuma ũtana mũno?

2. Nĩ kwa nzĩa yĩva kwongela ĩvinda yĩla tũtũmĩaa ũtavanyʼanĩ kũtumaa twĩthĩwa na ũtanu mwingĩ?

² Ĩthĩwa na Ũtanu Mwingĩ: Yeova atũmbie tũtanae na tũyĩwʼaa twĩ eanĩe ĩla tweanĩsya wendi witũ wa kĩ-veva kwa kũmũthaitha. (Mt. 5:3) O na ĩngĩ, atũmbie tũtanae nũndũ wa kũtetheesya andũ angĩ. (Meko 20:35) Wĩa witũ wa kũtavanyʼa nũtumaa twĩanĩsya maũndũ asu elĩ, namo nĩ kũmũthaitha Ngai na kũtetheesya andũ. Kwoou no twasye kana ĩla twatũmĩa ĩvinda yingĩ ũtavanyʼanĩ, ũu nũtumaa twĩthĩwa na ũtanu mwingĩ. O na ĩngĩ, o ũndũ twatũmĩa ĩvinda yingĩ ũtavanyʼanĩ, nowʼo tũkwataa ũmanyi mwingĩ wa kũtavanyʼa. Na o ũndũ twakwata ũmanyi mwingĩ wa kũtavanyʼa, nowʼo ũkũmbaũ witũ wongelekaa na wia ũioleka. Twongela ũthũkũmi witũ, tũkethĩawa na myanya mingĩ ya kumya ũkũsĩ na ya kwambĩĩa kwĩmanyĩsya Mbivilia na andũ. Maũndũ asu onthe matumaa tũtanĩa wĩa witũ wa kũtavanyʼa.

3. Nĩkĩ Mwei wa 3, na wa 4 ĩkethĩwa myei mĩseo ya kwosa ũvainia mũtetheesya?

³ Mwei wa 3 na wa 4 ĩkeethĩwa ĩvinda ĩseo ya kwosa ũvainia mũtetheesya nũndũ tũkeethĩwa tũtonya kũnyuva kũtavanyʼa masaa 30 kana 50. O na ĩngĩ, tũkatanĩa kũthokya andũ kwondũ wa kũlilikana kĩkwʼũ kya Yesũ kwambĩĩa Wathanthatũ, Matukũ 22, Mwei wa 3, nginya mũthenya ũla tũkalilikana kĩkwʼũ kya Yesũ, Wakwambĩlĩlya, Matukũ 14, Mwei wa 4. Ikundi ikeethĩwa na ũtanu mwingĩ nũndũ aingĩ makeethĩwa maithũkũma na “ngoo ĩmwe” nĩ kana mathokye andũ isionĩ mbingĩ ũndũ vatonyeka ĩvindanĩ yĩu.—Nzev. 3:9.

4. Twaĩle kwĩka ata ethĩwa nĩtũkwenda kwosa ũvainia mũtetheesya?

⁴ Ĩyũmbanyʼe Yu: Ethĩwa ndũnamba kwĩyũmbanyʼa, osa ĩvinda yu ũsisye mĩvango yaku nĩ kana wone ũndũ ũtonya kwĩka wongele ũthũkũmi waku mwei ũmwe kana mingangĩ. Voya ĩũlũ wa ũndũ ũsu. (Yak. 1:5) Neena vamwe na andũ ma mũsyĩ waku na angĩ kĩkundinĩ ĩũlũ wa ũndũ ũvangĩte kwĩka. (Nth. 15:22) No wĩthĩe kana o naku nũtonya kũtana nũndũ wa kwosa ũvainia mũtetheesya, o na ethĩwa wĩthĩawa na mathĩna ma mwĩĩ kana ũkwatene mũno.

5. Tũkakwata moathimo meva twongela ũthũkũmi witũ ĩvindanĩ ya kũlilikana kĩkwʼũ kya Yesũ?

⁵ Yeova endaa athũkũmi make methĩwe na ũtanu. (Sav. 32:11) Twatata ũndũ tũtonya nĩ kana twongele ũthũkũmi witũ ĩvindanĩ ya kũlilikana kĩkwʼũ kya Yesũ, tũkeethĩwa na ũtanu mwingĩ na tũimũtanĩthya Ĩthe witũ wa ĩtunĩ.—Nth. 23:24; 27:11.