MWĨKALĨLE WA AKLĨSTO
Lũlũmĩĩlya Mũĩkĩĩo Waku Ndetonĩ ya Ngai
Ndeto ya Ngai no ĩalyũle mwĩkalĩle witũ. (Avl 4:12) Ĩndĩ nĩ kana tũtetheke nĩ motao na myolooto ĩla yĩ nthĩnĩ wayo, no nginya tũĩkĩĩe vyũ kana yo nĩ “ndeto ya Ngai.” (1Th 2:13) Tũtonya kwĩka ata tũmĩĩkĩĩe Mbivilia mũnango?
Somaa Mbivilia kĩla mũthenya. Yĩla ũũsoma Mbivilia, manthaa maũndũ meũkũĩkĩĩthya kana Yeova nĩwe Mũandĩkĩthya wayo. Kwa ngelekanyʼo, sũanĩa ũtao mũseo ũla wĩ ĩvukunĩ ya Nthimo na ũyona ũndũ ũtonya kũtũtethya ũmũnthĩ.—Nth 13:20; 14:30.
Ambĩĩa mũvango wa kwĩmanyĩsya maũndũ maingangĩ. Tata ũelewe nesa vyũ maũndũ ala meũkũĩkĩĩthya kana Mbivilia nĩ mbeveee. Ĩvukunĩ ya Kwĩka Ũkunĩkĩli ya Ngũsĩ sya Yeova, thi vala vaandĩkĩtwe “Mbivilia,” na ĩndĩ ũithi vala vaandĩkĩtwe “Nĩ Mbeveee Nĩ Ngai.” O na ĩngĩ, no ũlũlũmĩĩlye mũĩkĩĩo waku kana ũvoo ũla wĩ Mbivilianĩ ndwaavĩndũwa kwa kwĩka ũkunĩkĩli ũvoonĩ ũla wĩ ĩkasetinĩ ya Mũsyaĩĩsya Na. 4, 2016.
ĨLOELEI VITIO YĨ NA KYONGO, NĨKĨ TWAĨLE KŨĨKĨĨA . . . NDETO YA NGAI?, NA ĨNDĨ MŨISŨNGĨA MAKŨLYO AA:
Maũndũ ala maandĩkĩtwe ũkũtanĩ wa ĩkalũ yaĩ Karnak, nthĩ ya Misili, maĩkĩĩthĩtye ata kana Ndeto ya Ngai nĩ ya wʼo?
Twĩsĩ ata kana ũvoo ũla wĩ Mbivilianĩ ndwaavĩndũka?
Kwona twĩ na Mbivilia ũmũnthĩ kũkũĩkĩĩthasya ata kana yo nĩ Ndeto ya Ngai?—Soma Isaia 40:8