Kwĩthĩwa Mũmanyĩwʼa wa Yesũ ti Ũndũ wa Kũvũĩwa Ngũĩ

Yesũ nĩwamanyĩisye maũndũ ma vata yĩla wathoketwʼe nĩ mũtongoi wa Avalisi maĩsanĩe. Ĩtina wa ũu nĩwaendeeie na savalĩ yake ya kũthi Yelusaleme, na ve andũ aingĩ waendanĩtye namo. Nĩkĩ waendanĩtye namo? Kwa wʼo mo nĩmendaa kũtwʼĩka aatĩĩi make ma wʼo, o na ethĩwa mendekaa meke ata?

O maendeee na savalĩ, Yesũ nĩwaneenie ũndũ ũtonya kwĩthĩwa watelemilye amwe ma andũ asu. Aisye: “Mũndũ o na wĩva ũla ũngatĩĩaa na ailea kũmena ĩthe wake na inyia wake na mũka wake na syana syake na ana-a-inyia na eĩtu-a-inyia, ĩĩ, o na thayũ wake mwene, ndatonya kwĩthĩwa mũmanyĩwʼa wakwa.” (Luka 14:26) We Yesũ oonanasya ata yĩla wawetie ndeto isu?

Yesũ ndoonanasya kana mũndũ atwʼĩka mũatĩĩi wake aĩle kũmena andũ make ma mũsyĩ. Ĩndĩ, oonanasya kana mũndũ aĩle kwenda Yesũ mũnango kwĩ mo, ĩndĩ ti ta ũla mũndũũme Yesũ wawetie ngelekanyʼonĩ ya lĩu wa wĩoo ũla waleile kũka mbokanĩ aĩ nũndũ nũtwaanie. (Luka 14:20) Kwa ngelekanyʼo, Maandĩko maĩtye kana ũmae wa Ayuti ũla weetawa Yakovo, ‘nĩwamenete’ Lea na akamwenda Lakeli, na ũu woonanasya kana ndamwendete Lea mũno ta mwĩĩtu-a-inyia Lakeli.—Mwambĩlĩlyo 29:31.

O na ĩngĩ nĩtwaĩle kũlilikana kana Yesũ aisye mũndũ atwʼĩka mũmanyĩwʼa wake aĩle kũmena “o na thayũ wake mwene.” Kwoou Yesũ oonanasya kana mũmanyĩwʼa wake wa wʼo aĩle kũmwenda mũnango kwĩ ũndũ wendete thayũ wake, o na aĩle kwĩthĩwa eyumbanĩtye kwasya thayũ wake ethĩwa nĩvatonyeka. Kwa wʼo kũtwʼĩka mũmanyĩwʼa wa Klĩsto nĩ kĩanda kĩito. Ti ũndũ twaĩle kũwosa laisi tũte kũsũanĩa mũno ĩũlũ wa ĩtambya yĩu twoosa.

Mũndũ atwʼĩka mũmanyĩwʼa wa Yesũ nũtonya kũkwatwa nĩ mawũmũ na akathĩnwʼa, nĩkwĩthĩwa Yesũ aisye: “Mũndũ o na wĩva ũla ũtakuaa mũtĩ wake wa mathĩna na aingatĩĩa, ndatonya kwĩthĩwa mũmanyĩwʼa wakwa.” (Luka 14:27) Kwa wʼo, mũmanyĩwʼa wa wʼo wa Yesũ aĩle kwĩthĩwa eyũmbanĩtye kũkwatwa nĩ mathĩna o ta ala mamũkwatie Yesũ. O na Yesũ aisye kana aĩ oawe nĩ amaitha make.

Kwoou andũ ala maendanĩtye na Yesũ nĩmaaĩle kũmanya nesa kĩla kyendekaa nĩ kana mũndũ atwʼĩke mũmanyĩwʼa wa Klĩsto. Yesũ nĩwatũmĩie ngelekanyʼo nĩ kana akindĩlĩĩle ũndũ ũsu. Aisye atĩĩ: “Kwa ngelekanyʼo, nũũ katĩ wenyu ayenda kwaka mwako mũtũlu ũtambaa kwĩkala nthĩ akeka masavu nĩ kana amanye kana e na mbesa ianĩtye sya kũũmina? Alea kwĩka ũu, nũtonya kwambĩĩsya mũsingi na ayĩemwa nĩ kũũmina.” (Luka 14:28, 29) Kwoou, ala maendete na Yesũ Yelusaleme, maaĩle kwĩthĩwa matwʼĩte vyũ kwĩanĩsya kĩanda kĩu matanamba kũtwʼĩka amanyĩwʼa make. Yesũ nĩwatũmĩie ngelekanyʼo ĩngĩ nĩ kana amatetheesye maelewe nesa ũndũ ũsu. Aisye atĩĩ:

“Nĩ mũsumbĩ wĩva aithi kũkita na mũsumbĩ ũngĩ ũtambaa kwĩkala nthĩ na kũsũanĩa kana we, e na asikalĩ 10,000, nũtonya kũkĩlya vinya ũla ũngĩ wũkĩte kũkita nake e na asikalĩ 20,000? Ĩndĩ ethĩwa kwa wʼo ndatonya kwĩka ũu, nũtũmaa kĩkundi kya andũ kĩkaneene na mũsumbĩ ũla ũngĩ e o kũasa, na aimantha mũuo.” Na nĩ kana atetheesye andũ asu mamanye ũndũ ngelekanyʼo ĩsu ĩmakonetye aisye atĩĩ: “O ta ũu, manyai nesa kana vaiĩ ũmwe wenyu ũtonya kũtwʼĩka mũmanyĩwʼa wakwa atambĩte kũtia malĩ yake na syĩndũ syake.”—Luka 14:31-33.

Kwa wʼo Yesũ ndaneenaa na andũ ala waendanĩtye namo me oka. Ĩndĩ Yesũ atavasya andũ onthe ala mekwenda kwĩmanyĩsya ĩũlũ wa Klĩsto kana nĩmaĩle kwĩka maũndũ ala waweta. Kwĩka ũu kwoonanasya kana nĩmeyũmbanĩtye vyũ kũtia kyonthe kĩla me nakyo ta malĩ yoo. O na maaĩle kwĩthĩwa meyũmbanĩtye kumya mathayũ moo ethĩwa nĩmekwenda kũtwʼĩka amanyĩwʼa make. Ũsu nĩ ũndũ maaĩle kũsũanĩa na kũvoya mũno kwondũ wa wʼo.

Yesũ nĩwasyokie aweta ĩũlũ wa ũndũ waĩ anaweta nthĩnĩ wa Ũtavanyʼa wa Kĩĩmanĩ yĩla waisye kana amanyĩwʼa make nĩ “mũnyũ wa nthĩ.” (Mathayo 5:13) Yesũ nũtonya kwĩthĩwa oonanasya kana o tondũ mũnyũ ũtũmĩawa kũsũvĩa syĩndũ iikathũke, amanyĩwʼa make maĩ na ũtonyi wa kũtetheesya andũ methĩwe na ngwatanĩo nzeo na Ngai na mayĩthĩwa na mwĩkalĩle mũseo. Yesũ aiminĩĩa ũtavanyʼa wake aisye atĩĩ: “Vate nzika, mũnyũ nĩ mũseo. Ĩndĩ mũnyũ waasya mũsamo, ũtonya kũtũngĩĩwa mũsamo wawʼo ata?” (Luka 14:34) Ala mamwĩthukĩĩsye nĩmeesĩ kana mavinda amwe mũnyũ wavulana na syĩndũ ingĩ kuma mũthanganĩ ndweethĩawa wĩ mũtheu, na ũu watumaa wasya mũsamo na ũyĩthĩwa ũtatethya.

Kwoou Yesũ oonanasya kana o na ala meethĩĩtwe me amanyĩwʼa make kwa ĩvinda ĩasa mayaaĩle kũleela o na vanini. Maleela mesaa kwĩthĩwa mate vata, o ta mũnyũ waĩtye mũsamo. Na kwoou nĩmesaa kũthekeewa nĩ andũ ala angĩ. O na nĩmesaa kwĩthĩwa mate ma vata methonĩ ma Ngai, na maituma ĩsyĩtwa ya Ngai yĩneenewa naĩ. Yesũ nĩwakindĩlĩĩle vata wa kwĩvathana na maũndũ asu, yĩla waisye atĩĩ: “Ũla wĩ na matũ ma kwĩwʼa, nĩewʼe.”—Luka 14:35.